Plattdeutsche Nachrichten

De Plattdüütschen Narichten vun'n 3. April 2020

Plattdüütsch Narichten vun'n 03. April 2020, [3:49]

Bremer Fachlüüd söken na Medizin gegen Corona-Virus

Bremen: Dat Pharmakoloogsche Institut vun’n Klinik-Dachverband Gesundheit Noord maakt bi en Studie vun de Weltgesundheitsorganisatschoon op de heelen Welt mit. De Bremer sünd sogaar in de eersten Reeg tostännig för den düütschen Deel vun de Studie. Na Informatschonen vun „buten un binnen“ wüllt se vun tokamen Week an veer Medikamente testen, de egens gegen Ebola un dat AIDS-Virus entwickelt worrn sünd.

Tall vun Corona-Infizeerten op de heelen Welt stiggt op een Million

Baltimore: Na Angaven vun de John Hopkins-Universität stahn op de heelen Welt middewiel mehr as een Million Corona-Virus-Fallen op de List. Mehr as 50-dusend Minschen sünd betto wegen dat Virus doodbleven. An’n düchtigsten hett dat de USA drapen, darna folgen Italien un Spanien. As dat Robert-Koch-Institut vermellt, sünd in Düütschland üm un bi 85-dusend Minschen mit den Krankmaker infizeert, un mehr as dusend Lüüd sünd stürven.

Bremen will Studenten un Ünnernehmen hölpen

Bremen: De Bremer Senaat will Studenten mehr Stöhn geven, wenn se dör de Corona-Krise Geldprobleme kregen hebbt. Veele harrn sik to’n Bispill in de Gastronomie wat blangenbi verdeent. Dorüm schall de Darlehensfond vun dat Studentenwark hoochsett warrn. De Studenten, de dat drapen hett, köönt denn en Darlehen vun 550 Euro per Maand ahn Tinsen kriegen – för hööchstens för dree Maand. Ok de Middelstand kriggt Hölp bavento. Ãœnnernehmen mit bet to 50 Mitarbeiders köönt vun hüüt an Andrääg stellen.        

EU schall mehr Druck op Ungarn utöven

Berlin: Europastaatsminister Roth sleiht vör, dat finanzielle Strafen gegen Ungarn wegen de Nootstandsgesetze prööft warrn schüllt. De SPD-Maat säe to de Zeitung „Die Welt“, dat’n dat de Bevölkerung nich verkloren kann, dat Staaten en groden Deel vun ehre Investitschonen mit EU-Geld betahlen, sik denn aver nich an de Prinzipien vun de EU hollen. Roth is dorför, dat bi‘t Beraden över den EU-Huusholt vun 2021 an de Mööglichkeit inricht ward, dat Strafen mit en qualifizeerte Mehrheit utspraken ward. Ok EU-Kommischoonspräsidentin von der Leyen hett seggt, dat se sik Sörgen üm de Situatschoon in Ungarn maakt. Wenn nödig, will de EU-Kommischoon hanneln. De ungaarsche Ministerpräsident Orban hett sik an’n Maandag vun’t Parlament en Bült vun besünneren Vullmachten geven laten.                

Minschenrechtsaktivist Rüdiger Nehberg is doot

Rausdorf: De Minschenrechtsaktivist un Dördriever Rüdiger Nehberg is doot. He is in’t Öller vun 84 Johr doodbleven. Dat is op sien Huuspäädsch vermellt worrn. Bekannt worrn is Nehberg mit sien Överlevens-Törns, bi de he blots vun dat leevt hett, wat he in de Natur funnen hett. He hett sik över Johren ok för de Rechte vun Minnerheiten insett.         

Dat Weer

Un nu en Blick op dat Weer: in Cuxhaben un Bremerhaben 6, an’n Bremer Flegerhaben un in Wittmund 7, un op Langeoog sünd dat opstünns 8 Graad. Hüüt is bi’n Wessel ut Sünn un Wulken ok de en oder anner korte Schuer mööglich. Ok Grisselgrussel kann mal dorbi ween. An de Noordsee schient de Sünn för en längere Tiet. De Temperaturen liggen twüschen 8 un 9 Graad. In de Nacht is de Heven licht wulkig bet wulkenlos. Dat gifft keen Regen. Dat Thermometer fallt op 3 Graad över bet 1 Graad ünner Null. Morgen gifft dat blangen Sünnschien ok en poor Schöönweerwulken, de keen Regen bringen. Dorto kriggt wi Temperaturen twüschen 10 un 12 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.