Plattdeutsche Nachrichten

De Plattdüütschen Narichten vun'n 9. April 2020

Plattdüütsch Narichten vun'n 9. April 2020, [3:50]

Spahn: Eerste Verbotten könen womöglich na de Oosterferien wegfallen

Berlin: De Minister för de Gesundheit Spahn hollt dat för möglich, dat de eersten strengen Corona-Oplagen na de Osterferien to´n Deel wegfallen könen. Bi de Infektschoonstahlen süht dat goot ut. Dat mutt aver op de Duer so ween, see Spahn to dat „Handelsblatt“. In Berlin snackt in en halve Stünn wedder dat Coronoa-Krisenkabinett vun de Bundesregerung. Dorbi draff dat woll ok üm dat Ranholen vun Schutzmasken gahn. Na en Bericht vun NDR, WDR un Süüddüütsche Zeitung will de Bundesregerung düütsche Fabriken mit 40 Millionen Euro ünner de Arms griepen.

Corona-Utbreken in´t Bremer Krankenhuus Links vu de Weser

Bremen. In dat Bremer Krankhuus „Links vun de Weser“ hebbt sick 28 Mitarbeiters mit dat Corona-Virus ansteken. Dat hett de Gesundheitsbehöörd vermellt. Na Informatschoonen vun „buten un binnen“ hannelt sick dat üm Lüüd de in de Pleeg arbeiten doot un Doktors. Kieneen vun de Mitarbeiters hett na den postiven Test wieder in´t Krankenhuus arbeit, verklort de Bremer Klinikverbund GeNo. Nadeem dat mit de Fallen ruutkeem hebbt se mit en kloren Kurs Patschenten un Personaal op dat Virus tes

Flegerproduktschoon bi Airbus wegen Corona-Slamassel kappt

Toulouse. Airbus hett ankünnigt, de Produkschoon vun Flegers för Börgerslüüd üm rund een Drittel daal to setten. Dat markt se böös bi den Middelstreckenjet A320 un bi de Langstreckentypen A330 un A350. Dat vermellt de Konzern. Wo lang de Entscheden gellen schall, weet se noch nich. Vun de Oplaag is ok de Flünkenutstatten in dat Bremer Airbus-Wark bedrapen. Dor hebbt se de Produktschoon eerstmal bit to´n söventwintigsten April gröttstendeels to´n Stoppen bröcht.

Enig op nee Quarantäne-Regeln

Berlin. Bund un Länner sünd sick op graden Weg vör dat Oosterwekenenn över de neen Quarantäne-Oplagen för Lüüd de in dat Land rinkamen enig. Af morgen weern se ümsett. Dormit mööt sick Minschen direktemang nadeem se na Düütschland kamen sünd, in en twee Weken lange Quarantäne in ehr Huus begeven. Verstött se dorgegen, drauhen hoge Straafgelder. Wer to´n Bispill ut sien Huus ruutgeiht, mutt twüschen 500 un 10.000 Euro Straaf betahlen.

Gegenwind an dat Ut för Elsflether Warft

Elsfleth. Dat Ut för de gode ole Elsflether Warft sorgt in de Stadt för Gegenwind. De Bremer Lürssen-Warft harr dat klamme Ünnernehmen eerst in veleden Harvst övernahmen un güstern vermellt, den Standort noch düsset Johr dicht to maken. De Börgermestersch vun Elsfleth Fuchs bekrittelt dat. Lürssen harr vör den Koop all mögliche Nadelen kennt. Ok de Gewarkschop IG Metall beduert dat Dichtmaken. Se findt dat aver goot, dat all eenhunnertdartig Mitarbeiters en Övernehmensangebott vun de Lürssengrupp kriegen schallen.

Dat Weer

Un nu smiet wi en Oog op dat Weer: in Ossenbrügg 14, an den Bremer Flegerhaben, an de Fischreehabenslüüs in Bremerhaben un in Wittmund sünd dat opstunns 12 Graad. Hüüt trecken en poor Wulken na Süüden, dat kann viellicht hier un door en poor Drüppen geven. De Sünn schient jümmer wedder mal. Dat Thermometer wiest en Temeperatur vun 11 bit 19 Graad. De Wind weiht en beten. An de Küst in Maten ut Norden. Tokamen Nacht sünd blots en poor Wulken an´n Heven. Dat blift dröög bi null bit veer Graad. Morrn wiesen sick en poor Wulkenfeller un veel Sünnschien. Dat Thermometer wiest en Temperatur vun negen bit 14 Graad. Ok Sünnavend kloor, later en poor Wulken un viellicht kann dat ok regnen. Dat Thermometer wiest 14 bit 19 Graad.

Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Markus Weise.