Plattdeutsche Nachrichten

De Plattdüütschen Narichten vun'n 28. Februar 2020

Plattdüütsch Narichten vun'n 28. Februar 2020, [3:08]

Weniger Lüüd ahn Arbeit in Bremen un Neddersassen

Bremen: In´t Land Bremen is de Tall vun Minschen ahn Arbeit in´t Februar licht daal gahn. Tosamen wesen knapp 37 Dusend Froens- un Mannslüüd ohn Arbeit, düütlich weniger as in den Maand dorför, man mehr as för een Johr. De Quote in Bremen liggt bi 10,2 Perzent. In Neddersassen is de Tall ok licht daal gahn. De Quote liggt bi 5,3 Perzent. Dat sünd 228 Dusend Minsche de keene Arbeit harrn. Luut  Bunnsargentur för Arbeit  sökt Ünnernehmen in Bremen un Neddersassen jümmer noch Mitarbeiders.

Corona-Virus nu ok in Norddüütschland

Hamborg: Een Mannsbild ut Hamborg hett sik, as dat schient, in sienen Italienurlaub mit den Corona-Virus ansteken. He arbeit in de Kinnerafdelung vun´t Uni-Klinikum Eppendorf. Vördem hebbt se wietere Corona-Fälle ut Bayern, Baden-Württemberg, Nordreihn-Westfalen un Hessen melld. De Krisengrupp vun de Bunnesregerung besnackt sik hütt wat se gegen den Virus doon willt. Dorbi geiht dat ok dorüm, wo se bi grote Veranstalten vörgaht.

Striet twischen Törkei un Syrien ward strenger

Ankara: Bi Attacken ut de Luft vun de syrische Armee op törksche Stellungen in de Provinz Idlib sünd tominnst 33 Suldaten to Dode kamen. Dat hett een Spreker vun Staatsboss Erdogan bekannt geven. De törksche Armee hett in de Nacht Stellungen vun de Assad-Truppen angrepen, üm jüm dat trüch to betahlen.

Werder-Bunnsliga-Speel gegen Frankfurt ward villicht verleggt

Bremen: Dat Werder-Bunnsliga-Speel gegen Frankfurt ward villicht verleggt. De Grund dorför is, dat se de Europa-Leaque-Partie vun de Frankfurter in Salzborg, vunwegen een Orkan, op hütt Avend verschuuvt hebbt.

„Gollen Boor“ för Schauspeelerin Helen Mirren

Berlin: De Britin Helen Mirren is an´t Avend op de Berlinale för ehr Levenswark mit den „Gollen Boor“ uttekent worrn. Se hett den Ehrenpries persönlich annahmen. Mirren harr vördem ok all den Oskar för ehre Rull in „The Queen“ kregen. De Berlinale hört, mit Cannes un Venedig, to de wichtigsten Filmfestivals vun de Welt to.

Dat Weer

Un nu een Blick op dat Weer: An den Bremer Flegerhaben un in Deefhold 3, an de Fischreehabenslüüs in Bremerhaben 4 un op Langeooge sünd dat opstunns 6 Graad. Hüüt Vomdag is dat noch recht fründlich un de Sünn lett sik ok mal wedder blicken. Hütt Nomdag treckt denn vun´t Emsland her mehr un mehr Wulken op, bit to´n Abend blifft dat dröge, bi 8 bit 9 Graad. Tokamen Nacht veele Wulken un dor kummt onnig Natt vun baven rünner, ok Snee is mööglich, bi 2 bit 4 Graad. Morrn erst noch dröge, man an´t Nomdag mal mehr mal weniger Wulken mit Regenschuers. De Wind weiht mit Maten vun Süd/Südwest mit störmsche Böen, bi 10 bit 13 Graad. An Sünndag is dat jüst so wesselhaft mit Regen un dat ward wedde windig,  bi 8 bit 10 Graad. Dat weern de Nahrichten op platt. Ralph Stölting hett se tohoopstellt. Op Platt trechtmaakt un vörleest hett se Antje Kruppa.