Plattdeutsche Nachrichten

De Plattdüütschen Narichten vun'n 14. Juli 2020

Plattdüütsch Narichten vun'n 14. Juli 2020, [3:26]

Corona-Tests för Urlaubers ut Bremen

Bremen: Vun dat Land ut kann jeedeen, de vun’t Butenland trüchkummt, en Corona-Test maken un dor nix för betahlen. Dat Gesundheits-Ressort seggt: De Senat meent, wo nu mehr Minschen reist, kann sik dat Virus ok wedder mehr utbreden. Düsse Regel gellt nich blots för Lüüd, de ut Risiko-Gegenden kaamt, man för all Länner. De vun en Reis trüchkummt un en Test maken laten will, kann sik bi dat Börgertelefon ünner 115 mellen.

Veranstalters gaht in Bremen op de Straat

Bremen: Mit en Autotross dör de Bremer Binnenstadt hebbt Veranstalters güstern Avend op de lege Laag henwiest, in de Corona jem bröcht hett. De Politik schull jem mit Kredite un Toschüsse mehr ünner de Arms griepen. Um un bi 50 Wagen sünd bi de Demo mitfohrt. Dorbi weren Bedrievers vun Diskos, DJs, Ünnernehmen ut de Veranstaltungs- un Sekerheits-Technik un den Messe- un Bühnenbo.

Mehr Geld för den Huusholt in Bremerhaven

Bremerhaven: De Stadt-Regerung stellt vundaag en Afännerungs-Andrag för den Huusholt vör. Dor staht för düt Johr 7 Millionen Euro bavento binnen. Unnern Streek sünd denn 787 Millionen Euro in den Huusholt för Bremerhaven binnen. De Versammlung vun de Stadtverordneten schall dor ja to seggen. De Grönen hebbt al anseggt: Se wüllt dorgegen stimmen.

F̦hrerschien weg Рdat schall nakeken warrn

Berlin: De Bunnslänner wüllt nakieken, wat se Föhrerschiens, de se introcken hebbt, wedder utgeven köönt. De ne’e Stratenverkehrsordnung hett en formalen Fehler. De Länner hebbt den neen Straafgeld-Katalog eerstmal op Ies leggt. In de neen Regeln staht kloor strengere Strafen för de, de to gau fohrt.

Merkel: EU-Striet vunwegen Corona-Hölp gau ut de Welt bringen

Berlin: Düütschland un Italien wüllt den Striet wegen dat Corona-Hölps-Geld gau ut de Welt bringen. Wenige Daag vör dat EU-Top-Drepen hett sik Bunnskanzlersch Merkel op Slott Mesebarg mit den Baas vun de Regerung Conte an een Disch sett. Nich enige is sik de EU dorin, wat se dat Geld ut den Nee-Opbo-Putt ok as Toschuss rutgeven wüllt. Merkel un Conte seggt ja, de Nedderlannen un Öösterriek seggt nee.

Dat Weer

Un woans süht dat mit dat Weer umto ut? Opstunns hebbt wi in in Bremerhaven 17 Graad, in Brevöör sünd dat 18 Graad un in Bremen un Veern 20 Graad. Vundaag: Vun de Noordsee her treckt Regenwulken över dat Land. De Sünn kriegt wi meist gor nich to sehn. Dat Thermometer krabbelt op 17 bet 21 Graad. De Wind dorto weiht flau oder en beten mehr vun de süüdwesten bet westen Kant, an de See ok frisch. Tokamen Nacht: De Regen treckt pö a pö na Süüdoosten af, un vun Oostfreesland her lockert an’n Morgen de Wulkendeek op. Bi 13 bet 11 Graad. Morgen: Mal mehr, mal weniger Wulken, un dat pladdert blots noch af un an mal. Na de Küst to ok wat heller un fründlicher. Dat Ganze bi 17 bet 19 Graad.Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Peter Behrendt.