Plattdeutsche Nachrichten

De Plattdüütschen Narichten vun'n 25. Mai 2020

Plattdüütsch Narichten vun'n 25. Mai 2020, [3:39]

Corona-Regeln ward in Neddersassen wieter lockert

Hannober – De Corona-Regeln in Neddersassen ward hüüt wieter lockert – obschoons sik wecke na en Besöök vun en Wertshuus in Ostfreesland ansteken hebbt. To’n ersten Mal, sietdat dat mit de Krise loosgahn is, dröfft Hotels wedder de Dören open maken un bit to 60 Perzent vun ehr Betten belegen. Restaurangs dröfft wedder mehr as 50 Perzent rinlaten, man de Minnest-Afstänne gellt wieter. Buterdem köönt Fitnessbuden un Freebäder wedder losleggen. An de Scholen kehrt de 11. Klassen trüch in den Ãœnnerricht.

Ramelow mutt orrig Kritik insteken

Erfurt – De Ministerpräsident vun Thüringen, Ramelow, kriegt för sien Vörslag, de Corona-Regeln orrig to lockern, jümmer mehr Wind vun vörn. De SPD-Gesundheitspolitiker Lauterbach meent, de Plaan wees ut Sicht vun de Medizin en Katastroph. De Ministerpräsident vun Neddersassen, Weil, sä, se dröfft dat nich to dull drieven mit dat Lockern. Thüringens Ministerpräsident Ramelow harr vörslaan, in rund twee Weken vele Regeln in sien Bunnesland to streken, darunner de Minnest-Afstänne un de Masken-Plicht. Socke Regeln, meent he, schüllt blots in besünneren Flachs gellen, wo dat noch to vele Nee-Infektschonen gifft.

Wenig nee’e Corona-Infektschonen

Berlin/Bremen – De Tall vun de Corona-Nee-Infektschonen in Dütschland blifft flach. As dat Robert-Koch-Institut vermellt, hebbt se siet güstern 300 nee’e Fälle faststellt. Dat is de lüttjeste Tall siet Weken. In Bremen gifft dat 13 nee’e Fälle, in Neddersassen 34.

Hüüt kummt dat Urdeel in’n Diesel-Schandaal

Karlsruh – In’n Dieselschandal kann de Autoboer VW villicht vundaag en slimme Nedderlaag insteken. De Bunnesgerichtshoff urdeelt hüüt, of Volkswagen an en Köper vun en Dieselfahrtüüg, an dat wat dreiht worrn is, Schadenersatt tahlen mutt. Bi de mündlich Verhannlung Anfang Mai hett de BGH erkennen laten, dat he dat Urdeel vun de Instanz, de vördem urdeelt hett, nich bekritteln ward. Dat Oberlannesgericht Koblenz harr den Kläger Schadenersatt vun 26-dusend Euro tosproken. Blifft de BGH darbi, köönt teindusende Autobesitter Schadenersatt kriegen.

Ward villicht wat entscheden över Karstadt-Geschäftssteden

Düsseldorp/Bremen - Vundaag ward sik woll wiesen, woans dat mit de Geschäftssteden vun de Warenhuuskeed Galeria Karstadt Kaufhof wietergeiht. De Keed is in Legerwall kamen. Hüüt wüllt de Böversten de Gewarkschupp Verdi över ehr Plaans för den Kunzern informeren. Ward vermellt un dat Ünnernehmen will 80 vun sien bunneswiet rund 170 Steden dicht maken. Of ok de Filialen in Bremen un Bremerhaben dartohöört, is noch nich klaar.

Dat Weer

Un nu een Blick op dat Weer: in Cuxhaben un an de Fischereehabenslüüs in Bremerhaben 11, an den Bremer Flegerhaben 12 un in Ossenbrügg sünd dat opstunns 13 Graad. Hüüt hollt sik erst faken dicke Wulken an’n Heben, dat pladdert aver meist nich. Later an’n Dag lockert dat dann ok mal op un de Sünn kiekt rut. Dat blifft wieter köhl bi 13 bit 16 Graad. Tokamen Nacht is de Heben oft licht wulkig un de Sterns funkelt af un an. Dat Thermometer sackt op 10 bit 7 Graad. Morrn blifft dat meist överall dröög bi Wulken, de vörbi treckt un veel Sünnschien. Dat ward wedder wärmer bi 17 bit 21 Graad. Middeweken un Donnerdag mal lachen Sünn, mal en paar Wulken un meist keen Regen bi köhleren 15 bit 19 Graad. Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Heidi Jürgens.