Plattdeutsche Nachrichten

De Plattdüütschen Narichten vun'n 27. Februar 2020

Plattdüütsch Narichten vun'n 27. Februar 2020, [3:03]

Bundesregerung richt Corona-Krisengrupp in

Berlin. De Bundesregung will nu en Krisengrupp för dat Gegenangahn gegen dat nee Corona-Virus inrichten. Enkelte Saken wullen Gesundheitsminister Spahn un Binnenminister Seehofer an´n Middag bekannt maken. In Ogenblick gift dat thein Fallen in Düütschland, bi de dat kloor is, dat dat de Corona-Virus is. In Nordrhein-Westfalen, Baden-Württembarg un Rheinland-Pfalz.

Maas verlangt mehr Insetten för atomaret Afrüsten

New York. Bundesbutenminister Maas hett de internatschoonal Gemeenschaft opropen, mehr gegen atomaret Wettrüsten to doon. Vör den Sekerheitsrat vun de Vereenten Natschonen warv he dorför, den Atomwapensperrverdrag to ünnerstütten. Dat nukleare Afrüsten steiht still, see Maas.

Grootbritannien stellt Verhannelnsopdrag vör

London. De britisch Regerung stellt vundaag enkelte Punkte to ehrn Verhannelnsopdrag mit de EU vör. Dor binnen geiht dat dorum, woans een in Tokunft mitenanner ümgaht. För dat Drapen hebbt London un Brüssel blots bit to dat Enn vun´t Johr Tiet. Denn löppt de Brexit-Övergangstiet af. Dat Verhanneln schall an Mondag anfangen. EU-Baas-Verhandler Barnier hett al vermellt, he rekent mit vigelienschen Gespreken.

Krawalle in Indien wegen Inbörgerungs-Gesett

Neu Delhi. Bi Stratenslachten twüschen Hindus un Muslimen in de indisch Hauptstadt sünd mehr as 20 Minschen dootbleven un mehr as 200 an´t Lief to Schaden kamen. Utlöser weern Proteste gegen dat nee Gesett, woans een en indisch Staatsbörger weern kann. De Minnerheit vun de Muslime föhlt sick dordör beschubbt.

Breemsche Börgerschaft will Dükern na Müll tolaten

Bremerhaben. De Bremer Senat schall sick in de Bundespolitik dorför insetten, dat dat Mitnehmen vun wegsmieten Eten un Drinken ut den Müll, kien Verbreken mehr is. Dorto hett de Börgerschaft den Senat opfördert. Bavento mööt de Landesregerung mehr gegen dat Rümasen von Eten un Drinken doon. Dorto schall dat ok Drapen mit den Hannel geven.

Dat Weer

Un nu een Blick op dat Weer: op Baltrum, an den Bremer Flegerhaben un an de Fischreehabenslüüs in Bremerhaben twee un in Wildshusen sünd dat opstunns dree Graad. Hüüt rieten de Wulken op un de Sünn kiekt n´beten döör. In´n Verloop vun´n Vörmiddag treckt de Heven wedder to. Af un an kann dat pladdern. De Wind weiht in Maten ut Süüdwest bit Süüd. Dat Thermometer wiest en Temeperatur vun fief bit söss Graad. Tokamen Nacht trecken dichte Wulken mit Sneeregen or Snee op. Dorna lockert dat op. Hier un dor kann dat ok glatt weern.  Dat Thermometer sackt op een bit twee Graad. Morrn hört dat op to pladdern. An´n Dag gift dat en Wessel ut Sünnschien un lockeren Wulken. An´n Namiddag trecken de Wulken wedder tosamen. Dat Thermometer wiest en Temperatur vun söven bit acht Graad.
Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Markus Weise.