Plattdeutsche Nachrichten

De Plattdüütschen Narichten vun'n 13. Mai 2020

Plattdüütsch Narichten vun'n 13. Mai 2020, [3:54]

Grenz twüschen Düütschland un Ööstriek bold wedder open

Wien: De Grenz twüschen Düütschland un Ööstriek schall af 15. Juni wedder ganz opmaakt warrn. Dat künnigt vunmorgen de öösterrieksche Regeerung an. Dorna schall dat af tokamen Freedag, blots noch mal hier mal dor Kontrollen geven. De Bunnsregeerung wull vundaag ok över dat Thema „Grenzen opmaken“ snacken. Ok de EU-Kommisschioon will ehre Leitlinien, de Grenzen Stapp för Stapp wedder op to maken, besluten.

Land Bremen: Besöök in Pleegheime wedder rechtens

Bremen: In de Pleegheime in Bremen un Bremerhaben is dat nu wedder rechtens Besöök rintolaaten. Dat hett de Senaat güstern fastleggt. Dorbi gellen aver strenge Regeln. Tolaaten sünd man blots enkelte Gäst, een Tüüch vör Mund un Nees is Plicht. De Heime de Plaans, vunwegen de Hygiene, vörleegt harrn, können bats op de Steed dormit anfangen. De Annern mööt socke Plaans bet to´n fief-un-twintigsten Mai vörleegen.

Reisünnernehmen TIU will 8000 Steeden op de ganze Welt strieken

Hannober: Dat Reisünnernehmen TUI will vunwegen de Corona-Krise um un bi 8000 Steeden op de ganzen Welt strieken. Dat see de Konzern bi de Bilanzpresskonferenz. För wecke Steeden un Länner dat besünners gellt, is noch nich rut. Konzern-Baas Joussen künnigt an: Dat schall um dartig Perzent weniger warrn bi Investitschion, Kossen un de Präsenz op de ganzen Welt. Liekers geiht he dorvun ut, dat sik allens verhaalt: Wiel de eersten Hotels in Düütschland in de tokaamen Daag wedder opmaakt un ok in Europa de Hotels praat stahn wedder Gäst optonehmen.

Quarteere vun Oornhölperslüüd und Slachthoff-Mitarbeiters schüllt kontrolleert warrn

Cloppenborg: De Landkreise schüllt all Quarteere vun Oornhelperslüüd un Warksverdragarbeiters kontrolleeren. Dorop hett dat Sozialministerium henwiest. Mit düsse Kontrollen schüllt de Arbeiters beter vör een Infektschioon mit den Corona-Virus bewohrt warrn. Schüllt een seggen, ik will de Kontroll nicht, or dat gifft den Verdacht dat sik Arbeiters ansteken hebbt, künnt dat Gesundheitsamt all Lüüd de dor wahnt ünner Quaranteen stellen, see de Sprekersche.

Pizarro hett sik bi´t Training verletzt

Bremen: Werder-Stürmer Claudio Pizarro hett sik wieldess dat Training leep an sien Böverbeen verletzt. De 41 Johr olt Peruaner warrt dorum, wenn de lopende Speeltiet an Maandag wedder losgeiht, nich dorbi ween. De Vereen seggt: Dat süht opstunns so ut, as wenn dat länger duert. Werder startet tokamen Maandag tohuus gegen Bayer Leverkusen in den Rest vun de Bunnsliga-Speeltiet vun Platz söbenteihn.

Dat Weer

Un nu kiekt wi op dat Weer: Opstunns sünd dat in Bremen, Bremerhaben un op Langeoog överall negen Graad, in Demorst sünd dat teihn Graad. Vundaag sünd meist dicke Wulken ünnerwegens und de bringt us jümmer mol wedder Schuer mit, de an Namiddag ok kräftig ween kunnt. Dortwüschen seht wi aver ok mol de Sünn. De Wind weiht flau, eerst an Avend warrt dat vun de noorden Kant her mehr. Dat Thermometer schafft dat man blots op teihn bet twolf Graad. Vunnacht sünd in de Hauptsaak in Süüden vun Bremen un umto un in de Veerner Heid noch Schuer ünnerwegens, de trecken denn aver gau af, un dat is blots noch wenig wulkig. Dat Thermometer wiest denn sess bet twee Graad. Morgen eerst klor un wi seht ok mal de Sünn, över Middag denn wedder mehr Wulken. Na´n Avend hen lockern de wedder op un dat blifft meist dröög, bi teihn bet twölf Graad.

Dat weren de plattdüütschen Narichten. Tohoopstellt hett se Gabriele Intemann. Op platt trechtmaakt un vörleest vun Martina Brünjes.