Plattdeutsche Nachrichten

De Plattdüütschen Narichten vun'n 19. Mai 2020

Plattdüütsch Narichten vun'n 19. Mai 2020, [3:50]

Nich all finnt Merkel-Macron-Plaan goot

Brüssel: Kanzlersch Merkel un Frankrieks Präsident Macron  hebbt för jümehren Opboo-Plaan för Europa Wind vun vörn un vun achtern kregen. Öösterrieks Kanzler Kurz meen, so wat dröff blots mit Kredite lopen un nich mit Toschüsse. De spaansche Ministerpräsident Sanchez sä, de Plaan weer en wichtigen Schritt, dat de Europääsche Union ut Legerwall wedder rutkummt. Merkel un Macron harrn güstern vörslaan, vunwegen Corona schull de EU 500 Milliarden Euro bavento utgeven. Dat Geld schull as Toschuss ut den EU-Huusholt kamen.

Montgomery wohrschaut: Grenzen nich to gau apen maken

Berlin: Bunnsbutenminister Maas will nich, dat dat Reisen-Wohrschau för överall op de Welt över den 14. Juni rutgeiht. De Präsident vun all Dokters op de Welt, Montgomery, meent: Dat is verkehrt. Wenn de Grenzen in Europa för Touristen wedder apengaht, kunnen de Corona-Tallen wedder böös anstiegen. Montogomery sä: De Regerung kickt blots op de Wirtschaft un hett de Gefohr för de Gesundheit to minn in de Reken.

Bremen: Kene Karanteen-Plicht för Lüüd ut de EU

Bremen: De Senaat will: Lüüd, de ut de EU anreist, mööt nich mehr unbedingt in Karanteen gahn. Dat hett buten un binnen to weten kregen. As Neddersassen un Hamborg nimmt Bremen en Raatslag vun den Bund op. Dat schall vun morgen op an gellen. Lüüd, de ut de EU anreist, mööt blots noch denn in Karanteen, wenn se Corona-Kuntakten hatt hebbt. All de annern köönt denn wedder so inreisen.

Bunnsliga löppt wieder: Bovenschulte nich dorför

Bremen: He frei sik, dat de Speeldag so goot lopen is, sä Bremens Börgermester Bovenschulte güstern Avend in de ARD. Liekers weer de ne’e Anloop vun de Liga en snaaksch Teken an de Minschen. De Ministerpräsidenten ut Sassen un Neddersassen harrn anseggt: Se kunnen sik vörstellen, dat in’n September de Bunnsliga wedder mit Tokiekers speelt. Bovenschulte süht dat anners. Werder Bremen hett güstern gegen Bayer Leverkusen mit 1:4 een op de Mütz kregen. Wegen Corona weren dor kene Tokiekers mit bi. Werder steiht an Nummer 17, mit fief Punkten weniger as de Utspeelplatz 16.

Indien un Bangladesh stellt sik op Zyklon in

Nee Dehli: Indien un Bangladesh stellt sik op en Warvelstorm in. Mehr as twee Millionen Minschen wüllt se dor in Sekerheit bringen. De Behörden seggt: Se versöökt, den nötigen Corona-Afstand intoholen. De Warvelstorm Amphan warrt woll Mittweken mit bet 200 Stunnenkilometer un veel Regen an Land kamen.

Dat Weer

Un woans süht dat mit dat Weer umto ut? Opstunns hebbt wi in Nordholt 14 Graad, in Bremerhaven un Wiesmoor sünd dat 15 un in Bremen 16 Graad. Vundaag: En Barg Wulken, un hier un dor kann dat ok en beten pladdern. Eerst an’n Namiddag kriegt wi vun de Küst her pö a pö ok mal den Heven to sehn. Dat Thermometer krabbelt op 15 bet 20 Graad. De Wind dorto weiht flau, an de See ok en beten mehr, vun de noordwesten Kant. Tokamen Nacht: Eerst Wulken un Steerns, laterhen treckt de Wulken wedder tohoop. Hier oder dor kriegt wi Daak oder hogen Daak. Un drüppeln kann dat ok en beten. Bi 10 bet 6 Graad. Morgen: Eerst noch dichte Wulken, man dat blifft dröög. An’n Namiddag kummt de Sünn mehr un mehr dör. Mit 16 bet 21 Graad wedder en beten wat warmer. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Pundt.