Plattdeutsche Nachrichten

De Plattdüütschen Narichten vun'n 30. Juli 2020

Plattdüütsch Narichten vun'n 30. Juli 2020, [3:11]

Minister Altmaier sütt keen Fehler bi’n Wirecard-Schandal

Berlin – Bunneswertschuppsminister Altmaier sütt in’n Wirecard-Schandal keen Fehler bi de Opsicht över de Wertschuppspröfer. De tostännige Stäe harr to jede Tied de richtigen Schreed maakt, sä de CDU-Politiker na sien Befragen in’n Finanzutschuss vun’n Bunnesdag. Vör em hebbt se ok Bunnesfinanzminister Scholz utfraagt. De hett gaue Reformen to’n Stütten vun de Finanzopsicht un een heel un deelet Opklären vun den Bilanzschandaal versproken.

Fleeschindustrie prööft Klaag gegen nee’et Gesett

Berlin – Vertreder vun de Fleeschindustrie wüllt villicht gegen dat nee’e Gesett vun de Bunnesregeern för dat Wertschuppsfeld klagen. Dat wees een orrig Mitsnacken bi de rechtlich Struktur vun de Ãœnnernehmen, sä de böverste Geschäftsföhrerin vun’n Verband vun de Fleeschwertschupp, Harstick, to de Zeitung „De Welt“. Arbeitsminister Heil will dar veel to veel, meent se. De Bunnesregeern harr güstern ünner annern besluten, Werkverdrääg in Slachthoffs to verbeden.

Tallen vun de Lüüd ahn Arbeit

Nürnbarg/Bremen – Wegen Corona is de Tall vun de Lüüd ahn Arbeit in Dütschland wieter na baben kladdert. De Bunnesagentur för Arbeit hett in’n Juli üm un bi 2,91 Millionen Lüüd ahn Arbeit tellt, dat sünd 57-dusend Minschen mehr as in’n Juni. De Quoot liggt bi 6,3 Perzent. Ok in Bremen un Neddersassen is de Tall na baben gahn: in Bremen harrn in’n Juli 43.200 Minschen keen Job, in Neddersassen weern dat knapp 270-dusend.

Bremen mellt fief nee’e Corona-Fälle

Bremen – De Ämters hebbt in dat lüttjeste Bunnesland fief nee’e Corona-Fälle faststellt. Veer darvun in de Stadtgemeend Bremen un een nee’en Fall in Bremerhaben. Opstunns hebbt sik hier 66 Minschen mit dat nee’e Virus ansteken. In Neddersassen gifft dat siet güstern 59 nee’e Coronavirus-Fälle, de se faststellt hebbt.

Fähr vun Bremerhaben na Helgoland fohrt wedder

Bremerhaben – Vun de Seestadt fohrt hüüt to’n ersten Mal wedder een Fähr in Richt Helgoland. Wegen de Corona-Pandemie beed de Reederee in düssen Sommer blots dree Fohrten an. Anstatt rund 800 Gästen dröfft buterdem blots 350 an Boord. De annern beiden Touren starten an’n 12. un 13. August.

Dat Weer

Un nu een Blick op dat Weer: op Wangerooge un an de Fischreehabenslüüs in Bremerhaben 17, an den Bremer Flegerhaben un in Ossenbrügg sünd dat opstunns 18 Graad. Hüüt wesselt sik Wulken un Sünnschien af – an de Küst sünd een beten mehr Wulken ünnerwegens, bi 20 bit 23 Graad. Tokamen Nacht lockert de Heben op un dat blifft dröög. Dat Thermometer sackt op 14 bit 10 Graad. Morrn schient faken den helen Dag de Sünn, blots een paar lichte Wulken treckt vörbi un Regen ward nich fallen. Darto ward dat een beten wärmer mit 22 Graad op de Eilanden un bit to 28 Graad in’t Binnenland. Sünnabend veel Sünnschien, later treckt dat een beten to un dat kann schuern, ok mit Blitz un Donner, bi 25 bit 29 Graad. Dat weern de Nahrichten op platt. Jan Siegert hett se tohoopstellt. Op Platt trechtmaakt un vörleest hett se Heidi Jürgens.