Plattdeutsche Nachrichten

De Plattdüütschen Narichten vun'n 14. Mai 2020

Plattdüütsch Narichten vun'n 14. Mai 2020, [3:29]

Bunnesdag snackt wieter över Corona-Hölp

Berlin – De Bunnesdag will in’n Loop vun’n Dag wat över mehr Corona-Hölp entscheden. Gesundheitsminister Spahn will ünner annern mehr op dat Virus testen laten. Dat schall vör allens Pleger en beter Schuul geven un Minschen, de pleegt weern mööt. Buterdem wüllt se woll dat Kortarbeitergeld för en bestimmte Tied na baben setten un wieter lopen laten.

Kann ween, un an de Grenzen ward wedder mehr kuntrulleert

Berlin – Bunnesbinnenminister Seehofer kann sik vörstellen, dat se to strengen Kuntrullen an de Grenzen trüchgahn ward. Wenn de Infektschonen mehr ward un nich mehr kuntrulleert weern köönt, mööt se dat Lockern wedder trüchnehmen, sä Seehofer güstern Abend in’n Ersten. Man wenn sik de Laag noch verbetert, sünd de Grenzkuntrullen Midde Juni vörbi. Vun Sünnabend an ward an de Grenzen to velen Navarslännern blots noch af un an överprööft.

Villicht gifft dat en Corona-Impfstuff an’n Enn vun’t Johr

Langen – Dat Paul-Ehrlich-Institut rekent darmit, dat se bit to’n Enn vun’t Johr över dat Tolaten vun en Corona-Impfstuff snacken köönt. In Dütschland ward dat dree klinsche Ãœnnersöken vun Impfstuff-Kandidaten geven. Vun Harvst an köönt se all vun en Middel pröfen, woans dat wirkt un wo seker dat is, sä de Böverste vun dat Institut. Middewiel wüllt se aver kieken, wat se anners noch daan köönt, üm de Pandemie to ünnerdrücken.

Senat will Tarifverdrag in de Pleeg vun olen Lüüd

Bremen – De Bremer Senat maakt sik för Tarifverdrääg för Pleger vun olen Minschen stark, de överall gellen schüllt. Dat hett de Börgerschupp mit rot-gröön-roder Mehrheit besluten. En erster Versöök för en bunneswiete Lösung weer vör allens wegen den Wedderstand vun de privaten Pleeg-Anbeder fehlslaan. Darum will de Bremer Koalitschon nu as Land en Teken setten. Se will, dat private Anbeder blots denn Geld vun’t Land toseggt kriegt, wenn se ehr Mitarbeider na Tarif betahlt.

Mehr Hölp för’n Tourismus

Hannober – Dat Land Neddersassen hett för dat Tourismus-Wertschuppsfeld mehr Hölp in Utsicht stellt. Wertschuppsminister Althusmann hett in’n Landdag vun’n Bund foddert, de Hölp, de dat batz op de Stäe geev, to verlängern. Vun’n 25. Maimaand an dröfft Hotels wedder de Dören open maken – egens weer plaant, dat Zimmer denn blots alle söben Daag wedder nee beleegt weern dröfft. Düsse Frist will Althusmann streken. De Tourismus in Neddersassen löppt siet güstern na un na wedder an, bitlang aver noch nich so as jümmers.

Dat Weer

Un nu een Blick op dat Weer: in Bremervöör 8, an den Bremer Flegerhaben un an de Fischereehabenslüüs in Bremerhaben 9 un in Demorst sünd dat opstunns 11 Graad. Hüüt treckt pö a pö mehr Wulken op, dröppeln ward dat aver woll nich. To’n Abend hen lööst sik de meisten Wulken wedder op. Dat kann in’t Binnenland Boddenfrost geven un dat is ok den Dag över köhl bi 10 bit 12 Graad. Tokamen Nacht funkelt erst faken de Sterns, later treckt dat to un an de Küst kann dat ok mal schuern. Dat Thermometer sackt op plus 4 bit minus 1 Graad. Morrn faken vele Wulken mit en beten Sünnschien, mag ween, un dat pladdert kort mal, bi 12 bit 14 Graad. Sünnabend mal mehr, mal minner wulkig un verenkelte Schuers bi 12 bit 16 Graad. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Heidi Jürgens.