Plattdeutsche Nachrichten

De Plattdüütschen Narichten vun'n 8. April 2020

Plattdüütsch Narichten vun'n 8. April 2020, [3:45]

Tall vun de Corona-Infektschioon stiggt wedder in Bremen

Bremen: De Tall vun de Lüüd de sik seker mit den Corona-Virus ansteken hebbt is wedder dütlich na baven gahn. 27 sünd nee dorto kamen. Een wieteren Mann is sturven. En poor Fachlüüd ut de Medizin twiefeln de Tallen aver an, de sünd sik nich seker of de so richtig sünd. De Bremer Gesundheitswetenschaftler Glaeske see to buten un binnen: Man schall denn Ünnerscheed ankieken, wo veel Minschen an een Corona-Infektschioon starven un wo veel Minschen starven, wiel de Infektschioon bavento de Krankheiten kummt, de se al hebbt.

Eerstmal kien Kortarbeit op de Loyd-Warft

Bremerhaben: De Loyd-Warft will eerstmal nich, in Tieten vun de Corona-Krise, op Kortarbeit ümstiegen. De Warft seggt: De Opdragslaag löppt noch goot. Un wenn dat doch wegen de Krise knapp warrt, schüllt de rund dreehunnert Mitarbeiters eersmaal jümehr Överstunn afboen, meent de Bedriefsraat. Arbeiders hebbt sik bet nu noch nich ansteeken, heet dat ut de Chefetaasch. An dat Warkstor warrt jedeen Dag bi all Mitarbeiters de Temperatur meet.

Luftbrüch för Schutzkleedaasch

Berlin: Dormit wi gegen den Corona-Virus beter gegenan gahn könnt, hett de Bund een „Luftbrüch“ för Schutzkleedaasch ut China na Düütschland op de Been stellt. Nu kann man jedeen Dag een Passageer-Fleeger, för 25 Tünnen Fracht, na Shanghai un trööch schicken. Dorto kummt, dat af nu dat Ministerium för Verdeffenderen ok övernehmen kann. De Bund will so beweeglich ween, um de Schutzkleedaasch de se kriegen könnt, to köpen un na Düütschland to bringen.

Sommerferien mööglicherwies ruutschuven

Schwerin: De Touristenverband Mecklenburg-Vorpommern hett den Vörslag maakt, de Sommerferien in düt Johr as Utnahm op August un September ruut to schuven. Ok de Bunnslänner, wo de Ferien to´n Bispill al in Juni anfangen, könnt sik denn villicht vun de Flaute in de eersten Maand vun dat Johr 2020 verhalen. Ok de Schölers harrn denn mehr Tiet de Opgaven, de utfullen sünd, optohalen.

Gootschien för Veranstalten de utfullen sünd

Berlin: De Bunnsregerung will Veranstalter un Bedriever in Sport un Kultur hölpen. De Funke-Mediengrupp liggt een Gesettvörslag vör wo binnen steiht, dat de Bedriever in Tokunft ok Gootschiens rutgeven dröfft, anstatt dat Geld wat de Lüüd al berappt hebbt, trööch to betahlen. De Gootschiens könnt denn för dat sülvige Konzert or de Sportveranstalten de laater stattfinnt, aver ok för een annere Veranstalten vun den Bedriever, bruukt warrn.

Dat Weer

Un nu kiekt wi op dat Weer: Opstunns sünd dat in Bremen darteihn Graad, in Willemshaben, Demorst un Bremerhaben sünd dat överall veerteihn Graad. Vundaag wesseln sik Wulken un de Sünn af. Man blots an de Küst sünd dat mehr Wulken as Sünnenschien. Dat blifft meist dröög. De Wind weiht flau vun de süden Kant. Dat Thermometer kladdert op twintig bet veer-un-twintig Graad. Vunnacht sünd dat eerst wenig Wulken, laater rullen vun de Nordsee her dicke Wulkenfeller in´t Land. An Morgen kann dat denn ok drüppeln, bi sess bet acht Graad. Morgen fröh hangt de Heven eerst vull mit Wulken af un an smiet de ok mal Natts vun baven. Laater treckt de na Neddersassen af, achteran seht wi ok wedder de Sünn. Dat Thermometer krabbelt denn op sessteihn bet achtteihn Graad.

Dat weren de plattdüütschen Narichten. Tohoopstellt vun Carola Schwirblatt. Op Platt trechtmaakt un vörleest vun Martina Brünjes.