Plattdeutsche Nachrichten

De Plattdüütschen Narichten vun'n 26. April 2019

Plattdüütsch Narichten vun'n 26. April 2019, [3:32]

De, de dat plaant hett mit de Anslääg in Sri Lanka schall doot sien

Colombo: De, de de Anslääg in Sri Lanka, as dat schient, plaant hett, schall doot sien. De Präsident Sirisena seggt, dat de Islamistenanföhrer „Hashim“ na Informationen vun´t Geheemdeenst bi eene Attack umkamen is. De Regerung hett de Tall vun de Lüüd, de to Dood kamen sünd, na ünnen sett. Dorna sünd bi de Anslääg an´t Ostersünndag um de 250 Minschen doodbleeven. Eerst harrn se 100 Minschen mehr annahmen.

Düütsche Inselkonferenz verlangt Akschoonspapeer

Helgoland: To´n Afsluss vun de 1. Düütsche Inselkonferenz willt de, de dor mitmaakt hütt een Akschoonspapeer ünnerschrieven. Dorin stellt de goot 100 Vertreder vun de Inseln un Halligen een paar Punkte an den Bunnsdag un de EU op, de se opklaren willt. De Politikers un de Manager vun´t Tourismus willt, dat de Nadelen vun ehren Standort op de Insel, günstsiets dat Fastland, utgliekt warrd. To´n Bispeel willt se nich mehr för den Import vun Strom betahlen. Buterdem maakt se sik Sorgen över de Priesen för ehre Stücke Boland, de hoch gaht.

SPD-Vörsittersche Nahles maakt Wahlkampf in Bremen

Bremen: Eenen Maand vör de Börgerschaftswahl kummt SPD-Vörsittersche Nahles an Avend na Bremen. De Wahlkampf-Veranstalten steiht unner dat Motto „Hartensaak-Wi leevt Bremen“. Blangen Börgermeister Sieling sind ok de Europa-Afordnete Schuster un de SPD-Landesvörsittersche Aulepp mit vun de Partie. Bremen is dat eenzigste Bunnsland, in dat de SPD, siet de Gründung vun de Bunnsrepublik, ah Pause regeert.

Mehrere Bränn in Oslebshuusen

Bremen: Mit mehrere Bränn in´t Bremer Westen hett de Kripo nu to doon. An´t Avend sünd in Bremen-Oslebshuusen twee grote Bränn utbroken. Um de 250 Füerwehrlüüd hebbt eerst olen Müll in den fröheren Bremer Schlachthof löscht. Dorna hett dat in eene Autowarksteed brennt. Vele Reifen harrn dor Füer fungen. Ok in Blumenthal un Walle harrn se lüttere Bränn to löschen. Man keen de  Füer leggt hett, un worüm, is noch nich klar.

Isenbahnstreek na Ollnborg ward nee maakt

Ollnborg: Pendlers op de Isenbahnstreek Bremen-Ollenborg mööt af hütt dormit reken, dat ehre Fohrt länger duert or Töög utfallt. Grund dorför sind Arbeiten an de Gliesen. Dat schall bit in de Midde vun´t Mai duern. Meist is dat bi de Nordwestisenbahnen. De RS 4 twischen Bremen un Hude fallt in de Tied komplett ut. Reisen Lüüd dröft in de Tied mit ehre Fohrschiene mit den Regionalexpress un den Intercity föhren, ahn wat dorto to betahlen. So een Spreker vun´t Ünnernehmen.

Dat Weer

Un nu een Blick op dat Weer: op Langeoog 13,an den Bremer Flegerhaben un an de Fischreehabenslüüs in Bremerhaben15, un in Syke sünd dat opstunns 16 Graad. Hüüt hebbt wi veele Wulken an´t Heven, un dat kann af un an mal Regen geven. Hütt Nomdag ward dat een Beten fründlicher, bi 15 bit 17 Graad. Tokamen Nacht eerst dichte Wulken, man dröge. Vun Ostfreesland her lockert de Wulken den op un man kann de Sterns noch funkeln sehn, bi 7 bit 9 Graad. Morrn ward de Wulken to´n Middag hen jümmers dichter un wi mööt mit Schuers reken,bi 13 bit 16 Graad. Sünndag wesselt sik de Sünn un de Wulken af Hier un dor kann dat mal son´n Beten pieseln, bi 13 bit 15 Graad. Dat weern de Nahrichten op platt. Gerrit Busch hett se tohoopstellt. Op Platt trechtmaakt un vörleest hett se Antje Kruppa.