Plattdeutsche Nachrichten

De Plattdüütschen Narichten vun'n 22. Juli 2020

Plattdüütsch Narichten vun'n 22. Juli 2020, [3:51]

Trump seggt to´n eersten Mal: Dat is goot Masken to drägen

Washington: US-Präsident Trump hett sik ümdreiht un nee anfungen bi dat Thema Masken to drägen. To´n eersten Mal hett de Amerikaner nu verlangt, een Schutz över Snuut un Nääs to drägen, wenn dat nich mööglich is de Afstandsregeln intoholen. Op Twitter hett Trump kort un knapp dorto seggt: Dat is „patriotisch“. Maandelang hett de Präsident de Mask aflehnt as Middel gegen dat Virus, dat mehr un mehr warrt.

Stüerinnahmen gahn in Neddersassen in de Knee

Hannober: De Stüerinnahmen in Neddersassen sünd düütlich in de Knee gahn. Dat Finanzministerium see: Se sünd in dat eerste Halfjohr üm 8,2 Perzent trüch gahn – dat sünd 1,2 Milliarden Euro. För dat Gesamtjohr 2020 rekent de Finanzminister Hilbers sogor mit en Minus vun 3,4 Millarden Euro. He will so gau as dat geiht to een liekrekent Huusholt trüch. Af 2024 – so de Plaan – künnt Neddersassen denn wedder Schulden trüchbetahlen.

Corona-Slamassel drauht Kinnerarmot leger to maken

Gütersloh: Mag ween dat de Kinnerarmot dör de Corona-Kniep leger warrt. In ene Studie vun de Bertelsmann-Stiftung steiht: Forscher sünd bang, vunwegen dat Öllern vun Kinnern de vördem al in Schadden stahn, meist Arbeitssteden hebbt mit minner Stünnen or Minijobs. Dormit hörn se to de Grupp, de licht de Jobs verleert or man blots wenig Kortarbeidergeld kriggt. In de Studie steiht ok, dat jedet föffte Kind in Düütschland Geld vun Staat bruukt. In Neddersassen kriggt jedet söbente Kind Grundsekerung, in Bremen binah jedet drütte.

Maschinruum vun Buernhoff dör een Füer kaputt maakt

Eydelstedt: Dör en Füer op en Kantüffelbedrief in den Landkreis Deepholt is hoogen Schaaden an Saaken bi rutsuert. Brennt hett ene groote Hall mit ene Solar-Anlaag op dat Dack, dor binnen stunnen Geräte vun den Buernhoff. De Füerwehr weer mit um un bi 150 Hölpslüüd to gange. De Schaaden warrt op 1,4 Millionen Euro taxeert.

Grote Boosteed an Bremer Hauptbahnhoff: Warrt woll Staus geven

Bremen: Wegen de grote Boosteed mööt Autofohrer in tokamen Weken woll rund um den Bremer Hauptbahnhoff umto mit Staus reken. In de Nacht warrn de Gustav-Deetjen-Tunnel un de Hermann-Böse-Straat dicht maakt. Wagen, Bussen un en grooten Deel vun de Stratenbahnen könnt denn wekenlang nich mehr dör den Tunnel dör. Dat is de Utlöser: De Bremer Stratenbahn-AG mutt binah fiefhunnert Meter Gleisen un en poor Wieken nee maken. De Arbeiden schullen bet Anfang Septembermaand duern.

Dat Weer

Un nu kiekt wi op dat Weer: Opstunns sünd dat in Emden sessteihn Graad, in Bremen, Bremerhaben un Demorst sünd dat söbenteihn Graad. Vundaag wesseln sik Sünn un Wulken af. An de Küst kann dat an Vörmiddag ok mol dröppeln. An Middag un Namiddag kann dat denn in dat ganze Senderrebeet Schuer geven. Meist blifft dat aver dröög. Vundaag weiht de Wind flau af un an ok in Maaten vun de noord-westen Kant. Dat Ganze bi söbenteihn bet twintig Graad. In de Nacht is dat an de Küst dröög un wulkig. Vun dat Ollenborger Land bet in de Veerner Heid is dat meist blots minner wulkig or ok klor un dröög. Dat Thermometer sackt denn op darteihn bet söben Graad. An Dunnersdag is dat mal mehr mol minner wulkig, dat blifft meist dröög. Dat Thermometer kladdert denn op negenteihn bet dreeuntwintig Graad.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.