Plattdeutsche Nachrichten

De Plattdüütschen Narichten vun'n 12. August 2019

Plattdüütsch Narichten vun'n 12. August 2019, [3:47]

Parlament in Italien: Afstimmen över Misstruen

Rom: In Italien snackt se nu ok amtlich doröver, wat de Politik Ministerpräsident Conte, he höört to keen Partei to, noch troot. Hüüt Namiddag sett sik de Frakschoonsvörsitters vun den Senaat tohoop, dat is de twete Kamer vun dat Parlament. Se leggt den Kurs fast, womööglich hen na Neewahlen. Binnenminister Salvini vun de rechtsextreme Lega harr Freedag en Andrag op Misstruen stellt.

De Wegsmietworen herstellt, schall betahlen

Berlin: Bunnsumweltministersch Schulze will: De Gemeenden schüllt weniger för dat Wegbringen vun Müll betahlen. Mehr Last bi’t Reinmaken in de Stadt schüllt de Bedrieven dregen, de Wegsmietworen herstellt, so as Zigaretten un Eenmal-Kaffebekers. Ehren Plaan stellt de SPD-Fro hüüt Vörmiddag vör.

Lanns-Öllernraat Neddersassen: Ansehn vun Schoolmesters schall beter warrn

Hannover: De Lanns-Öllernraat Neddersassen verlangt: De Schoolmesters schullen jümehr Profeschoon fründlicher ansehn. Ok schullen dat Kultusministerium oder de Bund en Akschoon för Lehrers op den Weg bringen. So kunnen mehr junge Lüüd dorför innahmen warrn, dat se Schoolmesters warrt. In Neddersassen söökt se för düt Schooljohr noch um un bi 200 Lehrers. Noch mehr kniepen warrt dat tokamen Johr. Denn gifft dat wedder dat Abitur na 13 Johr, un dorför bruukt se Lehrers bavento.

Klinikum Ollenborg bruukt woll mehr Geld

Ollenborg: Dat Klinikum bruukt woll mehr Geld as se bet nu dacht hebbt. So steiht dat in de Nordwestzeitung, un de hett dat ut den Viddeljohrsbericht, den de Stadt opsett hett. Dor heet dat: Düt Johr fehlt 14,6 Millionen Euro in de Kass. Dat sünd 2,8 Millionen Euro mehr, as se vörher utrekent harrn. De Stadt Ollenborg hett al in’t eerste Halvjohr mehr as 30 Millionen Euro dorto betahlt.

Football-Radau: Bremer Polizei richt Ermittler-Koppel in

Bremen: Wo Sünnavend na dat DFB-Pokaalspeel Ultras Schandarms angrepen harrn, hett de Polizei en Ermittler-Koppel inricht. De Polizei seggt: En Ultra-Fan harr en Schandarm mit alle Gewalt gegen den Kopp pett. Anner Ultras harrn de Polizei mit Klinkersteen, Stangen un anner Saken angrepen. Dorbi sünd noch dree Beamte to Schaden kamen. Binnensenater Mäuer sä: Dat weer achtertücksch. Polizeipräsident Fasse meen: Lüüd, de sowat maakt, hebbt keen Geweten un leggt dat blots dor op an, dat se allens gegen den Staat un de Polizei rutlaat.

Dat Weer

Un woans süht dat mit dat Weer umto ut? Opstunns hebbt wi in Vechte 18 Graad, in Bremen un Bremerhaven sünd dat 19 un op Baltrum 20 Graad. Vundaag: Eerst blauen Heven un Sünnschien. Dröög. Gegen Middag stiegt aver mehr un mehr Wulken op, un de köönt sik ok mächtig tohoopballen. Un ut de kummt an’n Namiddag un Avend de een oder anner deegte Schuer op uns daal, blitzen un dunnern kann dat ok mal. Blots noch 20 bet 25 Graad. De Wind dorto weiht in Maten bet frisch vun de süüdwesten bet westen Kant. Wenn dat schuert oder gewiddert ok mit störmsche Böen. Tokamen Nacht: Mal mehr, mal weniger Wulken. Mit noch mehr Schuer un Gewidder, dat kann ok mal bannig rummsen. Nich ünner 14 bet 12 Graad. Morgen: Vele Wulken, un vun de Noordsee her treckt mehr Regen ran, ok mit Gewidder. An’n Namiddag warrt dat wat fründlicher. Denn pladdert dat blots noch langs de Küst. Nich mehr as 16 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.