Plattdeutsche Nachrichten

De Plattdüütschen Narichten vun'n 01. Juli 2020

Plattdüütsch Narichten vun'n 1. Juli 2020, [4:54]

As dat utsüht fallen ok in Bremen Steeden bi Airbus weg

Paris/ Bremen: De Flegerboer Airbus will vundaag vertellen, in wecke Warken in Düütschland Steeden wegfallen. Al güstern hett dat Ünnernehmen seggt, dat vunwegen dat Corona-Slamassel, um un bi 15.000 Steeden op de ganzen Welt wegfallen. 5000 dorvun in Düütschland, woll ok in dat Bremer Wark. Hier arbeiden 4500 Minschen in de Produktschoon de Lanneklappen an Flünken boet.

Gesettännerung vun 1. Juli af an

Berlin: Vun hüüt af an gifft dat in Düütschland mehrere Gesettännerungen. De Renten gahn na baven, in Westen um 3,45 un in Oosten um 4,2 Perzent. Dat bedütt, wer bet nu in Rohstand 1000 Euro per Maand harr, kriggt nu 34,50 Euro or in Oosten 42 Euro mehr per Maand. Vundaag sackt de Mehrweertstüer daal. Dormit de Verbruker wedder mehr inköfft, nimmt de Staat bet an dat Enn vun dat Johr 2020 man blots noch sessteihn statts negenteihn, un för Eeten un Drinken blots noch fief statts seben Perzent.

Tahlen vun Lüüd ahn Arbeit

Nürnbarg/Bremen/ Hannober: De Tahl vun Lüüd ahn Arbeit is in’n Junimaand wieder hooch gahn. De Quoot liggt nu bi
6,2. Dat sünd veertig-dusend mehr as in Maimaand. Ok in Bremen un Neddersassen is de Naklapp vun dat Corona-Slamassel op den Arbeitsmarkt düütlich to marken. In dat Land Bremen harrn in Juni um un bi
42.600 Minschen keen Job – dat sünd good 700 mehr as in Maimaand. De Quoot liggt in Momang bi 11,6 Perzent. En beten beter süht dat in Neddersassen ut. Hier is de Tahl vun Lüüd ahn Arbeit binnen vun een Maand um goot 3000 op knappe 264.860 hooch gahn. De Quoot blifft aver bi 6 Perzent.

Facebook maakt Konten vun rechtsextremen Gruppen in de USA dicht

Washington: Facebook hett op siene Plattform um un bi veerhunnert Konten vun Gruppen, de to een rechtsextremet Nettwark tohörn, dichtmaakt. Facebook see: Dat Nettwark sett sik in för Gewalt gegen Börgerslüüd, Sekerheitslüüd, Beamte un Regeerungsinstitutschoonen. Dormit gifft dat Ãœnnernehmen den Druck vun veelen Firmen na – mit dobi sünd Coca Cola, Unilever un Starbucks. Se harrn dat al langen bekriddelt, dat Facebook gegen Hassnarichten nich scharp noch achterangeiht un wohrschaut, Verdrääg für Reklaam-Aktschoon in Sack to haun.

Krankenhuus Reinkenheid sett Medikament Remdesivir in

Bremerhaben. In dat Krankenhuus Reinkenheid, wat de Stadt tohöört, kriegen Patschienten de böös an Corona krank wurrn sünd dat Medikament Remdesivir. De Medizin is bet nu noch nich heel un deel genehmigt, draff aver bi enkelte Patschienten to´n Insatz kamen. Eegentlich hebbt se dat för Ebola utklamüüstert. Dat Krankenhuus Reinkenheid hett siet um un bi twee Weken dree Patschienten mit Remdesivir behannelt, de böös an den Corona-Virus krank worrn sünd. Twee hebbt al de Intensivstatschoon verlaten.

Dat Weer

Un nu een Blick op dat Weer: In Cuxhaben un Bremen sünd dat 17 Graad, in Bremerhaben und Emden sünd dat 18 Graad. Vundaag geiht dat mit mal mehr mal weniger Wulken un ok mal natt los. Na´n Middag bet Namidaag hen kummt vun dat Emsland un dat Ossenbrügger Land deegte Reegenschuer op, hier un dor ok mit Gewidder. Achteran riet de Wulken op un de Sünn kiekt mal vörbi. De Wind weiht in Maaten bet frisch vun de südwest bet westen Kant. Dat Thermometer kladdert op 20 bet 24 Graad. Vunnacht seht wi mal mehr mal weniger Wulken. In de Hauptsaak töövt wi an de Küst op kräftige Regenschuer, in dat Binnenland is dat meist dröög. Dat Thermometer sackt denn op 15 bet 13 Graad. Morgen meist dichte Wulken, af un an seht wi de Sünn. In de Hauptsaak nördlich vun Bremen ok mol kräftige Regenschuer, de ok länger duern könnt un denn ok mal Blitz un Donnerslag mitbringen. Dat Thermometer schafft dat morgen op 18 bet 21 Graad.

Dat weren de Plattdüütschen Narichten. Tohoopstellt vun Carola Schwirblat. Op Platt trechtmaakt un vörleest vun Martina Brünjes.