Plattdeutsche Nachrichten

De Plattdüütschen Narichten vun'n 7. Mai 2020

Plattdüütsch Narichten vun'n 7. Mai 2020, [3:21]

Bremer Senaat stimmt Dingsdag över Lockern vun Corona-Regeln af

Bremen: De Senaat will tokamen Dingsdag doröver afstimmen, wo dat Lockern vun Regeln in de Corona-Krise ümsett warrn schall. Dorbi geiht dat dorüm, dat de Kinner vun de ünneren Grundschoolklassen un Kitas wedder hengahn dröfft, un dat de Weertslüüd un Hotels wedder opmaken. Wo dat nipp un nau utsehn schall, ward Anfang tokamen Week kloor ween. Denn dröfft sik ok wedder mehrere Lüüd ut twee Huusholden drapen. Opstünns is dat blots för twee Lüüd verlööft.

Binnensenater Mäurer öövt Kritik an Bunnsliga-Urdeel

Bremen: Binnensenater Mäurer hett nochmal mit düütlichere Wöör seggt, dat he dorgegen is, dat de Football-Bunnsliga wedder wietergahn schall. Güstern hebbt Bund un Länner beslaten, dat de Speele noch in düssen Maand wedder anfangen dröfft. De Profi-Football hett dormit en Extrawust kregen, säe Mäurer bi „buten un binnen“. Dat is för em wenig överraschend, wiel dat üm veel Geld geiht. Denn warrn all de Bedenken achteran stellt. Werder-Geschäftsföhrer Baumann freit sik dorgegen över den Bunnsliga-Start. Mäurer meent aver, dat mag ween, dat sik allens noch heel un deel anners entwickelt as de DFL dat plaant hett.

Ãœnnernehmen in Bremen un Neddersassen beden weniger Lehrsteden an

Bremen: Jümmer weniger Ãœnnernehmen in Bremen un ümto stellen in düt Johr Lehrlinge in. Dat hebbt sowoll de Agenturen för Arbeit as ok de verschedenen Wirtschaftskamern to „buten un binnen“ seggt, un ok, dat dat an de Corona-Krise liggt. Opstünns süht dat so ut, as wenn dat alleen in’t Land Bremen woll 15 Perzent weniger Lehrsteden geven ward as in’t verleden Johr. Besünners markt se dat in Koophüüs, Kitas, Hotels un Weertshüüs.

Patschentenschützer wüllt Testplaan för Pleegheime

Berlin: Wegen de plaanten Lockerungen in de Corona-Krise wüllt Patschentenschützer för Pleegheime en Schutzplaan, jüst so as dat för de Football-Bunnsliga plaant is. In de Olenpleeg leevt Lüüd, de besünners in Gefohr sünd, bannig dicht tosamen, as de Düütsche Stiftung Patschentenschutz seggt. Dorüm mööt 800.000 Lüüd, de pleegt warrn un hunnertdusend Mitarbeiders elkeen Week op dat Virus test warrn.   

Tominnst söss Dode bi Giftgasuttritt in Fabrik in Indien

Nee Delhi: In’n Süden vun Indien is ut en Chemiefabrik Gas rutströmt, dat giftig is. Dorbi sünd tominnst söss Minschen doodbleven un 120 versehrt worrn. Dree Kilometer rund üm de Fabrik schullen de Börger ehr Hüüs nich verlaten. As dat schient, produzeert de Fabrik Plastik för Speeltüüch.

Dat Weer

Un nu en Blick op dat Weer: in Demorst un an’n Bremer Flegerhaben 9, in Bremerhaben 10, un in Rhauderfehn un Vechte sünd dat opstünns 11 Graad. Hüüt Vörmiddag lösen sik de dichten Wulkenfeller op. Darna gifft dat bi wenig Wulken veel Sünnschien. Dorbi blifft dat dröög bi 12 bet 19 Graad. In de Nacht wiest sik de Heven licht wulkig, to’n Deel funkeln ok de Steerns, so dat dat keen Regen geven ward. De Luft köhlt sik af op 7 bet 2 Graad. Morgen schient blangen lockere opstiegen oder dünne Wulken meisttiets de Sünn, un dat blifft dröög bi 17 bet 21 Graad.

Dat weern de Narichten op platt. Tohoopstellt hett se Carola Schwirblat. Op Platt trechtmaakt un vörleest vun Marc Gelhart.