Plattdeutsche Nachrichten

De Plattdüütschen Narichten vun'n 26. Mai 2020

Plattdüütsch Narichten vun'n 26. Mai 2020, [3:57]

Thüringen: Kene Corona-Regeln mehr?

Erfurt: Dat Kabinett in Thüringen will vundaag doröver snacken, wat de Regeln wegen Corona womööglich nich mehr gellen schüllt. Vörher al harr Ministerpräsident Ramelow anseggt: In sien Land schüllt de meisten Regeln vun’n Disch. Afstand schüllt de Lüüd liekers noch inholen, un ok Masken schüllt se in bestimmte Situatschonen opsetten. Wo de Regeln överall lockert warrt, sett sik Bremens Börgermester Bovenschulte dorför in, dat in ganz Düütschland för Kontakten desülvigen Grundregeln gellt. Düsse Grundregeln kunnen denn je na de Corona-Tallen utleggt warrn.

Bunnsregerung: Wohrschau för Reisen schall to’n Deel vun’n Disch

Berlin: Dat lett: Wenn dat na de Bunnsregerung geiht, schall dat Wohrschau för Reisen bald nich mehr för överall in de Welt gellen. De Düütsche Press-Agentur vermellt: Dat Wohrschau för Reisen schall vun Mitt Juni för 31 Länner in Europa nich mehr gellen. Dat sünd de EU-Staaten un denn Grootbritannien, de Schweiz, Island, Norwegen un Liechtenstein. Dat kummt aver blots, wenn de Corona-Tallen wieder bargdaal gaht. Över so’n Papeer schall morgen al dat Bunnskabinett afstimmen. Bunnsbutenminister Maas harr Mitt März dat Wohrschau för Reisen na överall utgeven.

Corona-Tieden: Minschen gaht weniger na en Fachdokter

Hamborg: In Corona-Tieden gaht in Düütschland veel weniger Lüüd na en Fachdokter. De NDR hett bi Dokter-Verbänn un bi de Verenigungen vun Kassendokters un Kassentehndokters nafraagt un rutkregen: to’n Bispeel mellt Kardiologen un Onkologen blots noch dat Halve an Terminen. Bi Tehndokters weren dat sogor bet 80 Perzent weniger. De Lüüd schullen nu na de Fachdokters hengahn, meent de Verbänn – ok wenn de Termine bi den een oder annern Dokter knapp sünd.

Arcelor-Mittal will mehr Kortarbeit

Bremen: De Stahlkonzern Arcelor Mittal will woll noch mehr Lüüd in Kortarbeit schicken. Dat hett „buten un binnen“ vun de Gewarkschaft IG Metall to weten kregen. Wat dor achter stickt: Stahl warrt veel weniger bruukt. Vör allen de Autoindustrie gifft weniger Opdrääg rut. De IG Metall is bang, dat warrt ok in de tokamen Maanden nich beter. De Autoboers fraagt mehr un mehr op den Markt an, man se nehmt lever den billigeren Stahl ut anner Länner. Bet August hett Arcelor Mittal bet nu Kortarbeit anmellt.

Werder mutt gegen Mönchengladbach ran

Bremen: Werder will in de Bunnsliga blieven. Dorför mööt se vunavend Punkte halen. In’t Werserstadio geiht dat gegen Borussia Mönchengladbach. De staht op Tabellenplatz Fief. Los geiht dat Klock halvig negen. Wenn de Bremers winnt, hebbt se jüst so vele Punkten as Fortuna Düsseldörp. De staht op den Utspeelplatz 16 un mööt eerst morgen ran.

Dat Weer

Un woans süht dat mit dat Weer umto ut? Opstunns hebbt wi in Bremen 11 Graad, in Bremerhaven un Demorst sünd dat 12 un in Staad 13 Graad. Vundaag: Enige Wulken un en Barg Sünnschien. Vör allen na de Werser to ballt sik de Wulken tohoop, man ok hier blifft dat dröög. De meiste Sünn kriegt wi an de Ems to sehn. Wedder wat warmer mit 16 bet 22 Graad. De Wind dorto weiht flau vun de noorden bet noordwesten Kant. Tokamen Nacht: Eerst kloor, denn treckt Wulken dör, denn wedder kloor. Dröög bi 11 bet 6 Graad. Morgen: Lachen Sünnschien, man twüschendör kaamt ok mal Wulkenplacken vörbi. Dat blifft dröög bi 15 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.