Plattdeutsche Nachrichten

De Plattdüütschen Narichten vun'n 21. September 2020

Plattdüütsch Narichten vun'n 21. September 2020, [3:48]

Spahn will buten de Krankenhüüs „Feverambulanzen“ inrichten laten

Berlin: Bunnsgesundheitsminister Spahn will so nömte „Feverambulanzen“ inrichten, för Lüüd mit Hoosten un de keen Luft kriegen. Dat hett de Minister to de rheinischen Post seggt. He will, dat de kassenärztliche Verenigung de Steeden, buten de Krankenhüüs, inricht. All in`t Harvst schüllt se överall inricht sien, so mucht he dat gern sehn. Ok plaant he flinke Reihen- un Antigentests, to de rechten Tied för Pleegheime. Bit in de Midde vun Oktober will he eene Corona- Teststrategie, för den Harvst, mit de Länner utklamüüstern.

Corona-Laag in Cloppenborg wieter leeg

Cloppenborg: De Tall vun Corona-Neeinfektionen is wieter hooch gahn. De Polizei hett veele Kontrollen, wegen de scharperen Hygieneregeln gegen Corona, maakt. Man wat dorbi rutsuuert is, is deels heel gräsig, seggt se. Cloppenborg is in Neddersassen de eenzige Landkreis, wo de Tall vun de Nee-Infektionen siet Dagen över den Grenzwert liggt. Op Platz Twee is de Region Hannover un op den drütten Platz liggt Salzgitter.

School-Top-Drepen in`t Kanzleramt

Berlin: Bunnskanzlerin Merkel, Bunnsbildungsministersch Karliczek, SPD-Böverste Esken un de Kultusminister vun de Bunnslänner besnackt sik an`t Avend över de Laag an de Schoolen to Corona-Tieden. Vertreder vun Bund un Länner seggt noch mal wedder kloor, dat dat mööglichst nicht wedder to dat totale Dichtmaken vun de Schoolen, as in`t Fröhjahr, kummt. Karliczek hett de ganze Bevölkerung noch mal wedder opropen de Hygieneregeln intohollen, un so den Schoolbedriev, in de Corona-Pandemie, to sekern. De School is keene isolierte Veranstaltung, seggt se.

Linke gifft de Post Stütt bi Tarifkonflikt

Bonn: In den Tarifkonflikt bi de Post kriggt de Gewarkschaft Verdi Stütt vun de Linken in`t Bunnsdag. De Gewarkschaft Verdi verlangt 5,5 Perzent mehr Geld för de Post-Anstellten. Un dat is afslut rechtens, seggt de gewarkschaftspolitische Spreker vun de Linken-Fraktion, Meiser. He fordert vun`t Bund, dat dörtosetten, wiel he bi de Post Groot-Aktionär is, de veel mittosnacken hett. Bit nu hett de Post, luut Verdi, blots een Plus vun 1,5 Perzent anbeden. Gegen Middag geiht dat in de drütte Runn to`n Verhanneln.

EU-Butenminister besnackt sik över Straafen gegen Belarus

Brüssel: Bi een Drepen vun de EU-Butenminister snackt se över de Situation in Belarus. Druck kann dat meist op dat lütte EU-Land Zypern geven. Zypern will nich de plaanten EU-Straafen gegen de, de den Präsidenten Lukaschenko ünner de Arms griept. Se willt dor en P vörsetten. Zypern will eerst Straafen för de Törkei. Beide Länner kabbelt siet langer Tied um Erdgas-Ünnersöken in´t östliche Middelmeer. In Belarus warrd siet weeken de Demonstrationen gegen de Präsidentschaftswahl brutal daalslaan.

Dat Weer

Un nu een Blick op dat Weer: in Syke un an de Fischreehabenslüüs in Bremerhaben 13, an den Bremer Flegerhaben un in Wilhelmshaben sünd dat opstunns 14 Graad. Hüüt schient den ganzen Dag de Sünn, dor is keene Wulk an`t Heven, bi 20 bit 23 Graad. Tokamen Nacht keene Wulken un dröge. Hier un dor kummt Flach mit Dark op. Dat Thermometer sackt op 10 bit 12 Graad. An Dingsdag erst noch Dies un Dark, man denn lacht uns wedder de Sünn an, bi 21 bit 24 Graad. Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Antje Kruppa.