Plattdeutsche Nachrichten

De Plattdüütschen Narichten vun'n 30. Januar 2020

Plattdüütsch Narichten vun'n 30. Januar 2020, [3:04]

Milliarde Hölp för de Buern

Berlin: De Bundesregerung plaant Milliardenhölp för de Buern. Bi dat Ümsetten vun de scharperen Regeln to´n Düngen schüllt se Hölp kriegen. De Bund will dorför in de tokamen veer Johren eene Milliarde Euro freegeven. Ok för den Bo vun nee`e Gülleanlagen. Doröver sünd sik de Koalitionsutschuss vun Union un Gröne enig wurrn.

Düütsche Bank maakt wieter Minus

Frankfurt: De Düütsche Bank hett dat Johr 2019 mit een Minus vun rund 5,3 Milliarde Euro afsluten. De Bank seggt, dat dat Minus alleen vun den Ümbo vun ehren Konzern kummt. Dat is dat fievte Johr achtereenanner, wo de Bank Minus maakt hett. Mit den Ümbo vun den Konzern will de Bank bi´t arbeiden in de Tokunft mehr wat vun afkregen. Man ok för un mit ehre Kunn willt se sik mehr afmöhen.

EU-Staaten mööt Brexit tostimmen

Brüssel: De restlichen EU-Staaten stimmt över den Brexit- Verdrag af. De Tostimmung is blots noch eene Formsaak. Dorna kann Grootbritannien an´t Freedagavend ut de EU rutgahn. Gistern hett all dat EU-Parlament sien Naam dorünnersett. Grootbritannien is denn 47 Johr bi de EU mit vun de Partie wesen.

Bremen will Arbeitsgrupp för Arbeit för dat Klima

Bremen: Eene nee`e Arbeitsgrupp schall eenen „Kurs för Arbeit för dat Klima“ in Bremen utklamüüstern. Dat hett de Bremsche Börgerschaft mit de Stimmen vun alle Fraktionen besluten. Bi de Kommischoon schüllt 18 Mackers mit dorbi wesen. Dat geiht dorbi üm de Fragen to den Verkehr, dat Maken vun Strom un üm dat op Schick bringen vun Hüüs. Ok willt se klar kriegen wo se nee`e Hüüs fründlicher för´t Klima boen könnt. In een un een halfet Johr schüllt de Politikers un Fachlüüd ehren Bericht op`n Disch leggen.

Staatsgerichtshoff stimmt över Wunsch vun`t Volk af

Bremen: De Bremer Staatsgerichtshoff stimmt över den Wunsch vun`t Volk af, dat mehr Plegers för de Bremer Kankenhüüs fordert. 12 Dusend Ünnerschriften harrn de Lüe sammelt, de dat in Gang sett hebbt. De Senat harr gegen den Wunsch vun`t Volk klagt. Se meent, dat de Kosten för de nee`en Stellen to hooch sünd. Buterdem seggt de Senat, dat de Tall vun`t Personal de Bundesgesetze regelt un se sülben nix maken könnt.

Dat Weer

Un nu een Blick op dat Weer: An den Bremer Flegerhaben, an de Fischreehabenslüüs in Bremerhaben, in Cuxhaben un in Veern sünd dat opstunns 7 Graad. Hüüt hebbt wi veele Wulken an´t Heven un af un an kann dat Regen geven. An Nomdag ward dat vun`t Ollenborger Münsterland un vun Ostfreesland her dröger un dat lockert op, bi 8 bit 9 Graad. Tokamen Nacht meist dicke Wulken un hier un dor kann dat so´n beten pieseln, bi 6 bit 8 Graad. Morrn erst noch veele Wulken , un af un an mit so´n beten Natt vun baven, bi 10 bit 12 Graad. An Sünnavend blifft dat jüst so wesselhaft, bi 10 bit 12 Graad. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Antje Kruppa.