Plattdeutsche Nachrichten

De Plattdüütschen Narichten vun'n 18. September 2020

Plattdüütsch Narichten vun'n 18. September 2020, [3:26]

KfZ-Stüer ward nee opstellt

Berlin – De Bunnesdag hett an’n Abend een Reform vun de KfZ-Stüer besluten. Vun’t tokamen Johr an stiegt de Stüer för nee’e Autos, de veel Sprit verbruukt. De Afgaav hangt nu bold mehr mit dat Utstötten vun Co2 tosamen. De Minschen schüllt darto bröcht weern, Autos to köpen, de nich so veel verbruukt. Buterdem schall dat Freestellen vun de KfZ-Stüer för reine Elektrofohrtüüg bit to’n Enn vun’t Johr 2025 wieter lopen.

De mehrsten Dütschen wüllt Moria-Flüchtlingen helpen

Berlin – De Mehrheit vun de Dütschen seggt in’n Groden un Ganzen „Jo“ to dat Opnehmen vun Minschen ut Moria. In’n nee’en ARD-Dütschlandtrend sünd 87 Perzent vun de Lüüd, de se fraagt hebbt, darför, Flüchtlinge ut dat afbrannte Lager optonehmen. Man de Hälft vun jem is de Meen, dat se in’t heele Europa verdeelt weern mööt. Dütschland plaant, üm un bi 1500 Minschen vun de greekschen Eilanden nah Dütschland to holen – man meist keen Flüchtlinge ut Moria.

Keen Anteken för Rechtsextreme bi de Bremer Polizei

Bremen – De Binnenbehöörd hett bi de Bremer Polizei keen Anteken för Fälle vun Rechts-Extremismus funnen, as in Nordrhein-Westfalen. Dat vermellt een Sprekersche. De Böversten hebbt aver een Oog op de Saak. Dat wiest sik daran, woans se gegen dree Bremer Beamte vörgahn sünd, de wat böös över vermoden Verbreker seggt hebben schüllt. Vun’n 1. November an ward buterdem jümmer wedder mal kuntrulleert, of Polizisten in Bremen un Bremerhaben de Computer na Daten affraagt, de se nich affragen dröfft.

In Deelen vun Neddersassen ward keen Breefe un Pakete verdeelt

Hannober – De Post- un Pakettosteller in’n Nordwesten vun Neddersassen maakt hüüt un morrn een Striek to’n Wahrschaun. Darüm kann dat mit dat Tostellen vun Brefen un Paketen vör allens in Osterholt-Scharmbeck, Demorst, Otterbarg un Sieke nich so rund lopen. Bremen un Bremerhaben sünd vun den Laway düttmal woll nich bedrapen, vermellt verdi. De Gewarkschupp foddert för de Arbeiters 5,5 Perzent mehr Geld.

De Elbtunnel is dat hele Wekenenn dicht

Hamborg – An’n Wekenenn köönt Autofohrers nich dör den Elbtunnel fohrn. To’n ersten Mal siet sien Openmaken vör mehr as 45 Johren ward de Autobahn 7 an düsse Stäe för een helet Wekenenn dicht maakt. Hüüt Abend üm Klock tein geiht dat mit dat Dichtmaken los un erst an’n Mondag fröh ward de Tunnel wedder freegeven. Darachter stickt, dat se wat för den Boo praat maken mööt, wiel de Autobahn in’t Habenrebeet op acht Sporen breeter maakt weern schall. Buterdem ward dar een Ramp direktemang an’n Elbtunnel afreten.

Dat Weer

Un nu een Blick op dat Weer: an de Fischreehabenslüüs in Bremerhaben un in Deefholt 11, an den Bremer Flegerhaben 12 un op Langeoog sünd dat opstunns 14 Graad. Vundaag schient de Sünn un dat is dröög, blots een paar Wulken treckt mal vörbi – bi 17 bit 20 Graad. Tokamen Nacht funkelt de Sterns or lichte Wulken sünd an’n Heben. Dat blifft dröög un dat Thermometer sackt op 11 bit 5 Graad. Verenkelt kann ok Boddenfrost darbi ween. Morrn sünd een paar hoge Wulkenfelder, to de Küst hen ok mal een paar Quellwulken ünnerwegens. Tohoopnahmen blifft dat aver fründlich un dröög, bi 18 bit 21 Graad. Sünndag veel Sünnschien, meist keen Wulken un keen Regen bi 20 bit 23 Graad. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Heidi Jürgens.