Plattdeutsche Nachrichten

De Plattdüütschen Narichten vun'n 29. Juli 2020

Plattdüütsch Narichten vun'n 29. Juli 2020, [3:36]

Strengere Regeln för Fleeschweertschop

Berlin: Dat Bunnskabinett will strengere Regeln för de Fleeschweertschop fastleggen. Se worrn bekriddelt, vunwegen de veelen Kranken mit den Corona-Virus. Af tokamen Johr an, schall dat in groote Fleeschbedrieve keen Warks- un utlehnte Arbeiters mehr geven, heet dat in dat nee Gesett. Dat höögste Straafgeld warrt verduppelt vun 15.000 op 30.000 Euro.

Kassen schullen Coronatest för reisen Lüüd ut dat Butenland betahlen

Berlin: De gesettliche Krankenversekerung schall, as dat utsüht, de Corona-Tests för all reisen Lüüd de ut dat Butenland trüchkaamt övernehmen. Dat mellt de Spegel, se seggen, dat steiht in dat plaante Papeer vun dat Bunnsgesundheitsministerium. De Behöörd taxeert de Kosten op foftig Millionen Euro. Dat süht so ut, as wenn för reisen Lüüd ut Risikorebeete de Tests Plicht warrn schüllt. All anner Lüüd de ut dat Butenland trüchkaamt, könnt sik freewillig testen laaten.

Verkehrte Informatschoon an Afordnete in den Wirecard-Bilanzschandaal

Berlin: In den Wirecard-Bilanzschandaal hett de Finanzopsichtsbehöörd verkehrte Informatschoon an de Afordneten vun Bunnsdag togeven, seggt de Spegel. Also hett de Bankenopsicht al siet Anfang verleden Johr mit de Schandarms in Singapur tohooparbeid. De böverste Etaasch vun de Behöörd harr dat betto nich togeven. Vun Singapur ut hett de Geldgeschäftenafwickler sien Asiengeschäft stüert. Dat Ünnernehmen musst Insolvenz anmelln, woll wegen Geld un Goot vun binah twee Milliarden Euro in de Bilanz, wat verkehrt is. Vundaag snackt de Finanzutschuss vun Bunnsdag doröver.

Törkei maakt mehr Druck op Kontrollen över Online-Nettwarken

Ankara: De töörksche Regeerung will Online-Nettwarken leger kontrolleeren. Dat hett dat Parlamet besluten. Facebook un Twitter mööt nu de Daten vun Lüüd de dat bruken, op Servern in de Törkei sekern. Ok mööt se binnen veer-un-twintig Stünnen bestimmte Saken de dor binnen stahn löschen, wenn een töörksch Gericht dat anwiest.

Haven-Weertschaftsmess fallt ut

Bremen: De Mess för Sworgootlogistik, Breakbulk Europe 2020 in Bremen is nu een för allemal afseggt. Wegen de Corona-Kniep hebbt se dat al vun Fröhjohr op den Harvst verleggt. De gröttste Mess vun de Havenweertschop op de ganzen Welt weer för Enn vun Septembermaand plaant. 2021 schall de Mees na Plaan Mitt Maimaand stattfinnen.

Dat Weer

Un nu kiekt wi op dat Weer: In Bremerhaben un Willemshaben sünd dat opstunns 16 Graad, in Bremen un Deepholt hebbt wi 17 Graad. Vundaag seht wi blangenbi de Sünn ok wedder een poor Wulkenfeller, an de Noordsee bringen de ok mal Schuer mit. De Wind weiht frisch an de See gifft dat ok starken Westwind mit stöörmsche Böen, in Schuer- un Küstenneegde hier un dor ok Stormböen. Dat Thermometer kladdert meist blots noch op 18 bet 20 Graad. In de Nacht warrn de Schuer weniger un dat lockert bi lütte Wulken op. Een Tiet lang könnt wi de Steerns funkeln sehn. Dat Thermometer sackt denn op 14 bet 9 Graad. Morgen stellt sik en fründlichen Wessel vun Sünn un losen Wulken in, dorbi blifft dat dröög. Dat Thermometer schafft dat den op 21 bet 23 Graad.

Dat weren de Plattdüütschen Narichten. Tohoopstellt vun Carola Schwirblat, op Platt trechtmaakt un vörleest vun Martina Brünjes.