Plattdeutsche Nachrichten

De Plattdüütschen Narichten vun'n 14. April 2020

Plattdüütsch Narichten vun'n 14. April 2020, [3:25]

Vörslääg för weniger strenge Regeln kaamt goot an

Berlin: Wat de Wetenschaftsakademie Leopoldina för weniger strenge Regeln wegen Corona vörsleit, kummt meist överall goot an. Forschungsministerin Karliczek hett seggt, dat Papeer is en „allerbeste Grundlaag för de Politik“. In dat Gootachten steiht to lesen: De Scholen schullen, so gau as’t man geiht, wedder apen maakt warrn, un dat eerstmal för Kinner un junge Lüüd, de vun een Schoolform na de anner wesseln schüllt. De Bildungsministers vun Bund un Länner snackt vundaag in en Video-Kunferenz över de Laag.

Frankriek: Corona-Regeln gellt länger

Paris: Veer Weken gellt al, dat in Frankriek nüms vör de Döör dröfft. Bet 11. Mai löppt dat nu wieder. Dat hett Präsident Macron anseggt. He sä, dat maakt se dorum, dat de Krankenhüüs in mehrere Gegenden övervull sünd. Frankriek is een vun de Länner in Europa, de vun Corona an’n meisten afkregen hebbt. Bet nu hebbt se dor knapp 15.000 Corona-Dode tellt.

Nee-York: Mehr un mehr Corona-Dode

Nee York: In den US-Bunnsstaat hett de Corona-Virus för mehr as 10.000 Dode sorgt. Dat sä Gouverneur Cuomo. He meen, de leegste Tiet harrn se nu achter sik. Dat gellt aver blots, wenn de Minschen sik wieder an de strengen Regeln hoolt un nich vör de Döör gaht, so Cuomo.

Arme Länner mööt weniger Schulden trüchbetahlen

Washington: De Internatschonale Währungsfond IWF hett fastleggt: Vunwegen de Corona-Laag mööt 25 vun de armsten Länner weniger vun jümehr Schulden trüchbetahlen. Nich betahlen mööt se in de tokamen söss Maand 500 Millionen Dollar. Goot dorvun hebbt en Reeg Staaten in Afrika un denn Afghanistan, Nepal, Haiti un de Jemen.

Israel: Mehr Tiet, en Regerung opp de Been to stellen

Jerusalem: In Israel hebbt Ministerpräsident Netanjahu un de Böverste vun de Oppositschoon Gantz nu mehr Tiet, en Regerung op de Been to stellen. Präsident Rivlin hett jüm twee Daag mehr geven. Gantz un Netanjahu harrn vörher anseggt: Se weren bi’t Verhanneln goot vörankamen, dat se sik enig warrt, weer al aftosehn. Kriegt se dat nich hen, mööt de Israelis in goot een Johr dat veerte Mal wählen.

Dat Weer

Un woans süht dat mit dat Weer umto ut? Opstunns hebbt wi in Bremen 5 Graad, in Bremerhaven, Kneten un Zeven sünd dat 7 Graad. Vundaag: Vun de Noordsee her treckt vele Wulken dör, man de smiet blots af un an mal en poor Druppen daal. Meist överall blifft dat dröög, un twüschendör lockert dat ok mal op un wi kriegt de Sünn to sehn. Dat Thermometer kummt nich över köhlige 8 bet 10 Graad rut. De Wind dorto weiht flau oder en beten mehr, an de See ok frisch un in Böen, vun de noordwesten Kant. Tokamen Nacht: De Wulken lööst sik pö a pö op. Un dat blifft dröög. Bi 6 bet 2 Graad. Morgen: Meisttiets kriggt de Sünn de Bavenhand, mit blots en ganz poor Wulken an’n Heven. Wedder wat warmer mit 13 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Jan Siegert.