Plattdeutsche Nachrichten

De Plattdüütschen Narichten vun'n 10. Mai 2019

Plattdüütsch Narichten vun'n 10. Mai 2019, [2:40]

China un USA willt wieter verhanneln

Washington: China un de USA willt in ehren Hannelsstriet wieter verhanneln. Gistern hebbt se dormit anfungen. Man, wat dor bit nu bi rutsuert is, hebbt se noch nich kund dahn. Hütt hett US-Präsident Trump nee`e Tölle roppsetten un gellen laten.

Jümmers mehr Hölpslüüd in de Pleeg fehlt

Berlin: Dat veele Fachlüüd in de Altenpleeg fehlt ward jümmers leeger, as dat schient. Luut de Bundesagentur för Arbeit sünd um de 15.000 Arbeitssteden free. Man blots 3.000 Fachlüüd ut de Branche sünd to de Tied op de Söke na eenen Job. Betriever vun Heime för ole Lüüd bruukt dorüm jümmers länger um de leddigen Stellen to besetten.

Bremer Klinikum Mitte ward inweiht

Bremen: Hütt Avend ward in dat Klinikum Mitte mit een Festakt dat Start-Teken geven. Dat hett veer Johr länger duert, as dat paant weer. In dat nee`e Gebäude ward in de Tokunft 25 Fachrichtungen Quarteer finnen. De eersten Patienten künnt so in een paar Dage kamen. Mittewiel sünd de Kosten op över 400 Millionen Euro anstegen. To Beginn werrn blots 230 Millionen Euro för den Bo plaant wesen.

Start-Teken för City-Gate an´t Bremer Hauptbahnhoff

Bremen: De City-Gate-Passage an´t Bremer Hauptbahnhoff ward hütt so richtig inweiht. De beiden Hüüs gaht 27 Meter in de Hööchde un hebbt um de 32.000 Quadaatmeter. De Kosten för den Bo sünd rund 100 Millionen Euro. Krögers un Weertslüüd, Hotels un Doktors hört to de nee´en Mieters. Se schüllt in de tokamen Weeken intrecken.

Iesboren kriegt woll keene Basketball-Lizenz

Bremerhaben: De Basketball-Bunnsliga will de Iesboren de Erstliga-Lizenz nich geven. Na Ansicht vun den Utschuss, de dorför tostännig is, hebbt de Bremerhabener to hohe, ole Schulden un nich noog Egenkapital. De Iesboren willt gegen dat Ordeel gegenan gahn.

Dat Weer

Un nu een Blick op dat Weer: op Langeooge un an de Fischereehabenslüüs in Bremerhabens 9, an den Bremer Flegerhaben un in Achim sünd dat opstunns 10 Graad. Hüüt meist veele Wulken an´t Heven un de Sünn kriegt wi nich so faken so sehn. Hier un dor sünd Schuers möglich. To´n Nomdag hen kummt de Sünn so´n beten mehr rut, bi 11 bit 14 Graad. Tokamen Nacht een paar Wulken, man dat blifft dröög. Dat Thermometer sackt op 2 bit 5 Graad. Morrn wesselt sik de Sünn un de Wulken af, dat kann ok hier un dor mal so´n beten pieseln. To de Küst hen kummt de Sünn ok mal tut, bi 11 bit 13 Graad. Sünndag lacht us de Sünn denn wedder an, blot´s een paar Wulken, meist dröge, bi 11 bit 13 Graad. Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Antje Kruppa.