Plattdeutsche Nachrichten

De Plattdüütschen Narichten vun'n 6. Mai 2020

Plattdüütsch Narichten vun'n 6. Mai 2020, [3:55]

Bund will Corona-Oplagen wieder to´n Deel wegnehmen

Berlin: As dat schient plaant de Bund düchtig wat wegtonehmen vun de Corona-Oplagen. Dat steiht in de Vörlaag, för de Bund-Länner-Snackeree an Vörmiddag. In de Hauptsaak geiht dat ok dorum, wo veel Lüüd sik nee ansteken dröfft. Wenn de Tahl vun foftig per een-hunnert-dusend Minschen in ene Week doröver rutgeiht, mööt wedder scharpere Regeln griepen. Op düsse Grundlaagen schüllt all Schöölers bet to de Sömmerferien wedder den Ünnerricht besööken. All Ladens dröfft wedder opmaken un noch in düssen Maand schullen Speele ahn Tokiekers in de Football-Bunnsliga möglich ween.

Weertschopsminister eenigen sik op Tietplaan för de Weertslüüd

Berlin: Hotels un Gasthüüs schüllt woll noch in´n Mai in´t ganze Land wedder opmaken. Dat hebbt de Weertschopsminister vun Bund un Länner güstern Avend afmaakt. För Gasthüüs un Cafés hebbt se de Tiet twüschen den neegenten un den twee-un-twintigsten Mai vörsehen. Hotels dröfft denn af Enn Mai opmaken, dorbi gellt Afstand un de Hygieneregeln intoholen. De Raatslag vun de Weertschopsminister is de Grundlaag för de Snackeree mit Kanzlersch Merkel un de Baas vun de Länner an Vörmiddag.

Bremen leggt Corona-Regeln för de Flüchtlingshüüs fast

Bremen: De Bremer Senaat will Minschen de flücht sünd un Minschen de kien Tohuus hebbt, beter vör den Corona-Virus bewahren. In de Quarteren dröfft af nu blots noch ene bestimmte Tahl an Lüüd ünnerbrocht warrn. Butendem sünd Afstandsregeln intoholen. Opletzt hett dat jümmer wedder Gegenwind geven, dat düt Regeln in de Eerst-Opnahme-Steed, för Minschen op de Flucht, nich möglich sünd. Bremen is dormit dat eerste Bunnsland dat klore Corona-Regeln för Gemeenschopsquarteere fastleggt.

Bröökperzess üm Germanwings-Afstöört fangt an

Essen. Bröökperzess gegen de Muddergesellschap Lufthansa fangt an: Dat geiht dor um den Germanwings-Fleger de vör um un bi fief Johrn in de franzööschen Alpen afstört is. Vör dat Essener Landgericht geiht dat um de Zivilklaag vun acht Verwandten vun de Minschen de dorbi sturven sünd. De Co-Pilot, de ünner Depressioon leed, hett den Fleeger mit Willen gegen den Barg stüert. All een-hunnert-foftig Lüüd de dor mitflagen sünd, hebbt dat nich överleevt, dorünner ok twee-un-söbentig Düütsche.

Grootfüer in Bremen: Behöörd wohrschaut vör Asbest-Rückstänne

Bremen. Achteran dat verleeden Week in Bremen-Walle dat Grootfüer geev, sünd dor rund umto, lüttje Asbeststücken rünnergahn. De Gesundheitsbehöörd seggt: Reste sünd rundum dree-hunnert Meters to finnen. De Deele de dor afbraken sünd, hebbt ene Gröttde vun Cent- bet Eurogeldstücken. De Behöörd wohrschaut dorvör de Deele optonehmen, dörtobreken or to rieven. Wenn Lüüd Stücken finnt, beed de Behöörd dorum dat to mellen. Een Fachfirma schall de denn wegbringen.

Dat Weer

Un nu kiekt wi op dat Weer: Opstunns sünd dat in Bremen, Emden un Bremerhaben ölben Graad un in Willemshaben sünd dat twölf Graad. Vundaag schient meisttiets de Sünn, af un an dükern mal lüttje Wulkenfeller op. De Wind weiht flau bet in Maaten, to´n Deel ok böig vun de noordwesten Kant. Vunnacht trecken vun de Nordsee dicken Wulken in´t Land, dat blifft aver dröög. In Süüden vun Bremen un umto eerst wulkig, laater denn klor. Bi kölige acht bet dree Graad. Morgen an vörmiddag eerst Wulk an Wulk, na´n Namiddag hen blots noch wenig Wulken un veel Sünnenschien. Dorto blifft dat dröög. Dat Thermometer kladdert op darteihn bet achteihn Graad.

Dat weren de plattdüütschen Narichten. Tohoopstellt vun Anja Guse. Op platt trechtmaakt un vörleest vun Martina Brünjes.