Plattdeutsche Nachrichten

De Plattdüütschen Narichten vun'n 16. April 2020

Plattdüütsch Narichten vun'n 16. April 2020, [3:39]

Erste Lockerungen vun de Corona-Regeln fastleggt

Berlin: Bund un Länner hebbt sik op erste Oplockerungen bi de Corona-Inschränkungen enigt. Ok dröfft Ladens mit bit to 800 Quadratmeters an Grötte vun kamen Weeken an wedder ehre Dören op maken. Man blots wenn se de Oplagen för de Hygiene inhollen könnt. Ladens för Böker, Fohrrööd un Autos dröfft ok wedder verköpen, egal wo groot se sünd. Gasthüüs un Kneipen blifft to. Scholen un Hoochscholen schüllt vun´t 4. Mai an Schritt för Schritt wedder op maken. Man de Hannel un dat Gastgeschäft harrn sik mehr „locker maken“ wünscht.

Bremen will Platz för´t Not-Kinner-Oppassen utwieden

Bremen: Dat Not-Kinner-Oppassen in Bremer Kitas un Scholen schall, vunwegen de Corona-Krise, grötter makt warrn. Dat hett de Börgermester Bovenschulte kund geven. Opstunns sünd an de 1000 Kita- un Schoolkinner in de Stadt in de Not-Opsicht. Dor willt se nu nich mehr ganz so pingelig sien, un de stregen Regeln son´n beten oplockern. Man all in all mööt de Kitas noch dicht blieven. Ok de Kinner in de Grundscholen mööt erst noch vun Huus ut lehren. Dor schüllt blots erst de Kinners ut de veerten Klassen, vun´t 4. Mai an, wedder to School.

Meyer Warft rekent mit inbreken vun de Opdräge för Krüüzfohrer

Papenbörg: De Meyer Warft geiht mit de Produktion vun de Krüüzfohrer, vunwegen de Corona-Krise, na unnen. Luut Weigend, de de Geschäften föhrt, schüllt blots noch twee or dree Schippe in´t Johr de Warft vertlaten. Dat Unnernehmen geiht dorvun ut, dat se bit tominnst 2023 keene nee`en Opdräge kriggt. Ok denkt se över Kottarbeit un Afbo vun Stellen na. De Meyer Warft hett rund 3600 faste Mitarbeiders.

Veer Verletzte bi Füer in Veern

Veern: Bi een Füer in een Huus för mehr Parteien sünd veer Minschen bi to Schaden kamen. Luut Polizei is dat Füer an´t Avend in de erste Etage utbroken. All Lüüd, de dor wohnt, sünd noch to de rechten Tied vun de Naverslüüd or de Füerwehr in Sekerheit bröcht worrn. Veer Minschen hebbt se in´t Krankenhuus bröcht. In dat Huus kann man to´n Deel nich mehr wahnen. Worüm dat brennt hett is noch nich klor.

Bremerhabener Baketballer willt nu doch opstiegen

Bremerhaben: De Iesboren willt nu doch wedder in de 1. Basketball-Bunnsliga trüch. Nadem se de Saison afbroken hebbt staht de Bremerhabener nu op den tweeten Platz in de Tabelle. Se hebbt sik somit dat Recht optostiegen sichert. Wiel de Vereen grotte finanzielle Probleme harr, woll he egentlich in de 2. Liga blieven. Nu hett de Vereen man doch de Lizenz för de 1.Liga beandragt. Luut Iesboren Boss Nils Ruttmann hebbt sik de Finanzen nu doch positiv entwickelt. Ok hebbt se de Hürden för eene Lizenz dör de Corona-Krise daalsett.

Dat Weer

Un nu een Blick op dat Weer: An den Bremer Flegerhaben, an de Fischreehabenslüüs in Bremerhaben un in Achim 10 Graad un op Langeoog sünd dat opstunns 11 Graad. Hüüt hebbt wi veele Wulkenfeller an´t Heven , man de Sünn lacht us an un dat blifft dröge, bi 12 bit 18 Graad. Tokamen Nacht blots een paar Wulken, keen Regen. Dat Thermometer sackt op 3 bit 2 Graad.  Morrn schien den ganzen Dag de Sünn för us. Dor sünd blots een paar lütte Wulken to sehn, bi 11 bit 16 Graad. An Sünnavend is dat jüst so schön. Sünnenschien den ganzen Dag un dat ward wedder warmer, bi 15 bit 19 Graad. Dat weern de Nahrichten op platt. Gabriele Intemann hett se tohoopstellt. Op Platt trechtmaakt un vörleest hett se Antje Kruppa.