Plattdeutsche Nachrichten

De Plattdüütschen Narichten vun'n 21. Juli 2020

Plattdüütsch Narichten vun'n 21. Juli 2020, [2:55]

Brüssel: 750-Milliarden-Paket is trecht

Brüssel: De EU-Staaten hebbt dat gröttste Geld-Paket in jemehr Geschicht annahmen. Bet 2027 geiht dat um 1,8 Billionen Euro. Dorbi sünd 1074 Milliarden för de tokamen söven Huusholtsjohren un 750 Milliarden för en Wirtschafts- un Hölpsprogramm, dat se mit Corona kloor kaamt. Över dat, wat löppt un wat nich löppt, harrn de Böversten vun de Staaten un Regerungen siet Freedag verhannelt.

Seehofer will Studie to Gewalt gegen Schandarms

Berlin: Binnenminister Seehofer verlangt en Studie to Gewalt gegen Schandarms. Wat dor achter stickt, is de Krawall in Frankfort un Stuttgart. Den Münchner Merkur sä Seehofer: Dat weer wichtig ruttokriegen, woso de Schandarms siet längere Tiet utschimpt un minnachtig ankeken warrt.

Perzess wegen Anslag in Halle geiht los

Maideborg: De Mann, vun den se meent, he harr vör negen Maand in Halle en Anslag op en Synagoog maakt, steiht vun hüüt op an vör Gericht. In Maideborg geiht dat för den Mann vun 28 Johr ok um zweemal Moord. As he nich in de Synagoog rinkamen kunn, hett he twee Minschen op de Straat dootschaten. Mit en Ordeel rekent se in’n Oktober.

Düütsche Fro in Bagdad versleept?

Bagdad: Dat lett: En düütsche Fro is in Bagdad versleept worrn. Wokeen dat maakt hett, un woso, dat weet se noch nich. Maakt hebbt dat Lüüd mit Gewehren. De düütsche Botschaft in Bagdad wull noch nix to de Saak seggen.

Schaden för Bremer Tourismus

Bremen: De Schaden för de Tourismus-Bedrieven in Bremen is groot. Alleen in’n März un April fehlt um un bi 260 Millionen Euro in de Kass. In en Studie vun dat Wirtschaps-Ressort steiht binnen: Dat liggt vör allen an Messen un Kongresse, de afseggt worrn sünd.

Dat Weer

Un woans süht dat mit dat Weer umto ut? Opstunns hebbt wi in Bremen 16 Graad, in Bremerhaven, Emm un Brevöör sünd dat 17 Graad. Vundaag: Af un an treckt Wulken dör, en beten pladdern kann dat ok, anners aver lacht uns de Sünn. Dat Thermometer krabbelt op 18 bet 20 Graad. De Wind dorto weiht flau oder en beten mehr vun de noordwesten Kant. Tokamen Nacht: An de Küst mal mehr, mal weniger Wulken, un dat kann ok noch pladdern. In’t Binnenland weniger Wulken oder kloor un dröög. Bi 13 bet 9 Graad. Morgen: Eerst fründlich, denn treckt Wulken op, de sik gegen Avend wedder oplööst. En lütt beten drüppeln kann dat ok, man egentlich blifft dat dröög. Dat Ganze bi 17 bet 20 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Laura Knepper.