Plattdeutsche Nachrichten

De Plattdüütschen Narichten vun'n 23. Juli 2020

Plattdüütsch Narichten vun'n 23. Juli 2020, [3:24]

Corona-Tests för Reisende, de ut Risiko-Flachs trüchkamt

Berlin – Minschen, de in een Risiko-Flach in’t Utland reist sünd, schüllt in Tokunft in Dütschland op dat Coronavirus ünnersöökt weern, wenn se trüchkamt. Darto schüllt an Flegerhabens Steden to’n Testen opstellt weern. Darop hebbt sik de Gesundheitsminister vun Bund un Lännern verstännigt. Bitnu is nich klaar, wokeen de Tests betahlt. Morrn wüllt de Minister nipp un nau daröver snacken un vun Amts wegen wat besluten.

US-Regeern foddert Striet üm Bunnespolizisten rut

Chicago – De US-Regeern will hunnerte Bunnespolizisten in mehrere Grootstäden schicken. Se schüllt ünner annern in Chicago, Albuquerque un Kansas City insett weern. US-Präsident Trump sä, dat weer, wiel dar de Kriminalität jümmer duller ward. Politiker vor Oort lehnt dat Schicken vun Spezialtrupps dör dat Heimatschutzministerium af.

Nee’er Freewilligen-Deenst ward vörstellt

Berlin – De Ministerin för Verdeffenderen, Kramp-Karrenbauer, stellt in düssen Minuten een nee’en Freewilligen-Deenst bi de Bunneswehr vör. He schall to den Freewilligendeenst, den dat all gifft, darto kamen un ünner dat Motto: „Dien Johr för Dütschland“ stahn. De Sotschalverbänne bekrittelt dat. Se seggt, dat gifft all noog Weeg sik för den Tosamenhalt in Dütschland intosetten – to’n Bispill bi dat Freewillige Sotschale Johr or dat Freewillige Ökologische Johr.

Wetenschuppler ünnersöökt de Noordsee

Bremerhaben: Wetenschaftler vun dat Bunnesamt för Seeschipptörns un Hydrographie sett sik vundaag in Gang to een dree-Weken-Forschungs-Reis op de Noordsee. Se wüllt an 100 Steeden Temperatur, Solt-Andeel, Dichte un den Andeel vun goden Stoffen un Schaadstoffen fastleggen. De Daten sünd in de Hauptsaak för de Klimaforschung wichtig. Se warrt to‘n Bispill bedacht bi den dütschen Kurs för dat Naregeln bi den Klimawannel. Dat Bunnesamt geiht düsse Saak jedet Johr op‘n Grund – dütt Johr all to‘n 23. Mal.

Mann verdrinkt in’n Industriehaben Emden

Emden – Een 67-jöhriger Mann is in den Industriehaben in Emden fullen un woll verdrunken. As de Polizei vermellt, wull de Ossenbrügger güstern vun een fast maakt Boot runner un is vun’n Steg in dat Habenbecken fullen. Een, de dat sehn hett, wull hölpen – man erst de Redderslüüd hebbt dat henkregen, den Mann ut dat Water to holen. Se kunnen em aver nich mehr hölpen. De Staatsanwaltschupp Auerk hett Order geven, de Liek to ünnersöken.

Dat Weer

Un nu een Blick op dat Weer: op Wangerooge 15, an de Fischereehabenslüüs in Bremerhaben 16, an den Bremer Flegerhaben 17 un in Ossenbrügg sünd dat opstunns 18 Graad. Hüüt wesselt sik dicke Wulken un een beten Sünnschien af un dat blifft bit op een paar Druppen an de Küst dröög – bi 19 bit 23 Graad. Tokamen Nacht is dat denn meist dick wulkig, vör allens later in de Nacht fallt Regen. Dat Thermometer sackt op 16 bit 13 Graad. Morrn ward dat Weer mal so, mal so. Blangen Sünnschien treckt de Heben to un dat ward pladdern. To’n Deel kummt ok Grummelschuers op. An’n Namiddag kann dat aver wedder oplockern bi 19 bit 22 Graad. Sünnabend mal Sünn, mal Wulken un blots noch af un af Regen bi 21 bit 23 Graad. Dat weern de Nahrichten op platt. Gabriele Intemann hett se tohoopstellt. Op Platt trechtmaakt un vörleest hett se Heidi Jürgens.