Plattdeutsche Nachrichten

De Plattdüütschen Narichten vun'n 8. Mai 2020

Plattdüütsch Narichten vun'n 8. Mai 2020, [3:38]

Denken an dat Befreen vun den Natschionalsozialismus

Berlin. In Düütschland wart sick vundaag an dat Enn vun den tweeten Weltkrieg un dat Befreen vun den Natschionalsozialismus vör 75 Johrn besinnt. In Berlin leggen an´n Middag Bundespräsident Steinmeier un Bundeskanzlersch Merkel an de Gedenksteed vun de Opfers „Nee Wach“ en Kranz daal. In Bremen-Farge weer an´n Vörmiddag en Gedenkstünn an dat Mahnmaal vun den Bunker Valentin. In Bremerhaben gift dat later an´n Namiddag en Gedenkveranstalten för all Lüüd an de Groden Kark.

Corona sorgt för Stüerverluste

Düsseldörp. Op Bund un Länner koomt wegen dat Corona-Slamassel as´t schient en leege Stüerverlust to. Dat vermellt dat Hannelsblatt un beroopt sick op de Stüer-Taxeerders. Se bringt ehr Utsicht tokamen Week ruut. De Staat draf also alleen in düsset Johr üm un bi 100 Milliarden Euro weniger Stüern innehmen as noch bi dat Taxeeren in Harvst annahmen. För tokamen Johr reken de Taxeerders also tominnst noch mit en Minus vun 40 bit 50 Milliarden Euro för Bund, Länner un Gemenen.

Veele Vergahns gegen Corona-Oplagen in´t Land Bremen

Bremen. Bremen un Bremerhaben mellen betto mehr as 3.000 Vergahns gegen de Corona-Oplagen. Dat hett Binnensenator Mäurer bekannt makt. In de mehrsten Fallen gung dat dorüm, dat Minschen dat Kuntakt-Verbott nich inhollen. Ok Fiern in Privatrüüm mussen fakener oplöst weern. Betto sünd dordöör Straafgeller vun mehr as 130.000 Euro utspreken wuuren. Mäurer stellt aver ruut, dat sick de mehrsten Bremer an de Regeln vun´t Gesetz her hollen.

Museen un Utstellungshüüs makt wedder op

Bremerhaben. In dat Land Bremen sünd wedder Museen un Utstellungshüüs open. Ok de Zoo an´t Meer in Bremerhaben hört dorto. Intrittskorten könen aver blots in´t Internet koopt weern. Dordör schall dat nich dorto kamen, dat sick vör den Zoo lange Töövslangen billden. Ok dat Bremer Överseemuseum, de Kunsthall, dat Focke-Museum un de Botanika sünd wedder open.

Werder bekriddelt fröhen neestart vun de Football Bundesliga

Weserstadion. Werder Bremens Sportbaas Baumann bekriddelt de korte Tiet, in de se sick op den Neestart vun de Football-Bundesliga trechtmaken köönt. He findt, dat all Verenen tominnst twee Weken Mannschaftstraining brukt harrn. Nu geiht dat för Werder dorüm, de restlichen Speele allerbest to maken, üm in de eerste Bundesliga to blieven, so Baumann. För Werder fangt de Bundesliga mit en Maandagsspeel an: An´n 18. Mai hebbt de Bremer de Mannschaft ut Leverkusen to Gast.

Dat Weer

Un nu smiet wi en Oog op dat Weer. Op Spiekeroog un an den Bremer Flegerhaben 13, an de Fischreehabenslüüs in Bremerhaben 12 un in Demorst sünd dat opstunns 15 Graad. Hüüt gift das veel Sünnschien. In dat Binnenland sünd en poor lockere Wulken dorbi. Dat blift dröög bi 17 bit 22 Graad. De Wind weiht flau ut Westen. Tokamen Nacht sünd en poor lose Wulken an´n Heven. Man dat blift dröög. Dat Thermometer wiest en Temperatur vun söven bit elven Graad.
Morrn schient den ganzen Dag de Sünn mit en poor Schöönwetterwulken bi 19 bit 25 Graad. Sünndag is de een or annere Wulk an Heven. Hier un dor kann dat ok en Regenschuer geven. Ok Blitz un Donnerslag sünd möglich. Dat Thermometer wiest en Temperatur vun 14 bit 20 Graad.

Dat weern de Nahrichten op platt. Michael Pundt hett se tohoopstellt. Op Platt trechtmaakt un vörleest hett se Markus Weise.