Plattdeutsche Nachrichten

De Plattdüütschen Narichten vun'n 15. Mai 2020

Plattdüütsch Narichten vun'n 15. Mai 2020, [3:52]

Bunnsdag höllt Raat över Grundrent

Berlin: De Bunnsdag hett anfungen un höllt Raat to een Gesett över eene Grundrent. De schüllt Minschen kriegen, de veele Johren lang minn verdeent un dorüm ok nich veel in de Rentenkass inbetahlt hebbt. Geiht dat na den Willen vun de Regeern, dennso schüllt se vunaf dat tokamen Johr een Toslag kriegen. De SPD harr in de grote Koalitschoon för düsse Grundrent streden, de Union hett se lange Tiet nich hebben wullt.

Scheuer will Strafen för Rasers smödigen

Berlin: Bunnsverkehrsminister Scheuer will de hatteren Strafgelder för Vergahnssaken in’n Stratenverkehr to’n Deel weer trüggnehmen. De Düütsche Press-Agentur hett to weeten kreegen, dat dat Verkehrsministerium den niegen Katalog för Strafgelder noch mal nie upstellen will. De niegen Regels sünd erst siet knappan dree Weeken güllig. Vör allen geiht dat mit ehr um niege Regels för de gauen Karjohlers: Siet Enn vun den Aprilmaant warrt de een Maant lang dat Föhren verbaden, wenn he of se binnen in een Oort 21 Kilometers in de Stünn to harre föhrt.

Schoolkinner schüllt Klapprekners vun’n Staat kriegen

Berlin: Bund un Länner sünd sick up een Plaan eenig worrn, woans Schoolkinner hulpen warrn kann, de keene Rekenmaschine in’t Huus hebbt. Düütsche Schoolen schüllt för sowat fiefhunnert Miljonen Euro Klapprekners kopen könen. Se schüllt düsse Apparate an Schoolkinner verhüren, de dat nödig hebbt, hett de Bremsche Billenssenatersche Bogedan an buten un binnen seggt. Dat Land Bremen kriggt vun dat Geld  knappan fief Miljonen. Bunnsbillensministersche Karliczek will to düsse Saak upstunns wat vermellen. Se willt dorup daal, dat  de Schoolkinner Stöhn geven warrt, de bi dichte Scholen to Huus nich lehren köönt, ümdat in’t Huus keene Rekenmaschine dor is.

De mehrsten Börgers willt keene Speel in de Bunnsliga

Köln: De Mehrheet vun de Düütschen is dortegen, wat de Speel in de Bunnsliga wiedergaht. Dat hebbt se ruthören kunnt bi eene Nafraag vun den ARD-Düütschlandtrend. Sössunföfftig Perzent vun de Lüüd finnt dat nich goot, dat tokamen Weekenenn de Speeltiet wiedergeiht. Knappan een Drüddel is dorför, dat de Speelers vun Profeschoon weer wettstrieden doot. De Bremsche Binnensenater hett noch maal düütlick seggt, dat dat för de Bunnsliga-Speelers keene Utnahm geev vun de Corona-Regels: Mit Woorden sä he: „Elkeen, de düchtig mit eenen Minschen tohoop west is, bi den se wat faststellt hebbt, de mutt denn för veerteihn Daag in siene Wahnung sitten.“

Bremsche Evangeelsche Kark will Pastor een „p“ vörsetten

Bremen: De Bremsche Evangeelsche Kark hett beslaten, se will mit een Verfahren tegen den Pastor Olaf Latzel tegenangahn. Dat hett den Karkenutschuss mit eene Stimm utmaakt. De Pastor vun de St. Martini-Gemeende harr na de Meenen vun den Utschuss minnachtig vun sockse Minschen snackt, de vun ehr eegen Soort hollt. In eene Trau-Lehrstünn, as dat nöömt warrt, harr Latzel verleden Oktober woll seggt, Lüüd, de ehr eegen Soort lieden möögt, de weern „Verbrekers“. De Staatsafkaatschupp geiht bi den evangelikaanschen Pastor de Saak ok na. Se sünd vermoden, dat weer Uphissen tegen Volksgruppen.  

Dat Weer

Un so steiht dat Thermometer upstunns: an de Fiskereehabenslüüs in Bremerhaben un up Wangerooge bi negen, an’n Bremschen Fleegerhaben bi teihn un in Osterholt-Scharmbeck bi ölben Grod. Hüüt wesselt Wulken un Sünnschien un vun de Nordsee her kann dat een beten schuern bi twölf bit veerteihn Grod. Dat is een beten to köhlig för düsse Johrestiet. De Wind weiht man mau, an de Küst mit Maten bit frisch ut de Richt Nordwest. Tokamen Nacht blots lütte Wulken of klaar un dröög bi acht Grod an de Küst un dree Grod in’t Binnenland. Hier un dor kann dat an de Grund freesen. An’n Sünnabend mal mehr, mal minner Wulken, verenkelte Schuers, man tomehrst drög bi dörteihn bit föffteihn Grod. An’n Sünndag is dat fründlick bi bit to achtteihn Grod. Dat weern de Narichten. Gerrit Busch hett se tohoopstellt. Up Platt trechtmaakt un vörleest hett se Gesine Reichstein.