Plattdeutsche Nachrichten

De Plattdüütschen Narichten vun'n 6. April 2020

Plattdüütsch Narichten vun'n 6. April 2020, [3:17]

Dütschland schall Schutzkledaasch sülfst maken

Berlin – Medizinsche Schutzkledaasch schall wegen de Corona-Pandemie nu mehr in Dütschland maakt weern. Finanzminister Scholz hett ankünnigt, dat Ãœnnernehmen, de in Dütschland wat herstellt, vun’n Staat ünnerstützt ward. De Bund will de Saken seker afnehmen un gode Priesen tahlen. Scholz sä, sowat wüllt se hüüt in’t Corona-Krisen-Kabinett besluten.

Johnson mit Covid 19 in’t Krankenhuus

London – De britische Premier Johnson is wegen Covid 19 in’t Krankenhuus kamen. Snackt ward, dat wees blots ut Vörsicht. Vör tein Daag weer Johnson positiv test worrn, wat anners is nich över sien Gesundheit vermellt worrn. De Queen hett de Briten an’n Abend in en Fernsehanspraak darto opropen, in de Corona-Tieden dörtohollen. Se sä danke to all de Minschen, de in Krankenhüüs un in de Pleeg arbeit un annere ünnerstützen doot.

De Tallen in Italien un  Spanien gaht licht nah ünnen

Madrid – Spanien un Italien hoopt, dat allens en beten beter ward vunwegen Corona. In Spanien is de Tall vun de Doden den drütten Dag naheenanner trüchgahn. Italien hett an’n Abend vermellt, dat de Tall vun de Corona-Fälle siet mehr as twee Weken nich so wenig anstiegen is. De Gesundheitsämter stellt in Utsicht, dat de Minschen bold wedder mehr rutgahn dröfft.

Corona-Tall in’n Land Bremen kladdert nah baben

Bremen – De Tall vun de Corona-Doden in Bremen is op acht nah baben kladdert. In twee Pleegheims is je een Minsch sturven. Güstern sünd blots fief Minschen mellt worrn, de sik nee ansteekt hebbt – dree in Bremen un twee in Bremerhaben. Tohoopnahmen hett Bremen darmit 393 Corona-Fälle, de mellt worrn sünd. 135 Minschen sünd wedder gesund. In Neddersassen liggt de Tall vun de Fälle nu bi knapp över 6000, dat sünd 245 mehr as güstern. 92 Minschen sünd middewiel sturven. Bold jeder veerte is wedder gesund.

Programm vör Hölpslüüd för de Oorn fangt an

Köln – De Lufthansa-Dochter Eurowings fangt hüüt an mit en Programm för Buern, de nödig Hölpslüüd för de Oornt ut Osteuropa bruukt. De Buern köönt in’t Internet angeven, woveel Hölpslüüd ut wecken Lännern se bruukt. Eurowings stellt denn en Sünnerflugplaan tosamen. Darbi arbeit Eurowings mit Rumänien, Bulgarien un Polen tohoop, üm Hölpslüüd nah Dütschland to bringen.

Dat Weer

Un nu een Blick op dat Weer: an den Bremer Flegerhaben 11, op Wangerooge 12, an de Fischereehabenslüüs in Bremerhaben 13 un in Ossenbrügg sünd dat opstunns 15 Graad. Vundaag lacht den helen Dag de Sünn an en blauen Heben ahn een Wulk – bi 19 bit 23 Graad. Tokamen Nacht treckt en paar Wulken dör, mag ween, dar kann hier un dar en beten Regen fallen. Dat Thermometer sackt op 9 bit 7 Graad. Morrn wiest sik erst en paar Wulken, man later kummt wedder överall de Sünn dör un dat blifft meist dröög. Dat ward so’n beten köhler mit 14 bit 19 Graad. Middeweken fründlich un dröög, bi 17 bit 23 Graad. Dat weern de Nahrichten op platt. Peter Behrendt hett se tohoopstellt. Op Platt trechtmaakt un vörleest hett se Heidi Jürgens.