Plattdeutsche Nachrichten

De Plattdüütschen Narichten vun'n 20. Mai 2020

Plattdüütsch Narichten vun'n 20. Mai 2020, [4:08]

Bremer Lannsparlament snackt över Huusholt

Bremen: De Börgerschaft snackt just nu över den Huusholt för düt un dat tokamen Johr. Dat Parlament is dorför extra buten de Reeg tohoop kamen. De Senaat hett dat güstern op´n Weg brocht. Dat Land Bremen warrt dorno in düt Johr um un bi 4,7 Milliarden Euro utgeven. In´t tokamen Johr schall dat en beten mehr ween. Noch nich dorbi is dat Wertschopsprogramm, dat Bremen, vunwegen de Coronakrise, oplegen will.

Bunnsregerung will Geller för Öllern wieter lopen laaten

Berlin: Dat Geld för Öllern wat se bet nu wieder kregen hebbt, wieldess de Corona-Krise löppt, warrt woll ok wiederhen betahlt. Mudders un Vadders, de nich na de Arbeit gahn könnt, wiel de Kinnergoorns un Schoolen dicht sünd, schüllt bet to teihn Weken Geld kriegen. Öllern de ehre Kinner alleen optreckt, bet to twintig Weken, sä de Gesundheitsminister Spahn dat „Nee Ossenbrügger Blatt“. Dat Bunnskabinett will de nee Regelung dorna an Vörmiddag besluten. Bet nu gellt düsse Hölp man blots för sess Weken.

Kabinett snackt doröver wat nich goot löppt in de Fleeschindustrie

Berlin: En anner Thema in´t Kabinett sünd de Ümstannen wo de Lüüd in de Fleeschindustrie arbeiden. Nip un nau geiht dat dorum, of de Kuntrollen un Regeln in de Slachthöff strenger warrn mööt. In de verleden Weken hett dat in en poor Bedrieve en ganzen Barg Corona-Infektschionen geven. Achteran geev dat Kritik an de Ümstänn wo de Lüüd dor arbeiden mööt. Veele vun de Arbeiders sünd ut Oosteuropa un sünd bi Subünnernehmer mit Warksverdrääg anstellt. Faken sünd de in lüttje Sammelquarteere ünnerbrocht.

Verfohren gegen VW-Baasse warrt gegen Betahlen vun Geld instellt

Brunswiek: Dat Straafverfohren gegen de Volkswagen-Spitze warrt, as dat utstüht, instellt. VW seggt: Konzern un Rechtsapparaat sünd sik eenig wurrn. Dorno heet dat: Konzern-Baas Diess un de Baas vun den Opsichtsraat, Pötsch, mööt vör´t Gericht nich mehr wat dorto seggen, wenn se tohoopnahmen negen Millionen Euro betahlen. De Staatsanwaltschop hett em to Last legen, dat se den Kapitalmarkt mit Willen to laat över den Dieselschandaal Utkunft geven, un so gegen dat Gesett bi den Aktienkurs vun dat Ünnernehmen mitmischt harrn.

EU-Staaten snackt över minner strenge Regeln bi´n Tourismus

Berlin: De EU-Länner kiekt sik nip un nau an wecke Mööglichkeiten se eenfacher maken könnt, um in de Corona-Pandemie to reisen. Butenminister Maas snackt doröver vundaag ok noch mal mit siene Kollegen ut de düütschen Naverlänner. Butendem wullen sik de Minister, de för den Tourismus in de EU tostännig sünd, afstimmen. De Vörslag vun de EU-Kommission süht so ut: Pö a pö Grenzen open maken un Raatslääg wo man mit de richtigen Hygiene umgeiht.

Dat Weer

Un nu kiekt wi op dat Weer: Op Langeoog sünd dat darteihn Graad, in Demorst veerteihn Graad un in Bremen un Bremerhaben sünd dat opstunns fofteihn Graad. Vundaag wüllt de Wulken eenfach nich weg. Hier un dor ok Daak un dat kann ok mol dröppeln, meist is dat aver dröög. An Namiddag schafft de Sünn dat denn so langsam an de Wulken vörbi un dat warrt een beten warmer bi 16 bet 21 Graad. De Wind weiht man blots flau vun de noorden Kant. Vunnacht sünd wenig Wulken ünnerwegens, dat is meist klor, in de klamm Luft kann sik wedder Daak billen. Dat Thermometer sackt op 11 bet 6 Graad. Morgen an Christi Himmelfohrt, lacht de Sünn, achteran sik de Daak oplööst hett, af un an trecken mol en poor Wulkenfeller dör. Dat blifft aver dröög. Dat Thermometer wiest us den warme 21 bet 26 Graad. Freedag eerst kloor, laater denn jümmer mehr Wulken de bringt ok mol een Schuer mit, man dat kann ok Blitz un Donnerslag geven, dat Ganze bi 21 bet 26 Graad.

Dat weren de plattdüütschen Narichten. Tohoopstellt vun Anja Guse. Op platt trechtmaakt un vörleest vun Martina Brünjes.