Plattdeutsche Nachrichten

De Plattdüütschen Narichten vun'n 15. Juli 2020

Plattdüütsch Narichten vun'n 15. Juli 2020, [4:18]

Studenten ut dat Butenland dröfft in de USA blieven

Washington: De USA wüllt nu doch nicht dusende vun Studenten ut dat Butenland utwiesen. Eerst hett de Regeerung plaant, Studenten, de man blots online-Kursen maakt, wedder in jümehr Heimatland trüch to schicken. 180 US-Universitäten, bovento ok 26 Städte un Bezirke, hebbt dorgegen klaagt. Nu is dat den Studenten ut dat Butenland wedder utdrücklich verlöövt, blots Online-Kursen to besöken.

China röppt Straaf gegen USA ut

Peking/ Washington: China hett Straafen gegen Börger un Steeden ut de USA utsproken.Dormit reageert dat Land op dat Straafengesett, wo Präsident Trump vunnacht sien Ünnerschrift ünner sett hett. Dor binnen steiht, dat se plaant, all to bestraafen de gegen dat `Autonomierecht´ vun Hongkong gegenan gaht. Dat kann de chineesch Top-Lüüd, as ok de Polizeibehöörd un ok Banken draapen. Vörher hett China een Sekerheitsgesett, as se dat nöömt, för Hongkong in´t Leven ropen, dat ok de Börgerrechte verknappt.

Bunnsregeerung will Stahlindustrie ünner de Arms griepen

Berlin: De Bunnsregeerung will de düütsche Stahlindrustrie mit dusende Arbeitssteeden, de in swore See kamen is, ünner de Arms griepen. Dor achter steiht: Blangenbi dat Corona-Slamassel, ok dat Grummeln överall op de Weltmärkte, as ok de vigeliensche Ümstellung op klimafründliche Produktschoon. Hüüt will dat Kabinett een Handlungsplaan Stahl in Gang setten. In dat Papeer warrt op de leege Laag vun düsse Branch henwiest. Ok dat Bremer Stahlwark hett al lang siene Produktschoon trüchnahmen, dat geiht um üm un bi
3500 Mitarbeiders.

Huusholt in Bremerhaben fastleggt

Bremerhaben: De Stadtverordnetenversammlung hett mit de Stimmen ut de Regeerungskoalitschoon ut SPD, CDU un FDP den Huusholt för düt Johr fastleggt. He hett een Voluum vun 787 Millionen Euro. Mehrstendeels will de Regeerung dat Geld för Bildung, Froenslüüd un Familie, as ok Sozialet utgeven. Butendem hebbt de Afordneten för den `Bremerhaben-Fond´, as se dat nöömt, stimmt. De Stadt kann nu mit Krediten vun bet to 70 Millionen Euro de bösen Folgen vun de Corona-Kniep afwennen.

City-Top-Drepen fangt in Bremen an

Bremen: Op dat `City-Top-Drepen´, as se dat nöömt, will de Root-Gröön-Rode Senaat ünner annere Saaken ok mit Vertreder vun Weertschap, Arbeitnehmerkaamer, Gewarkschaften, Geldgever un Maaten vun Beiraat Mitt över en Aktschoonsprogramm för de Bremer Binnenstadt snacken. De Corona-Pandemie hett de Laag vun Koophüüs in de Bremer Binnenstadt böös leeger maakt. Geschäftssteeden sünd leddig. De Koophüüs `Kaufhof´ un `Karstadt Sport´ schüllt tomaakt warrn. De Senaat bangt dorum, dat veele Lüüd de dor in de Binnenstadt arbeiden jümehr Arbeitssteden verleeren.

Dat Weer

Un nu kiekt wi op dat Weer: In Emden hebbt wi opstunns 15 Graad, in Bremen un Demorst 16 Graad un in Bremerhaben sünd dat 17 Graad. Vundaag mal mehr mal weniger Wulken, af un an gewiddrige Regenschuer. An de Nordsee schient de Sünn mehr un de Regen is weniger. De Wind weiht flau, an de Küst in Maaten vun de noord-westen Kant. Dat Thermometer kladdert op 17 bet 19 Graad. Vunnacht warrn de Schuer eerst weniger un denn sünd ok gau de Wulken weg. Laater warrn de denn aver vun Westen her wedder dichter, dat blifft aver meist dröög. Hier un dor kann dat ok Daak geven. Dat ganze denn bi 13 bet 8 Graad. Morgen seht wi in Bremen un umto mehr Wulken as Sünn un af un an kann dat ok mal pladdern. In Richtung Cuxhaben un Staad schient dorgegen meist de Sünn un dat blifft dröög. Dat Thermometer wiest denn 19 bet 20 Graad.

Dat weren de Plattdüütschen Narichten. Tohopstellt vun Carola Schwirblatt. Op Platt trechtmaakt un vörleest vun Martina Brünjes.