Plattdeutsche Nachrichten

De Plattdüütschen Narichten vun'n 7. April 2020

Plattdüütsch Narichten vun'n 7. April 2020, [3:27]

Johnson op Intensivstatschoon

London: Den britschen Premierminister Johnson hebbt se op de Intensivstatschoon leggt. Teihn Daag vörher harrn se bi em Covid-19 faststellt, as he ehrgüstern in’t Krankenhuus kamen weer. Güstern Avend hett dat in London heten: Mit sien Gesundheit geiht dat bargdaal. De Regerungsgeschäften hett nu Butenminister Raab in de Hand. En Reeg Top-Lüüd vun Staaten un Regerungen hebbt Johnson wünscht, he schall bald wedder op de Been kamen, dor weren ok Kanzlersch Merkel, Frankrieks Präsident Macron un US-Präsident Trump mit bi.

Däänmark: Nich mehr so strenge Regeln

Kopenhagen: In Däänmark nehmt se de strengen Regeln vunwegen Corona en beten wat trüch. So wüllt se de Kinnergoorns vun den 15. April op an wedder apen maken. Dat sä Ministerpräsidentin Frederiksen. De Schoolkinner schüllt bet hen na Klass 5 wedder in den Ünnerricht. Frederiksen sä, dat köönt se aver blots ümsetten, wenn sik nich mehr so veel Lüüd ansteken doot. Güstern harr Öösterriek anseggt: Na Oostern maakt se dor pö a pö de Ladengeschäften wedder op.

Land Bremen: Noch een Corona-Doden

Bremen: In dat Land Bremen gifft dat wedder een Corona-Doden: En Fro vun 83 Johr, de vörher al krank weer, is an dat Virus dootbleven. Dat sä de Gesundheitsbehöörd. Nu gifft dat in Bremen 9 Minschen, de an Corona storven sünd. Ansteken hebbt sik bet nu 395 Minschen, 161 vun de sünd wedder gesund.

Airbus Bremen: Eerstmal allens op Null

Bremen: De Fleger-Bo-Bedriev Airbus boot eerstmal in Bremen un Staad kene Fleger mehr. Airbus seggt: Dat gellt üm un bi dree Weken. De Mitarbeiders schüllt eerstmal Överstünnen gegenreken. Över Kortarbeit verhannelt se opstunns. Woso se nich arbeit? De Bedriev seggt, nich mehr all Saken, de se för den Boo bruukt, köönt anlevert warrn.

Bremen: Füer in Huchten

Bremen: Verleden Nacht hett dat in den Stadtdeel Huchten brennt. Fiev Minschen sünd to Schaden kamen. De Füerwehr seggt: Enige Lüüd ut dat Huus weren op dat Dack krabbelt. Vun dor hett de Füerwehr jüm mit Dreihleddern daalhaalt. Üm un bi 80 Füerwehrlüüd un Redders hebbt in Huchten mitholpen. Woso dat brennt hett, weet se noch nich.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Emm 8 Graad, in Bremen sünd dat 9 un in Ossenbrügge 14 Graad. Vundaag: An’n Vörmiddag treckt eerst noch dichte Wulken dör, mag ween un dat pladdert hier un dor ok noch en beten. Över Dag kriggt aver doch de Sünn de Bavenhand, an‘n meisten an de Küst. Dat Thermometer krabbelt op 13 bet 19 Graad. De Wind dorto weiht flau, an de See ok mehr, vun de noordwesten, later denn vun de noordoosten Kant. Tokamen Nacht: Eerst wenige Wulken, later treckt aver vun Süden her Wulken op. Dat blifft aver dröög. Bi 8 bet 7 Graad. Morgen: Mal Sünnschien, mal Wulken. Dröög bi 13 bet 17 Graad an de Küst un 22 oder 23 Graad in’t Binnenland. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Peter Behrendt.