Plattdeutsche Nachrichten

De Plattdüütschen Narichten vun'n 28. Januar 2020

Plattdüütsch Narichten vun'n 28. Januar 2020, [3:48]

De eerste Corona-Kranke in Düütschland

München: Dat ne’e Corona-Virus is in Düütschland ankamen. En Mann ut den Landkreis Starnberg hett sik ansteken. Dat hett dat bayrische Gesundheitsministerium in München vermellt. Vun de medizinische Siet geiht den Patschent dat goot. Kunn ween, ok in dat Land Bremen gifft dat twee Kranke. De Behörden seggt aver: Se rekent nich dormit, dat se wohrhaftig dat ne’e Virus finnt. Se hebbt dat ünnersöcht, un wat dorbi rutkamen is, dat kriegt se in en poor Daag to weten. Dat Virus weer in’n Dezember dat eerste Mal in China opkamen. Middewiel sünd dor mehr as hunnert Minschen dootbleven.

DGB verlangt mehr Minnstlohn

Berlin: De Düütsche Gewarkschaftsbund verlangt: De Minnstlohn schall kloor hoochsett warrn. Nödig sünd 12 Euro 35, sä DGB-Vörstands-Mann Körzell in de Saarbrücker Zeitung. Wenn dat nich maakt warrt, warrt de Afstand twüschen den normalen Lohn un den Minnstlohn grötter un grötter. Vun hüüt op an sitt wedder de Kommischoon för den Minnstlohn tohoop. Bet to den 30. Juni mööt se en Vörslag op den Disch leggen, wo veel de Minnstlohn an’n 1. Januar 2021 hoochgahn schall.

Trump stellt sien Fredensplaan för den Nehgen Oosten vör

Washington: US-Präsident Trump stellt vundaag sien Fredensplaan för den Nehgen Oosten vör. Medien hebbt to weten kregen: Grote Stücken vun dat Westjordanland schüllt na Israel kamen. Israel schall Jerusalem wieder kuntrulleren, de Palästinensers kriegt dor blots en Vertretung. De Palästinensers hebbt al seggt: Dat steiht gegen dat Völkerrecht.

Polizeiwach hett brennt

Bremen: De Huuswand vun de Polizeiwach in dat Bremer Steentor hett bi en Füer verleden Nacht böös wat afkregen. Keeneen is to Schaden kamen. De Polizei hett hüüt Morgen seggt: Toeerst hett dat an de Döör brennt. De Kriminalpolizei hett de Saak övernahmen. Eerstmal hebbt se dor en Ersatz-Revier opboot.

Nett an de Noordsee schall beter warrn

Wilhelmshaven: De Tourismusverband Noordsee verlangt: Breetband un Mobilfunk mööt utboot warrn. „Wi bruukt Breetband an jeedeen Melkkann – ok wenn de een oder anner Politiker bi’n Bund dat anners süht.“ Dat meent Verbandsvörstand Ambrosy. De Urlaubers kunnen so an’n Strand al jümehr Avendprogramm planen, Fotos an Verwandte oder över soziale Nettwarken rutschicken. „In de Nedderlannen kennt se so’n Problemen gor nich, dor löppt ok an’n Strand de LTE-Standard“, sä Ambrosy. In Willemshaven is vundaag de Noordsee Tourismus-Dag. Bavenan steiht de Digitaliserung.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Achim un Harlesiel överall 6 Graad. Vundaag kann dat jümmers mal wedder düchtig pladdern, dat kann ok Grisselgrussel geven. De Sünn waagt sik meist gor nich rut. Dat Thermometer krabbelt op 6 bet 7 Graad, över Dag warrt dat eher weniger. De Wind dorto weiht in Maten oder en beten mehr vun de süüdwesten bet westen Kant, wenn dat schuert ok mit störmsche Böen, an de Küst sogoor Stormböen. Tokamen Nacht: teemlich vele Wulken, un de smiet ok mal Regen op uns daal. Bi 4 bet 2 Graad. Morgen: Jümmers noch Wulken, Wind un Regen. Af un an kann dat ok grisselgrusseln mit Blitz un Dunnerslag. Wenn wi Glück hebbt, kriegt wi ok mal de Sünn to sehn. Dat Ganze bi 5 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.