Plattdeutsche Nachrichten

De Plattdüütschen Narichten vun'n 20. April 2020

Plattdüütsch Narichten vun'n 20. April 2020 , [3:18]

Vele Lädens in Dütschland drööft wedder open maken

Bremen – In Dütschland ward de ersten Oplagen vunwegen Corona lockert. In de meisten Bunneslänner dröfft Ladengeschäfte bit to en Grötte vun 800 Quadratmetern de Dören wedder open maken. In Bremen ward dat woll rund 3.200 Ladens sien, taxeert de Senat. Dar ward darto raden, binnen in de Ladens en Mundschutz to drägen, ok in Bussen un Bahnen. In Kinnergorn un Grundscholen in’n Land Bremen gifft dat mehr Noot-Oppasser. Gasthüüs un Nacht-Lokale blifft dargegen to.

Se snackt wieter över mehr Kortarbeitergeld

Berlin – Na Bunnesarbeitsminister Heil hett sik nu ok de Ministerpräsidentin vun Mecklenborg-Vorpommern, Schwesig, darför stark maakt, dat Kortarbeitergeld för en Tied höger to setten. De SPD-Politikerin sä to de Zeitungen vun de Funke-Mediengrupp, dat wees en godet Signal för de Lüüd ut‘n Tourismus un de Gastronomie. Union un FDP snackt aver dargegen an. Bi’n Kortarbeitergeld kriegt de Arbeiters in’n Momang 60 Perzent vun’t Nettogehalt, Arbeiters mit Kinnern kriegt 67 Perzent.

Krankschrieven an’t Telefon geiht nich mehr

Berlin – Arbeiternehmer, de sik wegen en Snööv krank schrieven laten wüllt, mööt vun hüüt an wedder to’n Doktor gahn. Krank schrieven laten an’t Telefon geiht nich mehr. Düsse Utnahm weer Midde März besluten worrn un is güstern to Enn gahn. De tostännige Bunnesutschuss hett de Regel nich verlängert, obschons Gesundheitspolitiker, Gewarkschuppen un Verbrukerschützer darop drängt hebbt.

Corona maakt hoge Kosten bi’n Bremer Klinikverbund

Bremen – Op den Bremer Klinikverbund GeNo kummt hoge Kosten to. Snackt ward vun en tweestelligen Millionenbedrag un Gesundheitssenatorin Bernhard vermellt, jo, dat stimmt. An’n Namiddag ward de GeNo-Böversten erste Tallen to de Folgen vun de Corona-Pandemie verkünnen. Wiel Operatschonen, bi de dat nich um Leven un Dod geiht, verschuven worrn sünd, verdient de Krankenhüüs weniger Geld. Buterdem köfft de GeNo tosättlich Intensiv-Bedden mit Geräden to’n Beatmen. Düsse Utgaven ward nich heel un deel dör Bunnesmiddel afdeckt.

Mann in Kanada bringt tominnst 16 Minschen üm

Ottawa – In’n Osten vun Kanada schall en Mann tominnst 16 Minschen ümbröcht hebben. As de Polizei vermellt, hett de 51-jöhrige ut en Auto rutfüert, dat as gröne Minna tarnt worrn weer. Na dat se achter em herjachtert sünd, hett de Polizei em an en Tankstäe doot schaten. Woso de Kierl dat daan hett, weet noch nümms. En Spreker vun de Polizei sä, mag ween, un he hett sik en paar vun sien Opfer tofällig utsöcht.

Dat Weer

Un nu een Blick op dat Weer: op Wangerooge 8, an den Bremer Flegerhaben, an de Fischereehabenslüüs in Bremerhaben un in Bremervöör sünd dat opstunns 10 Graad. Hüüt lacht de Sünn vun fröh bit laat, Wulken kummt meist nich op, bi 15 bit 18 Graad. Tokamen Nacht wieter klaar un dröög, dat Thermometer sackt op 7 bit 8 Graad op de Eilanden un bit to 4 Graad in’t Binnenland. Ok morrn schient den helen Dag de Sünn, darbi is dat jümmer noch dröög. Dat ward en beten wärmer bi 16 bit 19 Graad. Middeweken un Donnerdag ännert sik dat Weer meist nich bi 16 bit 21 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Heidi Jürgens.