Plattdeutsche Nachrichten

De Plattdüütschen Narichten vun'n 2. Oktober 2018

Plattdüütsch Narichten vun'n 2. Oktober 2018, [3:44]

Diesel-Striet vun’n Disch

Berlin: De Top-Lüüd vun Union un SPD sünd in de Diesel-Saak op een Brett kamen. Wat genau se uthannelt hebbt, dat wüllt de tostännigen Ministers över Dag vertellen. Rutkamen is bet nu, dat ok Boo-Dele uttuuscht warrn schüllt. Mit düssen Utgliek will de Koalitschoon afwehren, dat Dieselwagen nich mehr fohren dröfft.

Gesetz för’t Towannern: Kurs afstimmt

Berlin: Lang harrn se hen un her snackt – nu is sik de grote Koalitschoon eens worrn över enkelte Punkten för dat Towannern vun Fachlüüd. Dat sä SPD-Baas Nahles. Wegen Asyl un wegen de Arbeit na Düütschland kamen, dat schüllt grundsätzlich twee poor Schoh blieven. Man se wüllt klore Regeln fastleggen för Lüüd mit en Asylandrag, de Arbeit hebbt un sik goot in de düütsche Gesellschaft rinfunnen hebbt. Dat Kurs-Poppier schall noch vundaag dör dat Kabinett dör.

Veer Rechte vundaag vör den Richter

Berlin: Veer Lüüd, vun de se meent, dat weren Rechtsterroristen, kaamt vundaag vör den Ermittlungsrichter an den Bunnsgerichtshoff. Dree annern sünd güstern al in Ãœnnersökenshaft kamen. De Generalbunnsanwalt harr güstern söven Mannslüüd in Arrest nahmen. Seggt warrt: Se hebbt en rechtsterroristische Koppel grünnt. För morgen, den „Dag vun de düütsche Eenheit“, harr de Koppel Akschonen plaant. Angriepen wullen se Butenlanners, de Waffen bi sik hebbt, Lüüd, de politisch op de anner Siet staht, un Journalisten.

Ryan-Air: Vele nich inverstahn

Bremen: Parteien un Gewarkschaften sünd dor nich mit inverstahn, dat Ryan-Air den Bremer Lann-Punkt vunwegen en Tarifstriet dichtmaken will. De Bremerhavener SPD-Afgeordnete in’n Bunnsdag Uwe Schmidt verlangt: De Staat müss sik för de Mitarbeiders insetten. Ok CDU-Baas Kastendiek hett Ryan-Air bekriddelt. De Piloten-Gewarkschaft Cockpit sä: Dat is en Schandaal, wenn Ryan-Air Lüüd wegen en Tarifstriet vör de Döör sett. De Flegergesellschaft harr künnig maakt, se warrt blots noch vun’t Butenland na Bremen flegen. Twee Maschinen, de in Bremen staht, schüllt in fief Weken aftrocken warrn.

Tornados schöllt Füernester finnen

Möppen: Vundaag fleegt wedder Tornados mit Warmbildkameras över dat Land mit den Moorbrand. Se wüllt Füernester finnen. Op dat Land dor hett de Bunnswehr nu blots noch 850 Lüüd stahn. De Polizei harr bet verleden Dunnersdag mehr as 1.100 Lüüd dor, ok ut anner Gegenden vun Neddersassen un vun de Bereitschaftspolizei.

Dat Weer

Un woans süht dat mit dat Weer umto ut? Opstunns hebbt wi in Zeven 7 Graad, in Bremen, Bremerhaven un Nordenham sünd dat 8 Graad. Vundaag hangt de Heven lange Tiet vull mit griese Wulken. Vun Oostfreesland un dat Emsland schufft sik ok mal Regen ran, de pö a pö na Süüdoosten aftreckt. Gegen Avend wedder weniger Natts vun baven, vör allen an de See kriegt wi denn ok mal den Heven to sehn. Dat Thermometer krabbelt op 12 bet 14 Graad. De Wind briest op, he weiht frisch un an de See ok deegt oder störmsch vun de westen bet noordwesten Kant, an de See ok mit störmsche Böen un Stormböen. Tokamen Nacht: Mal en poor Wulken, mal pladdert dat, vör allen vun Oostfreesland bet na dat Werser-Elv-Dreeeck hen. Bi 11 bet 8 Graad. Morgen: Mal düüstere Wulken, mal Sünnschien. Meisttiets dröög. Dat Ganze bi 14 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ulrike Müller.