Plattdeutsche Nachrichten

De Plattdüütschen Narichten vun'n 28. April 2020

Plattdüütsch Narichten vun'n 28. April 2020

Reeg vun Pleiten för Ladengeschäften in Düütschland

Berlin: De Eenzelhannel in Düütschland wohrschaut: Wegen Corona kunnen vele Geschäften bankrott gahn. De Hannelsverband HDE rekent dormit, dat bet 50.000 Ünnernehmen nich mehr noog Geld hebbt. Koophüüs, de nich Eten un Drinken verkööpt, harrn bet nu üm un bi 30 Milliarden Euro weniger ümsett, meen Verbandsbaas Genth gegen de Zeitungen vun de Funke Mediengrupp. De Händlers sünd bang: De Binnenstädte kunnen na de Pandemie nich mehr so utsehn as vörher.

Bremen Fonds gegen Corona

Bremen: In den Bremer Senat snackt se över en Milliardenpaket gegen Pandemie-Schaden. In dat Paket sünd binnen: Hölp för de Wirtschaft, Geld för Medizin-Utrüstung oder ok Toschüss för den Arbeitsmarkt. Buten-un-binnen hett to weten kregen: Eerstmal geiht dat üm 1,2 Milliarden Euro. Dor mütt Bremen Geld för opnehmen. Ok wenn se egentlich kene Schulden maken dröfft, köönt se dat bi en groot Malöör as Corona liekers maken.

Ne’e Straafgeldlist för Autofohrers

Berlin: De to gau fohrt, eenfach den Rettungsweg nimmt oder sien Wagen op en Radweg afstellt, op den kaamt strengere Strafen to. Dat regelt en ne’e Straafgeldlist för Autofohrers, de vun hüüt op an in Düütschland gellt. De in en Gemeen 21 Stünnenkilometer to gau is, kriggt nu 80 Euro Straafgeld, een Punkt un een Maand lang mütt he sien Föhrerschien afgeven. Buten de Oortschaften liggt de Grenz bi 26 Stünnenkilometer. Nee is ok: Bi’t eerste Mal al kann de Föhrerschien een Maand lang introcken warrn. Mit de neen Regeln schall de Stratenverkehr vör allen för Lüüd op’t Rad un to Foot sekerer warrn.

Wohrschau op Reisen blifft woll bestahn

Berlin: Bunnsbutenminister Maas rekent dormit, dat dat Wohrschau op Reisen noch länger blifft. In dat ZDF sä he: Bet nu gellt dat bet tokamen Sünndag. Man dat süht nich so ut, as wenn sik an de Laag veel ännert harr. Afsünnerlich, wo een in anner Länner gor nich rinkümmt un dor ok nüms utgahn dröfft. Maas hett kloor maakt: Düssen Sommer süht de Urlaub bi jeedeen wiss nich so ut as jümmers.

AWO wohrschaut: Gewalt in de Familie

Ollenborg: De Arbeiterwollfohrt in de Werser-Ems-Gegend wohrschaut: Gewalt in de Familien warrt mehr. Un dor köönt se helpen. De Laag is opstunns bi vele Familien mit Kinner knapp noch to’n Utholen. Dat seggt de AWO-Steed för’t Beraden vun Familien in Ollenborg. Bavento maakt sik vele Lüüd Sorgen üm dat Geld un dorüm, woans dat wiedergeiht. Dorüm kunn een bi de AWO anropen un üm Raat fragen.

Dat Weer

Un woans süht dat mit dat Weer umto ut? Opstunns hebbt wi in Harlesiel 9 Graad, in Bremerhaven un Staad sünd dat 11 Graad un in Bremen 12 Graad. Vundaag: Eerst noch lockere Wulken un ok mal Sünnschien. Gegen Middag treckt de Heven aver dicht, un denn pladdert dat ok. In Bremen kann dat aver bet na’n Avend hen dröög blieven. Dat Thermometer krabbelt nich mehr ganz so hooch: blots noch op 11 bet 18 Graad. De Wind dorto weiht flau, an de See ok en beten mehr, vun de noordoosten bet oosten Kant. Tokamen Nacht: Massige Wulken, de ok mal Regen daalsmiet. Bi 10 bet 8 Graad. Morgen: Wedder Wulken över Wulken. Dat kann ok Regen geven, mag ween ok mit Blitz un Dunnerslag. Gegen Avend kriggt de Sünn wedder de Bavenhand. Dat Ganze bi köhlige 12 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Kartin Martens.