Plattdeutsche Nachrichten

De Plattdüütschen Narichten vun'n 11. Mai 2020

Plattdüütsch Narichten vun'n 11. Mai 2020, [3:24]

Neddersassen lockert wieter Corona-Regeln

Hannober – Dat Land Neddersassen lockert wieter Regeln wegen Corona. Vun hüüt an dröfft Restaurangs, Wertshüüs un ok Cafes wedder ünner Oplagen de Dören open maken. Se mööt aver strenge Regeln vunwegen de Hygiene un den Afstand inhollen. Buterdem mööt Gäst Kuntaktdaten angeven. Ok dröfft sik nu wedder Littmaten ut twee ünnerschedlichen Huusholten drepen, bitnu weer dat blots twee verenkelten Personen verlöövt. In Bremen will de Lannesregeern morrn daröver entscheden, wat lockert ward.

Wedder een Corona-Doden in Bremen

Bremen – In Bremen is een Minsch mit en Corona-Infektschon sturven. Darmit gifft dat tohoopnahmen 33 Corona-Dodesfälle in Bremen. In dat lüttjeste Bunnesland hebbt sik vun Amts wegen bitnu tohoopnahmen mehr as eendusend Minschen mit dat Corona-Virus ansteken, mehr as de Hälft is all wedder gesund.

Spahn foddert Eenigkeit

Berlin – Bunnesgesundheitsminister Spahn foddert, hart dörtogriepen in’n Kampf gegen de Corona-Pandemie. Dat wees heel wichtig, dat alle Infektschonen gau naverfolgt ward un Lüüd, mit de kranke Minschen Kuntakt harrn, aftosünnern. Blots wenn de Landkreise gau hannelt, köönt se verhinnern, dat de Infektschonstallen bunneswiet wedder na baben kladdert. De Bund harr den Lännern verleden Week meist free’e Hannen to’n Lockern vun de Oplagen geven. Se hebbt aver vereenbart to hanneln, wenn binnen een Week mehr as 50 nee’e Infektschonen pro hunnertdusend Inwohner opdüükt.

Minschen in Grootbritannien schüllt wieter to Huus blieven

London – Grootbritannien hett sien Regel, dat de Minschen wegen de Corona-Pandemie nich rut dröfft, verlängert. Se schall tominnst bit to’n 1. Juni gellen, hett Regeernbaas Johnson in’t britische Fernsehen ankünnigt. Na sien Wöör dröfft aver alle wedder to ehr Arbeitsstäe fohrn, wenn se nich tohuus arbeiden köönt. Buterdem dröfft de Minschen in dat Land vun Middeweken an buten wedder Sport maken.

Fleesch-Wertschupp wehrt sik gegen dat, wat ehr vörsmieten ward

München – De Fleesch-Wertschupp wehrt sik dargegen, dat ehr vörsmieten ward, dat sik dat Virus ünner ehr Mitarbeidern utbreden deit. De Grundlagen un Rahmen för de Arbeit sünd nich de Grund darför, dat dat Virus ünner den Arbeidern rümgeiht. Dat sä de Böverste vun’n Branchenverband, Harstick, to de Süddütsche Zeitung. Se wahrschaute ok vör strengeren Oplagen. Wenn se to’n Bispill Mitarbeider in Tokunft alleen ünnerbringen mööt, bedüüt dat högere Mieten un vele Bedreve köönt denn in’n Wettstriet nich mehr mithollen.

Dat Weer

Un nu een Blick op dat Weer: in Bremervöör 6, an den Bremer Flegerhaben 8, an de Fischereehabenslüüs in Bremerhaben 9 un op Langeoog sünd dat opstunns 10 Graad. Hüüt treckt de dicken Wulken in’n Süden vun Bremen gau af un vun de Küst her schient mehr un mehr de Sünn. Dat is dütlich köhler bi 11 bit 13 Graad. Tokamen Nacht mal mehr, mal minner Wulken un af un an kann dat en beten drüppeln, vör allens an de Küst. Dat Thermometer sackt op 6 bit 2 Graad. Morrn wesselt sik dickere Wulken mit en beten Sünnschien af un Regenschuers köönt dörtrecken. Darbi blifft dat köhl bi 9 bit 11 Graad. Middeweken mehr Sünnschien, middenmang ok mal wulkiger un dar köönt ok Schuers daalgahn bi 9 bit 12 Graad. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Heidi Jürgens.