Plattdeutsche Nachrichten

De Plattdüütschen Narichten vun'n 24. April 2020

Plattdüütsch Narichten vun'n 24. April 2020, [3:48]

EU plant Billionen-Programm gegen Corona-Wirtschaftsslamassel

Brüssel. De EU plant Billionenutgaven, üm dat Corona-Wirtschaftsslamassel optofangen. Dat EU-Drapen hett en 500-Milliarden-Hölpspaket un en Wedderopbo-Kapitalanlaag mit noch eenmal 1.000 Milliarden Euro afnickt. To enkelte Punkte gifft dat aver noch mehrere Menen. EU-Kommischoonsbaas von der Leyen will nu bit to de Mitt vun Mai en Modell utarbeiten, to dat all Mackers ut de EU-Länner tostimmen könen. Italien, Frankriek un Spanien verlangen gemensame EU-Schulden, Bundeskanzlersch Merkel lehnt dat klipp un kloor af.

Bremer Senat will Maskenplicht afnicken

Bremen. De Senat will dat Dregen vun en Schutz över Mund un Nees in Ladens as ok in Bussen un Bahnen besluten. Dat schall af Maandag gellen. Kinner ünner söven Johren brukt dat nich. Dorbi kann dat en Gesichtsmask aver ok en Schaal or en Dook ween. De Senat will ok af Sünnavend in Sportanlagen dat Öven aleen, to tweet or in de Familie tolaten. Aver blots bi Sportaarten mit wenig or kien Kontakt mit den Lief. Dat is to´n Bispill Joggen, Tennis or Golf.  

Luftbrüch warrt instellt

Kapstadt/ Berlin. De Flöög vun de Bundesregerung, üm wegen dat Corona-Slamassel Touristen trüch to halen – de jichtenswo op de Welt liggen blieven sünd – warrt instellt. De Luftbrüch hett knapp fief Weken duert. All tohoop sünd üm un bi 240.000 Minschen trüch holt wurrn. De letzte Maschin hoov an´n Avend in dat süüdafrikansche Kapstadt mit üm un bi 300 Fohrgäst an Boord in Richtung Düütschland af. Wieder kümmern sick nu weltwiet de düütschen Botschaften üm enkelte Fallen.

Wohrschau vör Mail-App op Iphone un Ipad

Berlin. Dat Bundesamt för Sekerheit in de Informatschoonstechnik hett vör de Mail-App op Apples iPhone un iPad wohrschaut. Dat heet, se hett twee leege Sekerheitslücken. De makt dat möglich, dat Frömde an en groden Deel vun de Mail – Kommunikatschoon op de Reedschop wat ännert. Dusende iPhones un Ipads sünd in Ogenblick in Gefohr. Dat Bundesamt raadt, de App vun de Reedschop to löschen, bit Apple de Malschen ut de Welt bringt hett.

Schipp mit Windkraftanlaag tosamenstött

Borkum. En Schipp is vör dat Nordsee-Eiland Borkum mit en Windkraftanlaag tosamenstött. Dree Lüüd vun de Mannschaft hebbt sik wat doon - en dorvun swor. Een Helikopter floog twee verletzte Lüüd in Krankenhüüs. Dat vermellt de Düütsche Gesellschop för dat Redden vun een, de Malöör mit´n Schipp hett. Dat ünner nedderlännischer Flagg fohrende Schipp stött also in den Offshore-Windpark „Borkum Riffgrund Een“, gegen en Anlaag.

Dat Weer

Un nu een Blick op dat Weer: in Wittmund 13, an den Bremer Flegerhaben 15, an de Fischreehabenslüüs in Bremerhaben 14 un in Demorst sünd dat opstunns 16 Graad. Hüüt sünd toeerst noch Wulkenfeller an´n Heven, de aver gau över de Wümm un Aller aftrecken. Dorna schient de Sünn, bit an´n Avend wedder n´poor mehr Wulken vun de See kamen. De Nordwestwind weiht in Maten, an de See ok frisch un stark böig. Dat Thermometer wiest en Temperatur vun 12 bit 18 Graad. Tokamen Nacht trecken Wulkenfeller vun de See op un makt den Heven dicht. Dat blifft aver dröög bi fief bit söven Graad. Morrn is dat hell, aver en poor dichte Wulkenfeller könen vörbi trecken. Dat Thermometer wiest en Temperatur vun 12 bit 16 Graad.  Sünndag schient de Sünn bi 11 bit 15 Graad.

Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Markus Weise.