Plattdeutsche Nachrichten

De Plattdüütschen Narichten vun'n 30. März 2020

Plattdüütsch Narichten vun'n 30. März 2020, [3:18]

Oplagen wegen Corona ward erstmal nich lockert

Berlin – De Bunnesregeern hett dat Foddern nah en Lockern vun de Oplagen vunwegen Corona trüchwiesen. Kanzleramtsminister Braun sä in’t ZDF, de Oplagen ward noch bit to’n 20. April blieven. Of se danah noch länger anduert, kann noch nümms seggen. Dat Wichtigst is, dat jedeen in Dütschland in Krankenhüüs un bi Dokters versoorgt weern kann. Darför mutt dat Verbreden vun dat Virus jümmer langsamer vunstatten gahn.

Klein-Ünnernehmer köönt nu Finanzhölp beandragen

Berlin – De staatlichen Corona-Finanzsprütten för lüttje Bedreeve köönt nu afropen weern. Vun hüüt an köönt lüttje Firmen, Sülfstännige un Minschen, nich fast anstellt sünd, eenmalig Finanzhölp beandragen. Tohoopnahmen sünd 50 Milliarden Euro in’n Topp. Güstern hebbt Bund un Länner de letzten Hürden, dat Geld to kriegen, ut’n Weg rüümt.

Tall vun de Minschen mit Corona kladdert in Bremen wieter nah baben

Bremen – De Tall vun de Minschen, de positiv op dat Corona-Virus ünnersöökt worrn sünd, is in’t Land Bremen wieter nah baben kladdert. Dat Gesundheitsamt hett güstern Abend tohoopnahmen 290 Fälle mellt, 20 darvun in Bremerhaben. Twee Bremer sünd middewiel an de Lungenkrankheit sturven. In Neddersassen gifft dat opstunns rund 3-dusend 800 Minschen, de dat Virus hebbt. All wichtige Informatschonen rund üm Corona findt Se bi us in’t Internet op butenunbinnen.de.

USA verlängern Oplagen wegen Corona

Washington – US-Präsident Trump is bang vör zig-dusend Corona-Doden in de USA. Wenn se dat henkregen wörrn, dat de Tall vun de Doden nich op mehr as 100-dusend kladdert, denn hebbt all gode Arbeit maakt, sä de US-Präsident in Washington. He hett ankünnigt, de Oplagen, dat de Minschen nich so veel Kuntakt miteenanner hebben dröfft, bit to’n Enn vun’n April to verlängern. Eegens schull de Oplaag blots bit to’n 30. März gahn. De USA höört to de Länner, de an’n dullsten vun Corona bedrapen sünd.

Krankenhuus in Wolfsborg nimmt nümms mehr op

Wolfsborg – Dat Krankenhuus vun de neddersässische Stadt nimmt erstmal kene nee’en Patschenten mehr op. Mehrere Mitarbeiter hebbt sik mit dat Corona-Virus ansteken. Utnahmen vun‘n Stopp sünd de Nootopnahm vun de Kinnerklinik un de Kreißsaal. Dat, wat se in’t Krankenhuus to’n Schutz daan köönt, hebbt se verbetert. Wolfsborg hett besünners dull mit Corona to kämpfen.

Dat Weer

Un nu een Blick op dat Weer: an den Bremer Flegerhaben 1, in Deefholt 2, an de Fischereehabenslüüs in Bremerhaben 4 un op Spiekeroog sünd dat opstunns 6 Graad. Hüüt sünd erst en paar Wulken mit Regen, toerst ok fakener mit Sneeschuern ünnerwegens. Later ward dat fründlicher mit en beten mehr Sünn un dat blifft meist dröög, bi 7 bit 9 Graad. Tokamen Nacht ward de Heben meist klaar un de Sterns funkelt - or dat ward licht wulkig un dat blifft dröög. Dat Thermometer sackt op plus 1 bit minus 4 Graad. Morrn gaht dat fründlich mit veel Sünnschien wieter un dat is dröög. In’t Binnenland kummt en paar Quellwulken op, de aver keen Regen bringt. Mit 6 bit 8 Graad blifft dat eher köhlig. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Heidi Jürgens.