Plattdeutsche Nachrichten

De Plattdüütschen Narichten vun'n 27. Juni 2019

Plattdüütsch Narichten vun'n 27. Juni 2019, [3:39]

Twee wietere Mannslüüd in den Mordfall Lübke fastsett

Kassel: Na den Mord an den Regeerungspräsidenten Lübcke, ut Kassel, hebbt se twee wietere Mannslüüd fastsett. Dat hett de Bunnsanwatschaft bestätigt. Luut Informationen vun de ARD schall sik dat um den Händler un den Mittelsmann vun de Waffen vun den Täter hanneln, de dat woll maakt hett. In de Nacht hett dat Dörsökungen geven, de sik gegen den Verdächtigen richt hebbt. Dorbi hebbt se mehrere Waffen funnen. Aktuell besnackt sik de Bunnsdag över den Mordfall Lübke un siene Folgen.

Perzess um Missbruuk an Kinner in Lügde geiht los

Detmold: Hütt Vomdag geiht de Perzess um dat johrelange Vergahn an Kinner in Lügde, in Nordrhein-Westfalen, vör dat Landgericht Detmold, gegen dree Mannslüüd los. De Staatsanwaltschaft smitt de Beiden, de dat meiste maakt hebbt vör, sik in mehr as 450 Fälle an de Kinner vergahn to hebben un dat se Kinnerpornografie herstellt hebbt. De Drütt, de vör´t Brett steiht, schall bi dat Överdregen in`t Internet dörbi wesen sien. De Steed, wo dat schehn is wehr meist een Campingplatz in Lügde. An mehr as 40 Kinner twischen 4 un 13 Johren schall dor över Johre sexuelle Missbruuk stattfunnen hebben.

Bunnsdag besnackt sik över Grundstüer

Berlin: De Bunnsdag besnackt sik hütt Vomdag to´n ersten Mal över de plante Reform vun de Grundstüer. Eene Afstimmung is hütt noch nich plant. Man de Regeerung rekend dormit, dat wenn Union un SPD sik enig warrt, ok dat Parlament tostimmt. Na den Plan vun Bunnsfinanzminister Scholz schall bi dat utreken vun de Grundstüer de Weert vun den Boden un de Laage, un de Hüer in´t Snitt eene Rull spelen. De Bunnslänner dröfft denn vun düsse Regelung afweken.

Bremer CDU bestimmt nee`en Parteiboss

Bremen: De Bremer CDU wählt an`t Avend den nee`en Parteiboss. Opstellt hebbt se ehren Top-Kandidaten vun de Börgerschaftswahl Meyer-Heder. De Vörsitt is free, wiel de bitherige Landesboss Kastendiek in de Midde vun Mai sturven is. Meyer-Heder is de Enzige de to de Wahl steiht. He harr dat bi de Wahl an`t 26. Mai henkregen, de CDU to`n ersten Mal to de starkste Partei in Bremen to maken.

"Gorch Fock" treckt ut Bremerhaben af

Bremerhaven: Dat erst half trecht maakte Marineschoolschipp „Gorch Fock“ ward hütt Nomdag vun Bremerhaben na Berne an de Ãœnnerweser sleppt. Dor ward dat Schipp an eenen Anlegger vun de Fassmer-Warft fastmaakt. Dat hett de Elsflether Warft, as Haup-Opdragsgever kund dahn. De Warft will denn wieter sehn, keen denn dat Schipp fardig boat. De „Gorch Fock“ harr mehr as dree Johr in`t Dock vun de Bremerhabener Bredo-Warft legen. De Bredo-Warft verlangt as Sub-Unnernehmer vun de Elsflehter Warft 10,5 Millionen Euro för de Arbeiten an dat Schipp.

Dat Weer

Un nu een Blick op dat Weer: an de Fischreehabenslüüs in Bremerhaben, in Cuxhaben un an den Bremer Flegerhaben 15 un in Ossenbrügg sünd dat opstunns 16 Graad. Hüüt hebbt wi meist dicke Wulken an`t Heven, erst hütt Nomdag kriegt wi af un to mal de Sünn to sehn. Dat blifft dröge, bi 16 bit 20 Graad. Tokamen Nacht meist dicke Wulken, man keen Regen. Dat Thermometer sackt op 11 bit 14 Graad. Morrn erst noch veele Wulken, man to`n Nomdag hen lockert dat mehr un mehr op un dor kummt nix vun baven runner, bi 22 bit 24 Graad. An Sünnavend schient den ganzen Dag de Sünn för us, un dat Thermometer krabbelt op 25 bit 33 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Antje Kruppa.