Plattdeutsche Nachrichten

De Plattdüütschen Narichten vun'n 18. Mai 2020

Plattdüütsch Narichten vun'n 18. Mai 2020, [3:55]

Maas besnackt sik mit Urlaubslänner, wat se de Touristen wedder rin laat

Berlin: Bunnsbutenminister Maas will hütt Middag mit siene Kollegen ut de Urlaubslänner, de veele Minschen geern möögt, besnacken wo dat lopen schall, dat de Touristen wedder peu à peu riesen dröfft. Man blots, wenn dat mit „gegen de Corona-Pandemie gegen angahn“ so wieter loppt un dat nich wedder leeger warrd. To de Video-Konferenz sünd Spanien, Italien, Österriek, Grekenland, Kroatien, Portugal, Malta, Slowienien, Zypern un Bulgarien inladen. In Düütschland gellt eerstmal bit to´n 14. Juni een Wohrschau för´t Reisen op de ganze Welt.

Kabinett schuuvt Beraden över Grundlagen un Rahmen för de Arbeit in´t Slachthoff ruut

Berlin: Dat Corona-Kabinett hett dat Beraden över düütsche Slacht-Bedrieven op Middeweeken ruutschuven. In de Bedrieven hett dat veele dulle Corona-Utbrüche geven. In´n Mittelpunkt steiht dorbi de Insatz vun Arbeitslüüd, de för de Saison ut dat Utland kamen sünd. De Fleesch-Industrie steiht all siet Johren in de Kritik, wegen de leegen Grundlagen un Rahmen för de Arbeit, un de Quarteere de nüms totomoden sünd. Minister för Arbeit Heil verlangt strengere Oplagen un will dat Arbeitsschutzgesetz ännern.

Krögers un Weerstlüüd wedder open

Bremen: Af hütt dröfft Krögers, Weertshüüs un Cafes wedder de open sien. Dat is twee Maand her, dat se all wegen de Corona-Pandemie dicht maakt harrn. Nu mööt de Weertslüüd tosehn, dat all Lüüd den Minnstafstand vun 1,50 Meter inhollt. Ok mööt de Dische 2 Metern utenanner stahn. Veele Plätze blieft dorum sperrt. De Bedriever mutt vun siene Gäst den Namen, de Telefonnummer un wo lang een dor wesen is opschrieven. Dree Weeken mutt he dat opwohren.

Forschungsschippe bringt nee`e Crew to de „Polarsteern“

Bremerhaben: Twee Forschungsschippe bringt dat nee`e Team un ok Proviant to de „Polarsteern“. Siet Harvst 2019 drievt de düütsche Iesbreker, in´t Ies infroren, dör dat Nordpolarmeer. De MOSAIC-Expedition, wo dat Bremerhabener Alfred-Wegener-Institut dat Leit hett, is bit nu de gröttste Arktis-Expedition. To Beginn vun´t April scholl de 100 Kopp starke Crew uttuuscht warrn. Man wegen de Corona-Pandemie weer dat mit de plaanten Flegers nich mööglich wesen.

Werder Bremen speelt hütt Avend gegen Bayer Leverkusen

Bremen: To´n Afsluss vun den 26. Speeldag in de Football-Bunnsliga speelt Werder Bremen hütt Avend um half 9 gegen Bayer Leverkusen. Ok na de Corona-Pause vun 10 Weeken is de Personal-Situation bi Werder  jümmer noch anspannt. Fief Speeler sünd noch krank, un buterdem is Davy Klaassen na siene fiefte geele Koort sperrt. Wo dat Speel in´t Stadion ahn Tokieker aflopen schall, hebbt se vör eene Weeken all nipp un nau proovt. Werder is opstunns een, de sportlich butenvör steiht- de Bremer hebbt 9 vun de verleden 11 Bunnsliga-Speele in´n Sand sett.

Dat Weer

Un nu een Blick op dat Weer: In Syke 15, an den Bremer Flegerhaben 14, an de Fischreehabenslüüs in Bremerhaben un op Spiekeroog sünd dat opstunns 13 Graad. Hüüt hebbt wi erst veele Wulken an`t Heven un an de Küst is Regen mööglich. An Nomdag lockert dat vun´t Emsland her op un de Sünn kummt rut, bi 15 bit 20 Graad.Tokamen Nacht ward de Wulken denn wedder mehr un vu Ostfriesland her treckt to´n Morgen hen Schuers op. Dat Thermometer sackt op 11 bit 9 Graad. Morrn wesselt sik de Sünn un de Wulken af. Hier un dor gifft dat ok Regenschuers, bi 15 bit 19 Graad. An Middeweeken is dat jüst so wesselhaft, meist dröge bi 15 bit 20 Graad. Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Antje Kruppa.