Plattdeutsche Nachrichten

De Plattdüütschen Narichten vun'n 4. Mai 2020

Plattdüütsch Narichten vun'n 4. Mai 2020, [3:15]

Putzbüdels maakt wedder op

Bremen: Jüst so as in heel Düütschland gifft dat ok in Bremen un Neddersassen wietere Lockerungen in de Corona-Krise. Vun hüüt an gahn de Veertklässler wedder in de School. In Bremen geiht dat bavento ok för Schöler wedder los, de in’t tokamen Johr Abitur maakt. Ok de Putzbüdels dröfft vun hüüt an wedder opmaken, man dor gellen strenge Vörschriften, wat de Hygiene angeiht. De Friseurinnung Bremen is aver bang, dat dat nich all de Salons överstahn warrn, dat se in de Corona-Krise so lang dicht harrn.

Wietere Corona-Infekschonen in’t Land Bremen

Bremen: In’t Land Bremen hebbt de Behörden an’n Avend 18 wietere Corona-Infektschonen mellt, een dorvun in Bremerhaben. Dormit is de Tall vun Infekschonen op 893 stegen. Meist 440 Lüüd sünd wedder gesund. In Neddersassen is de Tall op 10.386 Minschen, de as infizeert mellt worrn sünd, hooch gahn. Dat sünd na Utkunft vun de Behörden 42 mehr as an’n Dag tovör. Dree Minschen mit Corona sünd siet Sünnavend doodbleven, all tohoop sünd mehr as dree Viddel wedder gesund.

Nordrhein-Westfalen drauht mit Alleengang bi’t Opmaken vun Kitas

Düsseldörp: De Landsregeern vun Nordrhein-Westfalen hett bi dat Opmaken vun de Kitas in de Corona-Pandemie drauht, dat se ehren egen Weg gahn ward. Se wöörn sik nich noch en Week henhollen laten, säe NRW-Familienminister Stamp in en Bidrag vun’n Journalisten Steingart. Twars schullen sik de Erzieher seker föhlen, op de anner Siet mööt de Kinner aver ok gau wedder in de Kita. Övermorgen snacken Bund un Länder över wietere Lockerungen.  

Sammeln vun Geld op de heelen Welt för Corona-Gegenmiddel

Brüssel: Op de heelen Welt wüllt veele Länder tominnst 7,5 Milliarden Euro för Impfstoffe un Medizin gegen Corona sammeln. So wüllt se de Gegenmiddel gau un günstig op den Markt bringen. Bunnskanzlersche Merkel schall en dreestelligen Millionenbedrag toseggt hebben. De USA sünd eerstmal nich dorbi.

„Mien Schipp 3“ blifft in Quarantään

Cuxhaben: De „Mien Schipp 3“ blifft för’t Eerste wieter in’n Haben ünner Quarantään. Dat hett de Rederee künnig maakt. An Bord vun den Krüüzfohrer sünd meist 3000 TUI-Mitarbeiders. Een Maat vun de Mannschaft is positiv op Corona test worrn. Egentlich schull de „Mien Schipp 3“ Cuxhaben an’n Avend in Richtung Düütsche Bucht verlaten.  

Dat Weer

Un nu en Blick op dat Weer: in Ossenbrügge 9, in Bremerhaben 10, an’n Bremer Flegerhaben 11 un in Osterholt-Scharmbeck sünd dat opstünns 12 Graad. Hüüt is dat vörmiddags af un an noch wulkig, aver dröög. An’n Namiddag schient meisttiets de Sünn bi 11 bet 15 Graad. In de Nacht köönt sik Wulkenfeller mit hogen Daak utbreden. Afsiets dorvun is dat aver licht wulkig oder kloor, un dat blifft överall dröög. Dat ward frisch bi 6 bet 2 Graad un kann ok Boddenfrost geven. Morgen köönt in de Fröh un vörmiddags Wulkenfeller de Sünn verdecken, ehrdat se an’n Namiddag mehr un mehr dörkummt. För düsse Johrstiet ward dat’n beten to köhl mit 12 bet 15 Graad.

Dat weern de Narichten op platt. Tohoopstellt hett se Carola Schwirblat. Op Platt trechtmaakt un vörleest vun Marc Gelhart.