Plattdeutsche Nachrichten

De Plattdüütschen Narichten vun'n 22. April 2020

Plattdüütsch Narichten vun'n 22. April 2020, [4:07]

Maskenplicht: Weil is genervt vun wegen dat ielige vörangahn vun dat een or annere Land

Hannover: Dat een or annere Land is, vunwegen de Maskenplicht vörutprescht, dat bekriddelt Neddersassens Ministerpräsident Weil. Dat nervt em, see he güstern Avend in´t ZDF. Man eerst vör fief Daag hebbt all Ministerpräsidenten tohoop seeten. Een weet nix wat nee is, dat geev man blots en beten Druck ut de Sellschop. He see ok: För sien Bunnsland warrt dat ok een Regelung geven. In Bremen gellt opstunns noch keen Maskenplicht – man blots den Raat, bie´t Inkööpen un in Bus un Bahn een Mundschutz to dregen. An´n Freedag will de Senaat nochmal över dat Thema snacken.

Debatt över högeret Kortarbeidergeld geiht wieder

Berlin: Ehrder de Sitzung vun den Koalitschionsutschuss los geiht, wo se över de Corona-Krise snackt, warrt wieder doröver snackt of se dat Kortarbeidergeld höger setten schüllt. De SPD verlangt, dat Kortarbeidergeld een Tiet lang vun sesstig bet op möögliche sebenunachtig Perzent, vun dat Nettogeld wat de Lüüd nu nich mehr kriegt, na baven to setten. De Metall-Arbeitgever wahrschaun vör düt Hoochsetten. Jümehr Menung is, dat denn wietere Lüüd ehr Arbeit verleern un Pleiten drauhen. De Toplüüd vun CDU, CSU un SPD snackt an Namiddag över de aktuelle Corona-Laag un wo se de Kröögers un Weertslüüd aver ok den Studenten hölpen könnt.

Grööne verlangt Corona-Öllerngeld

Berlin: De Gröönen verlangt een Extra-Öllerngeld in de Corona-Krisentiet. Dat schall för Mudders un Vadders gellen, de Nadele vunwegen dat Toschluten vun Kinnergoorns un Schoolen hebbt. Gröönen-Fraktschionsvize Dörner seggt to de „Welt“: Öllern bruukt för de ganze Tiet vun de Utnahmsituatschion een finanziellen Utgliek op den se sik verlaaten könnt. In Momang kriegt Öllern vun´n Staat bet to seben-un-sesstig Perzent vun ehren Lohn, wenn se Kinner ünner twolf Johrn tohuus betüddelt un dorum Minus bi jümehrn eegentlichen Lohn maakt. Düsse Regelung gellt denn aver blots för sess Weken.

US-Senaat seggt Ja to een wieder Konjunkturpakeet in Höögde vun Milliarden

Washington: De US-Senaat hett, wieldess de Corona-Krise löppt, to een wieder Hölpspakeet ja seggt. Dorbi geiht dat um rund fiefhunnert Millarden Dollar. En grooten Deel dorvun wüllt se lütte un middelgroote Ünnernehmen geven. Dat Geld schall Bedrieven dorbi hölpen, dat se jümehr Mitarbeiders wieder Geld betahlen könnt. Opletzt will de Regierung dormit gegen den dütlichen Anstieg vun Lüüd ahn Arbeid angahn. Nu mutt sik dat Repräsentantenhuus mit dat Rettungspakeet ut´nanner setten.

Ministersch för´t Verdeffenderen gifft Utkunft över Waffenhannel, den veel Lüüd bekriddelt

Berlin: Ministersch för´t Verdeffenderen Kramp-Karrenbauer verklort just, den Utschuss för´t Verdeffenderen in Bunnsdag, ehre Plaans zig US-Kampffleeger to köpen, wat veel Minschen bekriddeln. De Oppositschion smiet ehr vör: Se hett gegenöver de USA ehr Afsicht den Koop aftowickeln wiest, ehrder se mit den Bunnsdag doröver snackt hett. Ehr Ministerium striert af, dat de Ministersch bet nu dat afköpen toseggt hett. An verleden Wekenenn geev dat veel hen un her vunwegen de Naricht: Kramp-Karrenbauer harr de USA de Fleegers al in Opdrag geven.

Dat Weer

Un nu kiekt wi op dat Weer: Opstunns sünd dat in Bremerhaben un Willemshaben 12 Graad, in Bremen un Demorst 13 Graad. Vundaag schient meist de Sünn un dat blifft dröög. Wulken sünd raar. De Wind weiht flau or in Maaten, an de Küst ok mal frisch bet stark böig vun de nordoosten bet oosten Kant. Dat Thermometer kladdert op sessteihn bet een-un-twintig Graad. In de Nacht seht wi de Steerns an Heven un dorum fallt ok gor keen Regen, bi acht bet fief Graad. Morgen lacht den ganzen Dag de Sünn, af un an wannert mal een dünne Wulk vörbi. Dat blifft dröög bi achteihn bet veer-un-twintig Graad.

Dat weren de plattdüütschen Narichten. Tohoopstellt vun Anja Guse. Op platt trechtmaakt un vörleest vun Martina Brünjes.