Plattdeutsche Nachrichten

De Plattdüütschen Narichten vun'n 23. April 2020

Plattdüütsch Narichten vun'n 23. April 2020, [3:53]

Merkel seggt wat to de Corona-Krise

Berlin: Bunnskanzlersche Merkel hett in’n Bunnsdag en Regerungs-Verkloren to de Corona-Krise afgeven. Se hett dorbi noch mal wedder besünners dorop henwiest, dat dat hoochnödig is, sik an de Schutzregeln to hollen, dormit de Gesundheitssysteme nich överlastet warrn. In de Sitten debatteern de Afordneten nu över dat, wat se gegen Corona doon wüllt. Besünners düchtig ward se woll över de Fraag diskereern, wannehr un wo düsse Regeln wedder lockert ward.

Hölpspaket: Mehr Stöhn in de Corona-Krise beslaten

Berlin: De Böversten vun de Groden Koalitschoon hebbt nee’e milliardendicke Hölpsgelder in de Corona-Krise beslaten. So schall dat Kortarbeidergeld hoochsett un länger betahlt warrn. För de Gastronomie, de dat besünners hart drapen hett, wüllt se de Stüern daalsetten. Schölers, de dat nödig hebbt, schullen en Toschuss vun 150 Euro kriegen, dormit se bi’n digitalen Ãœnnerricht mitmaken köönt. CDU-Böverste Kramp-Karrenbauer is mit dat, wat nu beslaten worrn is, bannig tofreden. De SPD-Vörsitter Walter-Borjans säe, dat sik dat lohnt harr, dat se so düchtig diskereert hebbt.

Nee-Infektschonen: Ãœm un bi 670 Corona-Süke in’t Land Bremen

Bremen: In’t Land Bremen gifft dat 48 nee’e Corona-Infektschonen. De mehrsten dorvun sünd na Menen vun dat Gesundheitsressort op Tests trüchtoföhren, de in de Landsopnahmesteed in Vegesack för Lüüd, de op de Flucht weern, maakt worrn sünd. Dor sünd wietere 30 Minschen positiv test‘ worrn. De Behöörd mellt, dat in’t Land Bremen betto mehr as 16.500 Lüüd den Test maakt hebbt, wat opstünns meist 300 Tests in’n Snitt per Dag bedüdt. All tohoop gifft dat in’t Land Bremen nu 673 Corona-Süke.

Grootfüer in Olenhuus in Sieke

Sieke: En Heim för oole Lüüd in Sieke is wegen en Füer an’n Avend nich mehr to bruken. De mehrsten vun de 64 Bewahners sünd unversehrt bleven. En poor hebbt vun de Rook wat afkregen un sünd behannelt worrn, säe en Spreker vun de Füerwehr. De Bewahners sünd nu eerstmal in’t Krankenhuus in Bassum. Dat Füer schall woll in de Köök vun dat Olenhuus opbluckt ween. Woran dat nipp un nau leeg, is betto noch nich kloor.                 

Radio Bremen-Programme bet middags ünnerbroken wegen Arbeiten an’n Funktoorn

Bremen: Wiel de Funktoorn in Walle in de Reeg hollen ward, sünd noch bet to’n Middag en poor Radio Bremen-Programme nich to höörn. Plaant is, dat de Toorn bet fief Minuten vör een middags afstellt blifft. Dat geiht üm de UKW-Frequenzen un dat Utstrahlen över DAB PLUS. Vun fief Minuten na ölben an fallt ok de TV-Empfang över DVB-T2 ut. De Empfang över Satellit, Kabel un Internet is dorvun nich bedrapen. Wecke Sender dat angeiht, steiht ok op butenunbinnen.de.           

Dat Weer

Un nu en Blick op dat Weer: in Cuxhaben 11, an’n Bremer Flegerhaben un Bremerhaben 14, un in Veern sünd dat opstünns 16 Graad. Hüüt schient utgiebig de Sünn. Höchstens dünne un lockere Wulken sünd to sehn. So blifft dat dröög, un de Temperaturen liggen bi 18 bet 23 Graad. In de Nacht trecken vun de Noordsee her lockere Wulkenfeller över Bremen weg. Regen gifft dat aver keen. Dat Thermometer fallt op 9 bet 7 Graad. Morgen sünd eerst noch Wulkenfeller an’n Heven to sehn. De trecken aver gau to’n Middellandkanaal hen af. Darna schient för en längere Tiet de Sünn, ehrdat an’n Avend wedder en poor Wulken mehr vun de See her optrecken. Dat ward köhler mit 13 bet 19 Graad.

Dat weern de Narichten op platt. Tohoopstellt hett se Peter Behrendt. Op Platt trechtmaakt un vörleest vun Marc Gelhart.