Plattdeutsche Nachrichten

De Plattdüütschen Narichten vun'n 27. Juli 2020

Plattdüütsch Narichten vun'n 27. Juli 2020, [3:09]

Corona-Tallen in St.Wolfgang kladdert na baben

St. Wolfgang – De Tall vun de Corona-Fälle in St. Wolfgang in Ober-Österriek kladdert wieter na baben. Middewiel sünd mehr as 50 Minschen positiv testet worrn, vermellt een Spreker vun’t Amt. Schient so un vele vun de Minschen mit Corona sünd junge Lüüd, de in de Tourismusbedreve arbeidt, man ok tominnst een Feriengast is positiv. To dat Flach an’n Wolfgangsee reist ok de dütschen Urlauber bannig gern.

SPD-Politiker loovt Leven vun Hans-Jochen Vogel

Bremen – Börgermeister Bovenschulte hett den SPD-Politiker Hans-Jochen Vogel, sien persönlich Vörbild nöömt. Vogel harr sik „in den rund 50 Johren vun sien Schaffen för Staat, Sellschupp un sotschale Demokratie in Dütschland“ stark maakt. För Neddersassens Ministerpräsident Weil weer Vogel all een Legende, as he noch leevt hett. De ehemalig SPD-Baas un langjöhrige Bunnesminister weer güstern in’n Oller vun 94 Johren in München sturven.

Se snackt över Corona-Test-Plicht för Urlauber

Berlin – Bunnespolitiker snackt daröver, een Corona-Test för Lüüd, de ut’n Urlaub in een Corona-Risiko-Rebeet trüchkamt, to Plicht to maken. FDP-Baas Lindner sä in’n ZDF, fastschreven Tests för Minschen an Flegerhabens dröfft keen Tabu sien. De Folgen för de Wertschupp un de Gesundheit vun een tweete Infektschons-Well weern nich to verantwurten. Ok CSU-Lannesgruppenbaas Dobrindt is för een Test-Plicht. De Gesundheitsminister vun Bund un Lännern hebbt bitnu besluten, dat Lüüd, de ut Risiko-Flachs trüchkamt, sik an’n Flegerhaben vun sik ut testen laten köönt.

Ward woll noch wat lockert in Bremer Alten- un Pleegheimen

Bremen – De Senat plaant noch mehr Lockerungen in Alten- un Pleegheimen. De Lannesregeern will ünner annern de Tall vun de Besökers un de Duer nich mehr een P vörsetten. Bitnu gellt, dat een Besöök nich mehr as twee Stunnen duern draff un ok de Persoon, de ehrn Verwandten besöökt, draff bitnu blots Week för Week wesseln. Man Afstand hollen un een Mask drägen mööt se wieter.

Gegner vun Werder Bremen in’n DFB-Pokal steiht noch nich fast

Bremen – In de erste Runn vun’n DFB-Pokal mutt Werder Bremen bi’n Sieger vun thüringschen Lannespokal ran. Dat is güstern Abend utloost worrn. Wokeen nipp un nau gegen Werder speelt, steiht erst an’n 22. August fast. Dat kunn to’n Bispill Jena sien.

Dat Weer

Un nu een Blick op dat Weer: op Langeoog 16, an den Bremer Flegerhaben 17, an de Fischreehabenslüüs in Bremerhaben un in Ossenbrügg sünd dat opstunns 19 Graad. Hüüt kiekt de Sünn af un an dör de Wulken, later kann dat aver ok mal een beten Regen geven – bi 20 bit 23 Graad. Tokamen Nacht mal mehr, mal minner wulkig, besünners an de Küst fallt ok een paar Druppen. Dat ward recht mild bi 17 bit 16 Graad. Morrn ward dat fründlich mit een beten Wulken. Schuern kann dat ok bi 20 Graad op de Eilanden un 22 Graad in’t Binnenland. Middeweken mal dicke, mal lichte Wulken an’n Heben, de Sünn wiest sik ok mal un dat kann pladdern. Dat ward köhler bi 17 bit 19 Graad. Dat weern de Nahrichten op platt. Peter Behrendt hett se tohoopstellt. Op Platt trechtmaakt un vörleest hett se Heidi Jürgens.