Plattdeutsche Nachrichten

De Plattdüütschen Narichten vun'n 20. Juli 2020

Plattdüütsch Narichten vun'n 20. Juli 2020, [2:49]

EU-Böverste snackt wieter över Corona-Hölp

Brüssel – De Staats- un Regeernbaas vun de EU snackt wieter op ehr Sünnerdrepen över de Corona-Hölp, de plaant is. Dat Verhanneln is an’n fröhen Morrn afbroken worrn un schall an’n Namiddag wietergahn. Ut Diplomatenkreisen heet dat, EU-Raatspräsident Michel harr in’n Striet över de Hölp en nee’en Vörslag maakt, so dat se all op een Brett kamen köönt.

Kreis Vechte mellt nee’e Fälle vun Corona

Lohne – In’n Landkreis Vechte hebbt sik in en Slachtbedreev en ganze Reeg Mitarbeiter mit dat Corona-Virus ansteekt. De Bedreev höört to den Wiesenhof-Kunzern to. Bi 66 Lüüd kunnen se dat Virus nawiesen. De Landkreis Vechte sütt aver erstmal keen Grund, de Minschen, de dar wahnt, in Schranken to setten. Ok de Slachthoff, üm den dat geiht, ward nich dicht maakt.

Ehemalig Wirecard-Vörstand is woll na Russland utbüxt

Moskau – De ehemalig Wirecard-Vörstand Marschalek is woll na Russland utbüxt. He schall op en Weeswark westlich vun Moskau ünner Opsicht vun’n russischen Militär-Geheemdeenst stahn, vermellt dat Hannelsblatt. Vördem harr he woll grode Summen Geld ut Dubai na Russland schafft, heet dat wieter.

Mars-Mission vun de Arabischen Emirate geiht los

Tokio – De erste Mars-Mission vun de Vereenigten Arabischen Emirate is vun en Weltruumbahnhoff in Japan in’t All afhoben. De Start is wegen dat Weer jümmer wedder verschuven worrn. De arabische Fleger schall in’n Februar anfangen, den Roden Planeten to umrunnen un dar de Atmosphär ünnersöken.

Papenborger Meyer-Warft maakt länger Bedreevsferien

Papenborg – De Meyer-Warft fohrt ehrn Bedreev vorerst meist heel un deel runner. Dat Ãœnnernehmen geiht bit to’n 30. August in verlängerte Bedreevsferien, hebbt se vermellt. De Warft antert darmit op de Flaute bi de Opdrääg. Wegen Corona steiht dat üm de Krüüzfahrtbranche jüst nich so goot.

Dat Weer

Un nu een Blick op dat Weer: in Bremervöör 15, an den Bremer Flegerhaben 16, an de Fischreehabenslüüs in Bremerhaben 17 un op Spiekeroog sünd dat opstunns 18 Graad. De Schuers vun’n Morrn un Vörmiddag treckt af un dat ward fründlicher. Wegen de Polarluft, de to us kamen is, ward dat blots noch 18 bit 21 Graad warm. Tokamen Nacht is dat in’t Binnenland faken licht wulkig, an de Küst treckt dat ok mal mehr to un en paar Druppen köönt fallen. Dat Thermometer sackt op frische 13 bit 9 Graad. Morrn kiekt blangen en paar Wulken jümmer wedder de Sünn rut, dar kann op ok mal en Schuer darbi ween - bi 17 bit 19 Graad. Ok Middeweken schient jümmer wedder mal de Sünn, man dat kann ok mal pieseln bi wieter köhlen 17 bit 19 Graad. Dat weern de Nahrichten op platt.  Jan Siegert hett se tohoopstellt. Op Platt trechtmaakt un vörleest hett se Heidi Jürgens.