Plattdeutsche Nachrichten

De Plattdüütschen Narichten vun'n 17. Juli 2019

Plattdüütsch Narichten vun'n 17. Juli 2019, [3:15]

Kramp-Karrenbauer nu in Merkel ehr Kabinett

Berlin: CDU-Baas Kramp-Karrenbauer kriggt noch hüüt Vörmiddag ehr Urkunn as Verteidigungsministersch. Se övernimmt dat Amt vun de ne’e Präsidentin vun de EU-Kommischoon von der Leyen. Bet nu harr de Fro ut’t Saarland jümmers seggt: Ministersch will se gor nich warrn.

Gegen Masseln impfen warrt in Düütschland Plicht

Berlin: Dat Bunnskabinett hett fastleggt: Gegen Masseln impfen warrt Plicht. So’n Gesetz hebbt se op’n Weg bröcht. Vun 2020 op an gellt: Kita-Kinner un Grundschölers mööt nawiesen, dat se impft sünd. Dat Gesundheitsministerium seggt, dat hett dormit to doon, dat in de eersten Maand vun düt Johr al 400 Kranke mit Masseln mellt worrn sünd.

Afgeordnete gegen Trump sien Angriff op Demokratinnen

Washington: Dat US-Repräsentantenhuus is nich inverstahn mit dat, wat Präsident Trump gegen veer Froenslüüd vun de Demokraten bekannt maakt hett. Vele seggt, dat weer rassistisch. 240 Afgeordnete weren för so’n Resolutschoon, 187 dorgegen. Trump harr op Twitter schreven, de Froenslüüd schullen na jümehr Heimatlänner trüchgahn. Dree vun düsse Afgeordneten sünd in de USA op de Welt kamen, ene Fro is as Kind na de Vereenten Staaten kamen.

Hoochschool Bremerhaven: Kumm ut Algen warrt test

Bremerhaven: Lütte Mahltieden ut de Hand schüllt umweltfründlicher warrn. Dorför wüllt se en Kumm ut Algen utkloken, de een achteran ok opeten kann. 2020 will de Hoochschool Bremerhaven dorför en Muster uttesten. En Keed vun Gau-bi-de-Hand-Eten will an enige Steden de Mahltieden in düsse Kummen verköpen. Wo de Hoochschool un dat Alfred-Wegener-Institut op daal wüllt: En Putt ut Algen boen, de op den Kumpost kann, den een aver ok opeten kann.

Emmy-Kandidaat Nummer een: Game of Thrones

Los Angeles: De letzte Törn vun de Fantasy-Reeg „Game of Thrones“ is so vele Malen as Emmy-Kandidaat op de List kamen as noch keen anner Feernseh-Programm. 32 mal sünd se för den Pries vörslaan worrn. Nu al is “Games of Thrones” de Film-Reeg in de Geschicht vun’t amerikaansche Feernsehn, de de meisten Priesen kregen hett.

Dat Weer

Un woans süht dat mit dat Weer umto ut? Opstunns hebbt wi in Kneten un Staad 15 Graad, in Bremen un Bremerhaven sünd dat 16 Graad. Vundaag: Eerst dichte Wulken, gegen Middag ritt de Wulkendeek pö a pö op. An’n Namiddag un Avend lacht uns denn ok mal de Sünn, man twüschendör kann dat ok noch pladdern. Dat Thermometer krabbelt op 18 bet 22 Graad. De Wind dorto weiht flau oder en beten mehr vun de westen bet noorden Kant. Tokamen Nacht: Mal mehr, mal weniger Wulken, mag ween ok kloor. Dröög bi 14 bet 10 Graad. Morgen: Eerst veel Sünnschien. Vun’t Emsland her treckt aver al an‘n Vörmiddag mehr un mehr Wulken ran. Later kann dat denn vör allen westlich vun de Werser schuern un gewiddern. Bi 23 bet 26 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Claudine Bimmermann.