Plattdeutsche Nachrichten

De Plattdüütschen Narichten vun'n 29. April 2020

Plattdüütsch Narichten vun'n 29. April 2020, [3:01]

Kinnergoorns schüllt Stapp för Stapp wedder opmaken

Berlin. Bunn un Länner hebbt sik eenigt: Kinnergoorns warrt Stapp för Stapp wedder opmaakt. Plaant hebbt se veer Afsnitte. Dat fangt an mit den Notfalldeenst. Achteran schüllt jümmer mehr Kinner wedder in den Regelbedrief, seen de Familienminister. Wenehr dat los geiht hebbt se aver noch nich seggt.

Füerwehr hett wieder mit dat Füer in Bremen to doon

Bremen. Dat Füer bi den Holthannel in den Bremer Industriehaben is jümmers noch nich ut. Al in den fröhen Morgenstünnen harrn sesstig Füerwehrlüüd dormit to doon, dat Füer doot to kriegen. Op de Flach harrn för een Tiet lang teihn Lagerhallen brennt. Worum dat Füer utbroken is, weet bet nu noch nüms.

Bremer Schoolen blieven eerstmal in´n Corona-Bedrief

Bremen. In dat lüttste Bunnsland Bremen warrt dat tominnst bet Sommer kien normaalen Schoolbedriev geven. Dat Billungsressort seggt: All Schölers schüllt aver tominns mit een bestimmte Stünnentahl ünnerricht kriegen, dat gellt för de Hauptfächer. An tokamen Maandag geiht dat för de veerten Klassen los. Wenehr de Schoolklassen een bet dree natrecken könnt, is noch nich kloor.

Berlin plaant dat wohrschaun för Reisen wieder lopen to laten

Berlin. De Bunnsregeerung will ehr wohrschaun för Reisen op de ganze Welt, vunwegen Corona, wieder lopen laten. De Henwies schüllt nu bet Midde Juni gellen. Dat vermellt dat Narichtenblatt „De Spegel“. Vör den veerteihnten Juni schall de Laag denn nochmal nee besnackt warrn. Dörför wüllt sik denn woll de Staaten vun de Europääsch Union goot afstimmen.

Frankriek maakt Sluss mit de eersten Football-Liga

Paris. De eerste franzöösch Football-Liga bringt den Speelbedrief, vunwegen den Corona-Slamassel, nich toenn. Dat see Premiereminister Philippe. Bet tominns September dröfft dorum ok Spele ahn Tokiekers nich utricht warrn.

Dat Weer

Un nu kiekt wi op dat Weer. Opstunns sünd dat in Bremerhaben un Demorst negen Graad, in Bremen teihn un Veern sünd dat olben Graad. Vundaag hangt de Heven vull dicke Wulken un dat pladdert jümmer mal wedder. An Namiddag un fröhen Avend gifft dat kräftige Regenschuer. Vun Tiet to Tiet kiekt aver ok mal de Sünn dör de Wulken. De Wind weiht flau eerst vun de oosten later denn vun de westen Kant. Dat Thermometer kladdert op twolf bet sessteihn Graad. In de Nacht sünd man eerst wenig Wulken ünnerwegens, later sünd denn aver Regenwulken dorbi. De Temperaturen ännern sik meist nich bi teihn bet acht Graad. Morgen sünd veel Wulken ünnerwegens un dat pladdert jümmer wedder. An Namiddag bet na´n Avend hen, warrn de Wulken weniger un de Sünn kiekt wedder vörbi. Dat Thermometer wiest us denn twölf bet foftein Graad.

Dat weren de plattdüütschen Narichten. Tohoopstellt vun Jan Siegert. Op platt trechtmaakt un vörleest vun Martina Brünjes.