Plattdeutsche Nachrichten

De Plattdüütschen Narichten vun'n 18. Juni 2019

Plattdüütsch Narichten vun'n 18. Juni 2019, [3:25]

EuGH: Dat düütsche PKW-Stratengeld is nich na Recht un Gesetz

Luxemborg: Dat düütsche Stratengeld för PKW is nich mit dat EU-Recht övereens. De Europääsche Gerichtshoff hett en Klaag vun Öösterriek gegen de Regeln, de Düütschland opsetten will. Dat Stratengeld weer ungerecht gegen anner EU-Länner, wo se blots vun Autofohrers ut anner EU-Länner betahlt warrt.

Landgericht Bremen: Mutt de Warft de „Gorch Fock“ rutgeven

Bremen: Dat Landgericht Bremen verhannelt vundaag en Extra-Andrag: De Bund will, dat de Bredo-Warft dat Schoolschipp „Gorch Fock“ rutgifft. Dat Seilschipp liggt op de Warft in Bremerhaven in’t Dock. Freedag schall Bredo den Rump egentlich wedder to Water laten. De Warft will dat Schipp aver as Pand trüchholen, un eerst denn rutgeven, wenn de Bund Reken vun fief Millionen Euro betahlt hett.

Bremen: Snacken över en Koalitschoon

Bremen: SPD, Gröne un Linke snackt wieder över en Koalitschoon. De 40-Lüüd-Koppel kümmert sik an’n Vörmiddag um Wetenschaft un Kultur un ok um Soziales un Integratschoon. Wat dorbi rutsuert, dor wüllt se noch nix vun vertellen. An’n 29. Juni schall de Koalitschoonsverdrag trecht ween.

USA schickt noch dusend Suldaten in den Negen Oosten

Washington: Wo twee Tankscheep in den Gulf vun Oman angrepen worrn sünd, schickt de USA noch mal dusend Suldaten in den Negen Oosten. US-Verteidigungsminister Shanahan hett kloormaakt: Dat is för de Sekerheit vun de US-Suldaten, de in de Gegend al jümehren Deenst doot, un för dat, wat för de Natschoon vun Belang is. Shanahan sä aver ok: Sien Land söcht keen Striet mit den Iran. Kort vörher harrn US-Militärs nee’e Biller rutgeven, de bewiesen schüllt: De Iran hett de Scheep angrepen.

Steinmeier un Merkel: Dor mutt Licht in den Fall Lübcke

Berlin: Wo dat in de Saak um den Regerungspräsident Lübcke, he weer bi sik to Huus dootschaten worrn, woll en rechtsextremen Achtergrund gifft, maakt sik Bunnspräsident Steinmeier Sorgen. In de Saak müss gau Licht rin, sä Steinmeier in de Süüddüütsche Zeitung. Wat in de Oort meen ok Kanzlersch Merkel. Se sä: Dat is goot, dat de Generalbunnsanwalt den Fall övernahmen hett.

Dat Weer

Un woans süht dat mit dat Weer umto ut? Opstunns hebbt wi in Bremen un Deefholt 23 Graad, in Bremerhaven sünd dat 24 un in Ollenborg 25 Graad. Vundaag: Blots en poor Wulken un veel Sünnschien. An’n Namiddag kann dat eher mal pladdern oder ok blitzen un dunnern. Dat Thermometer krabbelt op 23 bet 29 Graad. De Wind dorto weiht flau, he dreiht vun de süden op de noorden Kant. Tokamen Nacht blinkert de Steerns, mit blots en Handvull Wulken an den Heven, man en beten pladdern oder gewiddern kann dat liekers. Nich ünner 17 bet 15 Graad. Morgen: Eerst hell un kloor, denn aver kann dat Regen geven, ok mit Blitz un Dunnerslag. Dat is aver nich överall so, un twüschendör lacht ok de Sünn. Dat warrt bruttig warm mit 25 Graad op de Inseln un 30 Graad in’t Binnenland. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Günther-Borstel.